ކްރެމްލިން ކަޕްގެ ޗެމްޕިއަންކަން ޖޫލިއާ ގޯގެސް ހޯދައިފި

ރަޝިއާގެ މޮސްކޯގައި ބޭއްވި ކްރެމްލިން ކަޕްގެ ޗެމްޕިއަންކަން ޖަރުމަނުގެ ޖޫލިއާ ގޯގެސް ހޯދައިފި އެވެ.

މިމުބާރާތުގެ ޗެމްޕިއަންކަން ގޯގެސް ހޯދީ، ފައިނަލްގައި ރަޝިއާގެ ޑާރިއާ ކަސަޓްކީނާގެ މައްޗަށް ސީދާ ދެސެޓުން ކުރި ހޯދައިގެންނެވެ. މުބާރާތުގެ ހަތްވަނަ އަށް ސީޑުކޮށްފައިވާ ގޯގެސް، އެއް ގަޑިއިރާއި ހަ މިނިޓަށް ދެމިގެންދިޔަ މިމެޗު ކާމިޔާބު ކުރީ 6-1، 6-2 ންނެވެ.

މިދެ ކުޅުންތެރިން މިހާތަނަށް ބައްދަލުކުރި ފަސް މެޗުގެ ތެރެއިން ތިން މެޗު ނިމިފައިވަނީ ގޯގެސް ކޮޅަށް ބުރަވެގެންނެވެ.

މިއީ ދުނިޔޭގެ 27 ވަނަ އަށް ރޭންކް ކޮށްފައިވާ ގޯގެސް، 2011 ވަނަ އަހަރުގެ ފަހުން ކާމިޔާބު ކުރި ޑަބްލިއުޓީއޭގެ ފުރަތަމަ މުބާރާތެވެ. އޭނާގެ ކެރިއަރުގައި މިހާތަނަށް ޑަބްލިއުޓީއޭ މުބާރާތްތަކުގެ އަދަދު ވަނީ ތިނަކަށް އަރާފައެވެ.

މިއަހަރު ހަތަރު ފައިނަލެއްގައި ވާދަކޮށްފައިވާ ގޯގެސް އެންމެ ފަހުން ކުޅުނު ތިން މުބާރާތްވެސް ނިންމާލީ ފައިނަލުން ބަލިވެ، މުބާރާތުގެ ރަނަރަޕްގެ ގޮތުގައެވެ.

މިމޮޅާއެކު އޭނާ ދުނިޔޭގެ ރޭންކިންގެ ގަދަ 20 ން ޖާގަ ލިބޭނެ އެވެ. މީގެ އިތުރުން ޖަރުމަނުގެ އެއްވަނަ މަގާމުގައިވާ އެންޖެލީކޭ ކެރްބަރ އަތުން، އެމަގާމް ގޯގެސް އަށް ލިބޭނެ އެވެ.