ނަދާލް މިއަހަރު ނިންމާލާނީ ދުނިޔޭގެ އެއްވަނަ ކުޅުންތެރިޔާގެ ގޮތުގައި

ސްޕެއިންގެ ރަފައޭލް ނަދާލް މިއަހަރު ނިންމާލާނީ ދުނިޔޭގެ އެއްވަނަ ޓެނިސް ކުޅުންތެރިޔާގެ ގޮތުގައި ކަން ކަށަވަރު ވެއްޖެއެވެ.

ނަދާލްއަށް ދުނިޔޭގެ ރޭންކިންގެ އެއްވަނަ ކަށަވަރު ވެގެން ދިޔައީ ދެ ވަނައިގައި ރޭންކް ކުރެވިފައި އޮތް ސުވިޓްޒަލޭންޑުގެ ރޯޖާ ފެޑެރާ އަންނަ ހަފްތާގައި ފްރާންސްގެ ޕެރިހުގައި ފަށާ ޕެރިސް މާސްޓާސްގައި ނުކުޅެން ނިންމުމާ ވިދިގެންނެވެ. މިދިޔަ އާދިއްތަ ދުވަހު ފެޑެރާ ވަނީ އަށް ވަނަ ފަހަރަށް ސުވިޒް އިންޑޯ ބަސެލް މުބާރާތް ކާމިޔާބުކޮށް ނަދާލްއާ ދެމެދުވާ ޕޮއިންޓްގެ ފަރަގު ކުޑަކޮށްފައެވެ. އެގޮތުން ނަދާލްއާ ފެޑެރާއާ ދެމެދު އޮތް ޕޮއިންޓްގެ ފަރަގަކީ މިވަގުތު 1460 ޕޮއިންޓްއެވެ.

އަންނަ ނޮވެމްބަރު މަހުގެ 12 ވަނަ ދުވަހު ފަށާ އޭޓީޕީ ވޯލްޑް ޓުއާ ފައިނަލްސް މުބާރާތް ކާމިޔާބު ކޮށްގެން ފެޑެރާއަށް 1500 ޕޮއިންޓް ހޯދެން އޮތް ނަމަވެސް ނަދާލް ވެސް އެ މުބާރާތުގައި ވާދަކުރާތީ ފެޑެރާ އެއްވަނަ މާގާމް ހޯދަން ބޭނުންވި ނަމަ ޕެރިސް މާސްޓާސް ކާމިޔާބު ކުރަން ޖެހޭނެއެވެ. ގިނަ ބަޔަކު ދެކެމުން އައި ގޮތުގައި އޭޓީޕީ ޓެނިސް ރޭންކިންގެ އެއްވަނައިގައި އޮވެގެން މިއަހަރު ނިންމާލާނެ ކުޅުންތެރިޔާ އެނގިގެން ދާނީ ސީޒަނުގެ އެންމެ ފަހު މުބާރާތް ކަމަށްވާ، އޭޓީޕީ ވޯލްޑް ޓުއާ ފައިނަލްސްއަށް ފަހުއެވެ.

މިދިޔަ ސީޒަނުގައި ދުނިޔޭގެ އެއްވަނަ ކުޅުންތެރިޔާގެ ގޮތުގައި އޮވެގެން ނިންމާލި އެންޑީ މަރޭ އެ މަގާމު ކަށަވަރު ކުރީ މިދިޔަ ސީޒަނުގެ އޭޓީޕީ ވޯލްޑް ޓުއާ ފައިނަލްސްގެ ފަހު މެޗުގައި ސާބިއާގެ ނޮވަކް ޖޮކޮވިޗް ބަލިކޮށްގެންނެވެ.

އެހެނަސް ފެޑެރާ ބުނެފައިވަނީ ޕެރިސް މާސްޓާސްގައި އޭނާ ވާދަ ނުކުރަން ނިންމީ އޭޓީޕީ ވޯލްޑް ޓުއާ ފައިނަލްސް އާއި 2018 ވަނަ އަހަރުގެ ސީޒަނަށް ފިޓުކޮށް ހުރުމުގެ ގޮތުން ކަމަށެވެ. އަދި ސްވިޒް އިންޑޯ ބަސެލް މުބާރާތުގައި ހަ ދުވަހުގެ ތެރޭގައި ފަސް މެޗު ކުޅެން ޖެހުމުން ހަށިގަނޑަށް ވަރަށް ބޮޑަށް ވަރުބަލިކަން އިހުސާސު ކުރެވިފައިވާ ކަމަށާއި ރޭންކިންއާ މެދު ވިސްނި ނަމަވެސް މާ ބޮޑަށް ފަހަތުގައި އޮތުމުގެ ސަބަބުން ކުރެވޭނެ ކަމެއް އޭރު ނެތް ކަމަށް ފެޑެރާ ބުނެފައިވެއެވެ.

ފެޑެރާގެ ކެރިއަރުގައި މިހާތަނަށް ފަސް އަހަރެއްގެ މަތިން އޭނާ ވަނީ ދުނިޔޭގެ ރޭންކިންގެ އެއްވަނައިގައި އޮވެގެން އަހަރު ނިންމާލާފައެވެ. ފެޑެރާއަށް ވުރެ ގިނައިން އެއްވަނައިގައި ރޭންކް ކުރެވިގެން އަހަރު ނިންމާފައިވާ ހަމައެކަނި ކުޅުންތެރިޔަކީ އެމެރިކާގެ ޕީޓް ސަމްޕްރާސްއެވެ. އޭނާ ވަނީ ހަ ފަހަރެއްގެ މަތިން ދުނިޔޭގެ ރޭންކިންގެ އެއްވަނައިގައި އޮވެގެން އަހަރު ނިންމާލާފައެވެ.

ފެޑެރާ ދެ ވަނައިގައި އޮވެގެން އަހަރު ނިންމާލި ނަމަވެސް އޭނާއަކީ ދުނިޔޭގެ އެންމެ ކާމިޔާބު ޓެނިސް ކުޅުންތެރިޔާގެ ގޮތުގައި ގިނަ ބަޔަކު ދެކޭ ކުޅުންތެރިޔެކެވެ. އެގޮތުން އޭނާ ވަނީ 19 ގްރޭންޑްސްލޭމް މުބާރާތް ކާމިޔާބުކޮށް އަދި މުޅި ޖުމްލަ 95 މުބާރާތް ކާމިޔާބުކޮށް އޭޓީޕީ ރޭންކިންގެ އެއްވަނަ 302 ހަފްތާ ވަންދެން ހިފަހައްޓާފައެވެ.

ނަދާލް ޕެރިސް މާސްޓާސްގައި ވާދަކުރާއިރު އޭނާގެ ފުރަތަމަ މެޗުގައި ވާދަކުރާނީ ސައުތް ކޮރެއާގެ ހިޔޮން ޗޮންގްއާ ދެކޮޅަށެވެ.