ބަނގްލަދޭޝްގައި މަރުވި ފަތުހީގެ ހަށިގަނޑު މާލެ ގެނެސްފި
އޭނާ ބަނގްލަދޭޝްއަށް ދިޔައީ އެ ގައުމުގެ މީހަކާ އިންނަން
ބަންގަލަދޭޝްގެ މަގެއް
ބަންގްލަދޭޝް މީހަކާ ކައިވެނިކުރަން އެ ގައުމަށް ގޮސް އުޅެނިކޮށް މިދިޔަ އަންގާރަ ދުވަހު މަރުވި ސ. މަރަދޫފޭދޫ އަބްދުﷲ ފަތުހީ (65އ)ގެ ހަށިގަނޑު މާލެ ގެނެސްފި އެވެ.
ރާއްޖޭގެ ފޮރިން މިނިސްޓްރީން ހުކުރު ދުވަހުގެ ރޭ ކޮށްފައިވާ ޓްވީޓެއްގައި ވަނީ ފަތުހީގެ އާއިލާއިން އެދިގެން ފަތުހީގެ ހަށިގަނޑު މާލެ ގެނެސްފައިވާ ކަމަށެވެ. ފަތުހީގެ އާއިލާއަށް ތައުޒިޔާ ކިޔުމާ އެކު ފަތުހީގެ ހަށިގަނޑު މާލެ ގެނައުމުގައި އެހީތެރިވި ފަރާތްތަކަށް މިނިިސްޓްރީން ވަނީ ޝުކުރު އަދާކޮށްފައެވެ.
ފަތުހީގެ މަރާ މެދު ޝައްކުތަކެއް ހުރި ނަމަވެސް ކަމާބެހޭ އެއްވެސް ފަރާތަކުން ފަތުހީ މަރާމެދު ވަކިއެއްޗެއް ހާމައެއް ނުކުރެއެވެ. އަދި މި މައްސަލަ ދަނީ ތަހުގީގު ކުރަމުންނެވެ.
އާއިލާގެ ބައެއް މީހުން ބުނާ ގޮތުން އޭނާ ބަންގްލަދޭޝްއަށް ދިޔައީ އެ ގައުމުން މީހަކާ އިނުމަށެވެ. ގޭސްޓްރިކާއި ހަކުރު ބަލި ފިޔަވައި އެހެން ބައްޔެއްފަތުހީގެ ނުހުންނާނެ ކަމަށް ބުނެ އާއިލާއިން ބުނަމުން ދަނީ ފަތުހީ ކުއްލިއަކަށް މަރުވުމުން އެކަމާ ޝައްކު ކުރާނެ ފުރުސަތު އެބަ އޮތް ކަމަށެވެ.
އާއިލާއިން ބުނަމުން ދަނި ފަތުހީ ބަނގްލަދޭޝްއަށް މީހަކާ އިނުމަށް ދިޔައީ 149،000ރ (800،000 ޓާކާ) ހިފައިގެންނެވެ. އެ ފައިސާއަކީ އަންހެންމީހާގެ ކައިވެންޏަށްކީ ރަން ކަމަށް ވެސް އާއިލާއިން ބުނެއެވެ. އަދި ފަތުހީ ބަނގްލަދޭޝްއަށް ދިޔައީ އޭނާ ދިރިއުޅޭ ގެ މޯގޭޖްކޮށް، އެއް ލައްކަ ރުފިޔާގެ ލޯނެއް ވެސް ނަގައިގެން ކަމަށްވެސް އާއިލާއިން ބުނެއެވެ.
ފަތުހީ މަރުވުމުގެ ކުރިން ފަސް މީހުންނާ ކައިވެނިކޮށް، އެކި ބަނޑަށް 11 ދަރިން ތިބެ އެވެ.
