ގއ. ވިލިނގިލީ ރައިވެރިބެ: އާދައިގެ ޝަހްސިއްޔަތެއް ނޫން!

މިއަހަރުގެ ޖޫން މަހު ބޭއްވުނު ލޯކަލް ކައުންސިލް އިންތިޚާބުގައި ވާދަކޮށް ގއ. ވިލިނގިއްޔަށް އުފަން ހަބީބު ހަސަން ކައުންސިގެ ގޮނޑި ކާމިޔާބުކުރީ ރައްޔިތުންގެ ފުރިހަމަ ތާއީދާ އެކުއެވެ.

ކައުންސިލަރަކަށް ވުމުގެ ކުރީން ވެސް ހަބީބަކީ ތަފާތު ބޭފުޅެކެވެ. ހުނަރުވެރިއެކެވެ. އޭނާ ކުރަން ނުދަންނަ މަސައްކަތެއް ނެތެވެ. މަސްވެރިކަމާއި، ކޮންސްޓްރަކްޝަންގެ ހުރިހާ މަސައްކަތެކެވެ. ކުކުޅު ގެންގުޅުމާއި، ރާވެރިކަމާއި މިނޫނަސް ތަފާތު އެތައް މަސައްކަތެކެވެ. ހަބީބު ވިދާޅުވާ ގޮތުންނަމަ އޭނާގެ ދެއަތުން ކުރަން ނުދަންނަ ހަމަ އެއްވެސް މަސައްކަތެއް ނޯންނާނެއެވެ. މީގެ އިތުރުން ރަށުގެ ރައްޔިތުންގެ ލޯބި އިންތިހާއަށް އޭނާއަށް ވަނީ ލިބިފައެވެ. ހަބީބަކީ އެރަށުގެ ގޭގޭގެ އާބާތުރަ ފިލުވުމުގެ ބައިވެރިއެކެވެ. މީސްމީހުނަށް އެހީތެރިވުމުގައި ނަމޫނާއެކެވެ. ހަބީބުގެ ފާހަގަކޮށްލެވޭ އެންމެ މުހިއްމު އެއް ސިފައަކީ، އޭނާ މީސްމީހުނަށް ކޮށްދޭ ކިތަންމެ ބޮޑުކަމެއްގައި ވެސް އަގެއް ނުނަގާކަމެވެ. މީހަކު ކަމަކު އެދެފިނަމަ ދުވަހަކު ވެސް ފަހަތަކަށް ނުޖެހެވެ. އެކަމެއް ކޮށްދިނުމަކީ ހަބީބުގެ އުފަލެކެވެ.

ނަތީޖާއަކަށްވީ ހަބީބު ވިލިނގިލީ ރައްޔިތުންގެ ލޯބި ހޯއްދެވުމެވެ. ކައުންސިލަށް ކުރިމަތިލެއްވީ ވެސް ރައްޔިތުންނާއި ގާތުން ޚިދުމަތްކޮށްދެއްވުމުގެ މަގުސަދުގައެވެ. މޮޅަށް ކިޔެވިފައި ނެތަސް ހަބީބު ދެކިލައްވާ ގޮތުގައި ރައްޔިތުންނަށް ޚިދުމަތްކޮށްދިނުމަކީ އޭނާ އަބަދުވެސް ހިތްހަމަޖެހިވަޑައިގަންނަވާ ކަމެކެވެ. ކައުންސިލަށް ކުރިމަތިލެއްވީ އެގޮތުގެ މަތީންނެވެ. އެއްގޮތަކަށް ވެސް ހޮވޭނެ ކަމަކަށް ނޫނެވެ. އެހެެންނަމަވެސް ހީކުރެއްވި ގޮތާ ޚިލާފަށް، ރައްޔިތުންނަށް ހުރިހާ ދުވަހު ހަބީބުގެ ފަރާތުން ލިބުނު ޚިދުމަތުގެ އަގު ރައްޔިތުން އަދާކޮށް، ބޮޑު ތާއީދަކާ އެކު އޭނާ ކައުންސިލަށް ހޮވިއެވެ.

