އިންޑިއާގައި ރޭޕްގެ ޝިކާރައަކަށްވެ މިދިޔަ އޯގަސްޓް މަހު ވިހެއި 10 އަހަރުގެ އަންހެން ކުއްޖާ ރޭޕްކުރިކަމަށް ސާބިތުވި އޭނާގެ ދެ ބޮޑުބޭބެ އުމުރަށް ޖަލަށް ލުމަށް  އިންޑިއާގެ އަވަސް ނިޔާ ކޯޓަކުން ބުރާސްފަތި ދުވަހު ހުކުމް ކޮށްފިއެވެ.

މައްސަލައިގެ އަޑު އެހުންތައް ހޯމަ ދުވަހު ނިންމާލާފައިވާއިރު ދެ މީހުންގެ މައްޗަށް ކުށް ސާބިތުވާ ކަމަށް ކަނޑައަޅާފައިވަނީ އަންގާރަ ދުވަހުއެވެ.

އަންހެން ކުއްޖާ ބަލިވެ އިންކަން އެނގުނީ ޖުލައި މަހުގެ މެދުތެރޭ އޭނާ ބަނޑުގައި ރިއްސާ ކަމަށް ބުނުމުން އޭނާގެ މައިންބަފައިން އޭނާ ހޮސްޕިޓަލަށް ގެންދިއުމުންނެވެ.

ކުއްޖާގެ ފުރަތަމަ ބޮޑުބޭބެގެ މައްޗަށް ވެސް ދައުވާކުރީ އޭނާ ރޭޕް ކުރިކަމުގެ ތުހުމަތުގައެވެ.

ދެވަނަ މީހެއްގެ މައްޗަށް ފުލުހުން ތުހުމަތު ކުރަން ފެށީ ފުރަތަމަ ތުހުމަތު ކުރެވުނު މީހާ އާއި ރޭޕްގެ ޝިކާރައަކަށްވި ކުއްޖާ ވިހެއި ތުއްތު ކުއްޖާގެ ޑީއެންއޭ ދިމާ ނުވާ ކަމަށް ފޮރެންސިކް ތަހުލީލުތަކުން ދެއްކުމުންނެވެ.

ފުރަތަމަ ހައްޔަރު ކުރެވުނު ބޮޑު ބޭބެގެ ޝަރީއަތަށް މަހެއްހާ ދުވަސް ނަގާފައިވާއިރު ދެވަނައަށް ހައްޔަރުކުރި މީހާގެ ޝަރީއަތަށް ހޭދަވެފައިވަނީ 18 ދުވަހެވެ.

އުމުރުން 10 އަހަރުގެ ކުއްޖާގެ މި މައްސަލަ އިންޑިއާ އާއި ދުނިޔޭގެ ސަމާލުކަމަށް އައިސްފައިވެ އެވެ. 

އެ ކުއްޖާ ބަލިވެއިންތާ 30 ހަފްތާ ވެފައިވާތީ އެބޯޝަން ހެދުމަކީ "މާ ރިސްކް ބޮޑު" ކަމެއް ކަމަށް ޑޮކްޓަރުން ލަފާ ދެއްވާތީ އެކަން ނުކުރުމަށް ޗަންދިގަރްގެ ކޯޓުން ވަނީ އަމުރުކޮށްފައެވެ. އަދި އޭގެ ފަހުން ސުޕްރީމް ކޯޓުން ވެސް ވަނީ ޑޮކްޓަރުންގެ އެ ލަފަޔަށް ރިއާޔަތް ކުރުމަށް ފަހު ދަށު ކޯޓުގެ ނިންމުމަށް ތާއީދުކޮށްފައެވެ.

ބަލިވެއިންތާ 20 ހަފްތާއަށް ފަހު، މައިމީހާއަށް ސިއްހީ ނުރައްކަލެއް އޮތް ކަމަށް ޑޮކްޓަރުން ސެޓްފިކެޓް ނުދޭ ނަމަ އެބޯޝަން ހެދުމަކީ އިންޑިއާގެ ގާނޫނުން މަނާ ކުރާ ކަމެކެވެ.

އަންހެންކުއްޖާއަށް ލިބުނު ތުއްތު ދަރިފުޅު ހަވާލުކޮށްފައިވަނީ ވެލްފެއަރ އިދާރާއަކާއެވެ.