އަވަށްޓެރި އިންޑިއާގައި މިހާރު ކުރިޔަށްދާ 17 އަހަރުން ދަށުގެ ވޯލްޑް ކަޕުގެ ފައިނަލުން އިންގްލޭންޑާއި ސްޕެއިން ޖާގަ ހޯދައިފިއެވެ.

އިންގްލޭންޑުން ފުރަތަމަ ފަހަރަށް 17 އަހަރުން ދަށުގެ ވޯލްޑް ކަޕުގެ ފައިނަލުން ޖާގަ ހޯދީ މި މުބާރާތް ތިން ފަހަރު ކާމިޔާބު ކޮށްފައިވާ ބްރެޒިލް 3-1 ގެ ނަތީޖާއަކުން ބަލިކޮށްގެންނެވެ. މި މެޗުގެ ފުރަތަމަ ލަނޑު 10 ވަނަ މިނެޓުގައި އިންގްލޭންޑަށް ކާމިޔާބު ކޮށްދިނީ ރަޔާން ބްރޫސްޓާއެވެ. މެޗުގެ 21 ވަނަ މިނެޓުގައި ބްރެޒިލްއަށް ނަތީޖާ ހަމަހަމަކޮށްދިނީ ވެސްލީ ޑޭވިޑްއެވެ. އެހެނަސް ބްރޫސްޓާ ވަނީ 39 ވަނަ މިނެޓުގައި ލަނޑެއް ޖަހާ އިންގްލޭންޑަށް އަލުން އަނބުރާ ލީޑު ނަގައިދީފައެވެ.

ފުރަތަމަ ހާފު 2-1 އިން ބްރެޒިލްގެ މައްޗަށް އިންގްލޭންޑް ކުރީގައި އޮވެގެން ނިމިގެން ދިޔައިރު މެޗުގެ 77 ވަނަ މިނެޓުގައި ބްރޫސްޓާ ވަނީ ލަނޑެއްޖަހާ އޭނާގެ ހެޓްރިކް ފުރިހަމަކޮށް އިންގްލޭންޑަށް ފައިނަލުގެ ޖާގައެއް ކަށަވަރު ކޮށްދީފައެވެ.

ޔޫރަޕުގެ ޗެމްޕިއަނުންގެ ގޮތުގައި މި މުބާރާތާ ކުރިމަތިލި ސްޕެއިން އިން ވަނީ މިދިޔަ އަހަރު މި މުބާރާތުގެ ފައިނަލުން ބަލިވި މާލީ 3-1 އަކުން ބަލިކޮށް ފައިނަލުގެ ޖާގައެއް ކަށަވަރު ކޮށްފައެވެ. މި މެޗުގެ ފުރަތަމަ ލަނޑު 19 ވަނަ މިނެޓުގައި ސްޕެއިންއަށް ކާމިޔާބު ކޮށްދިނީ އަބެލް ރުއިޒްއެވެ. މި ލަނޑަކީ ސްޕެއިންއަށް ލިބުނު ޕެނަލްޓީއަކުން އޭނާ ކާމިޔާބު ކޮށްދިން ލަނޑެކެވެ. ސްޕެއިންގެ ދެވަނަ ލަނޑު ފުރަތަމަ ހާފު ނިމެން ދެ މިނެޓަށް ވެފައި ވަނިކޮށް ވެސް ކާމިޔާބު ކޮށްދިނީ ރުއިޒްއެވެ. ސްޕެއިންގެ ތިން ވަނަ ލަނޑު 71 ވަނަ މިނެޓުގައި އެ ޓީމަށް ޖަހައިދިނީ ފެރާން ޓޮރޭސްއެވެ. މާލީގެ ހަމައެކަނި ލަނޑު 74 ވަނަ މިނެޓުގައި އެ ޓީމަށް ކާމިޔާބު ކޮށްދިނީ ލަސާނާ އެންޑިޔާއެވެ.

މި މުބާރާތުގައި 24 ގައުމީ ޓީމަކުން ވާދަކުރިއިރު ޓީމުތައް ހަ ގްރޫޕަކަށް ބަހާލެވުނެވެ. ކޮންމެ ގްރޫޕަކުން ވެސް އެންމެ ގިނައިން ޕޮއިންޓް ހޯދި ދެ ޓީމު ނޮކްއައުޓް ރައުންޑަށް ކޮލިފައިވި އިރު މުބާރާތުގެ ފައިނަލް މެޗު ކުޅުމަށް ހަމަޖެހިފައި ވަނީ މި މަހުގެ 28 ވަނަ ދުވަހުއެވެ.

މި މުބާރާތަކީ އިންޑިއާގައި ފިފާގެ މުބާރާތެއް ބާއްވާ ފުރަތަމަ ފަހަރެވެ. އިންޑިއާގެ ހަ ސިޓީއެއްގައި ކުރިޔަށްދާ މި މުބާރާތް ހުޅުއްވައި ދެއްވީ އެ ގައުމުގެ ބޮޑުވަޒީރު ނަރެންދްރަ މޯޑީއެވެ. ފައިނަލް މެޗު ކުޅޭނީ ކޮލްކަތާގައެވެ.