ސޯޓްގަނޑެއްގައި ރުކަށް އަރައި އުޅުނު ރާވެރިބެ، ކޯޓް ފަޓްލޫނުގައި ކައުންސިލްގެ ގޮނޑީގައި އިށީނދެ ވަޑައިގަތެވެ. ރަށުގެ ރައްޔިތުންގެ ފުރިހަމަ ތާއީދާއި ލޯތްބާ އެކުގައެވެ. ކައުންސިލަށް ހޮވުމަށްފަހުގައި ވެސް ހަބީބު ރުއްއެރުން ދޫކޮށެއް ނުލައްވައެވެ. ހަބީބު ވިދާޅުވީ ކައުންސިލަށް ކުރިމަތިލީ ލާރި ހޯދާކަށްނޫނެވެ. ރައްޔިތުންނަށް ޚިދުމަތްކުރުމަށެވެ.

ހަބީބު ވިދާޅުވީ، އެންމެ ރުކަކަށް އަރައިގެން ރާވެރިކަން ކުރުމުން ލިބޭ އާމްދަނީ އާއި ކައުންސިލްކަމުން ލިބޭ އާމްދަނީއާ ނުބައްދަލު ކަމަށެވެ. އެންމެ ރުކަކުން ވެސް އެއަށްވުރެ މާ ބޮޑު އާމްދަނީއެއް ލިބެއެވެ. ކައުންސިލަރަކަށްވުމަކުން ހަބީބު ކުރިން ކުރެއްވި އެއްވެސް މަސައްކަތެއް ދޫކޮށެއް ނުލައްވައެވެ. ވަގުތު ލިބޭ މިންވަރަކުން ކުރިން ކުރަމުން އައި ހުރިހާ ކަމެއް ވެސް ކުރައްވައެވެ.

ރާވެރިބެ ހަބީބު ކައުންސިލަރަކަށް ހޮވިވަޑައިގަތުމަށް ފަހު ފުރަތަމަވެސް ހުންނެވި ކޯޓް ފަޓްލޫނުގައި އެރުއްވީ ރުކަށެވެ. އަދި ރާ ބަނދެލިއެވެ. އެ މަންޒަރު ރަށުގެ ރައްޔިޔުންނަށްވީ ތަފާތު މައްޒަރަކަށެވެ. އެއްބަޔަކު އެމަންޒަރު ދިޔައީ ވީޑިއޯކުރަމުންނެވެ. އަނެއްބަޔަކު ތަރުހީބުދެނީއެވެ. މުޅި ރާއްޖޭގެ ސަމާލުކަން އެ މަންޒަރަށް ލިބިގެންދިޔައެވެ.

ކައުންސިލް ހުވާކުރެއްވުމަށް ފަހު ހިނގައިދިޔަ މި ކަންކަން ކެމެރާތަކުގައި ހުރީ ރެކޯޑްކުރެވިފައެވެ. އެ މަންޒަރުތައް ފެނި، ހަބީބު ވިދާޅުވީ، ހުސްގަޔާ ރުކަށް އަރާ ރާވެރިކަން ކުރަމުން ދަނިކޮށް، ވިލިނގިލީ ރައްޔިތުން ކޯޓް ފަޓްލޫނު ދިން ކަމަށްޓަކައި ޝުކުރު ދަންނަވާ ކަމަށެވެ..

"އެއްޗެެއް އެނގުނަސް އަދި ނޭނގުނަސް ރައްޔިތުން މި ވަނީ، ވިލިނގިލީ ކައުންސިލް މެންބަރަކަށް އަޅުގަނޑު ހޮއްވަވާފަ. ބަޔަކު މޭ ކެރިޔަސް ރައްޔިތުން ގާތަށް ޚިދުމަތްކުރުމަށް ﷲ ގެ ވާގިފުޅާއެކު، ކުރިއަށް އޮތް ތިން އަހަރު ސާބިތުކަމާއެކު ދެމި ހުންނާނެކަމުގެ ޔަގީންކަން ވިލިނގިލީ ރައްޔިތުންނަށް އަރުވަން. ތަފާތު ވާނެ، ތަފާތު ދައްކާނަން،" އޭނާ ވިދާޅުވި އެވެ.

ހަބީބު ވިދާޅުވާ ގޮތުގައި، އާދައިގެ ރާވެރިޔަކަސް ރައްޔިތުންނަށް އިޚްލާސްތެރިކަމާ އެކު ޚިދުމަތްކުރެވޭ ނަމަ އެ ރައްޔިތުންގެ އިތުބާރާއި ލޯބި ލިބޭނެއެވެ. މިއަދު ގއ. ވިލިނގިލީ ރައްޔިތުން ތިބީ ހަބީބުގެ ޚިދުމަތް ބަލައިގަނެ، އެ މަގާމަށް ހަބީބު ހޮވުނީތީ އުފަލުންނެވެ.