އުތުރު ކޮރެއާ އިން އުދުއްސާލާ މިސައިލްތައް އެމެރިކާ އިން ގަނެފައިވާ އަސްކަރީ ސާމާނު ބޭނުންކޮށްގެން ޖަޕާނަށް "ވައްޓާލެވޭނެ" ކަމަށް އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެއްޖެއެވެ.
ރައީސްކަމާ ހަވާލުވެވަޑައިގަތުމަށް ފަހު ޖަޕާނަށް ކުރައްވާ ފުރަތަމަ ރަސްމީ ދަތުރުފުޅުގައި، ޖަޕާނުގެ ބޮޑު ވަޒީރު ޝިންޒޯ އަބޭއާ އެކު ނޫސްވެރިންނާ ބައްދަލު ކުރައްވަމުން ރައީސް ޓްރަމްޕް ވިދާޅުވީ ޖަޕާނުގެ ސަރުކާރުން ގިނަ އަދަދެއްގެ އަސްކަރީ ސާމާނު އެމެރިކާ އިން ގަންނަން ނިންމާފައިވާ ކަމަށެވެ.
ރައީސް ޓްރަމްޕްގެ ވާހަކަފުޅަށް އިޝާރާތްކުރައްވައި ބޮޑު ވަޒީރު އަބޭ ވިދާޅުވީ "ބޭނުންވެއްޖެ ހާލަތެއްގައި" އުތުރު ކޮރެއާ އިން އުދުއްސާލާ މިސައިލްތައް ޖަޕާނަށް އިންޓަސެޕްޓް ނުވަތަ ވައްޓާލެވޭނެ ކަމަށެވެ.
އުތުރު ކޮރެއާ އިން ކުރިން ވަނީ ޖަޕާނު މަތިން ދެ މިސައިލެއް އުދުއްސާލާފައެވެ.
ރައީސް ޓްރަމްޕް ޖަޕާނަށް ކުރައްވަމުން ގެންދަވާ ދަތުރުފުޅުގައި ޖަޕާނާ އެކު އެއްވެސް އަސްކަރީ އެއްބަސްބުމެއްގައި ސޮއިކުރެއްވި ކަމެއް އަދި ސާފެއް ނުވެއެވެ.
ސެޕްޓެމްބަރު މަހު ރައީސް ޓްރަމްޕް ކުރެއްވި ޓްވީޓެއްގައި ވިދާޅުވެފައި ވަނީ ޖަޕާނަށާއި އަދި ދެކުނު ކޮރެއާ އަށް އެމެރިކާގެ އެންމެ ޒަމާނީ އަސްކަރީ ހަތިޔާރު ވިއްކާނެ ކަމަށެވެ.
އުތުރު ކޮރެއާ އިން ދަނީ ބައިނަލްއަގްވާމީ ދުނިޔެއަށް ގޮންޖަހައި، ތަކުރާރުކޮށް މިސައިލްތައް ޓެސްޓްކޮށް އަދި ނިއުކްލިއާ ހަތިޔާރު ފައްކާކުރުމުގެ ޕްރޮގްރާމެއް ހިންގަމުންނެވެ.
އެމެރިކާގެ ރައީސް ޑޮނަލްޑް ޓްރަމްޕް އޭޝިއާއަށް ކުރައްވާ ދަތުރުފުޅުގެ ފުރަތަމަ މަންޒިލެއްގެ ގޮތުން ޖަޕާނަށް ވަޑައިގެން އެގައުމުގެ ވެރިންނާ ވަނީ ބައްދަލު ކުރައްވާފައެވެ.
ހޯމަ ދުވަހު ރައީސް ޑޮނަލްޑް ޓްރަމްޕް އާއި އެމަނިކުފާނުގެ އަނބިކަނބަލުން މެލާނިއާ ޓްރަމްޕް ވަނީ ޓޯކިޔޯގެ އިމްޕީރިއަލް ޕެލަސްގައި ޖަޕާނުގެ އެމްޕެރަރ އަކިހީޓޯ އަދި އެމްޕްރެސް މިޝީކޯއާ ބައްދަލު ކުރައްވާފައެވެ.
