ސްޕެއިން އިން ކެޓަލޯނިއާގައި އިންތިޚާބެއް ބާއްވަނީ
21 އޮކްޓޯބަރު 2017 | ހޮނިހިރު 14:10ބޭނުމަކީ ކެޓަލޯނިއާ ސްޕެއިންގެ މައި ސަރުކާރުގެ ދަށަށް ގެނައުން
ސްޕެއިންގެ ބޮޑު ވަޒީރު މާރިއާނޯ ރަޚޮއި: އެމަނިކުފާނު ދާދިފަހުން ވިދާޅުވީ ސްޕެއިންއަށް މިހާރު ދިމާވެފައިވާ ހާލަތަކީ އެގައުމުގެ 40 އަހަރުގެ ޑިމޮކްރަސީގެ ތާރީޚުގައި ދިމާވެފައިވާ އެންމެ ބޮޑު ނުރައްކާ ކަމަ
ސްޕެއިންގެ ކެޓަލޯނިއާ ސަރުކާރުގެ ވެރިން މަގާމުން ދުރުކޮށް ކެޓަލޯނިއާ ސްޕެއިންގެ ސަރުކާރުގެ ފުރިހަމަ ބާރުގެ ދަށަށް ގެންދިއުމާ ބެހޭ ޕްލޭން ސްޕެއިންގެ ބޮޑު ވަޒީރު މާރިއާނޯ ރަޚޮއި ހާމަ ކުރައްވައިފިއެވެ.
ބޮޑު ވަޒީރު މާރިއާނޯ ބޭއްވެވި ކެބިނެޓް ބައްދަލުވުމަކަށް ފަހު އެމަނިިކުފާނު ވިދާޅުވީ ކެޓަލޯނިއާ ސްޕެއިންގެ ފުރިހަމަ ބާރުގެ ދަށަށް ގެނައުން ފިޔަވައި އިތުރު ގޮތެއް ނެތް ކަމަށާއި ކެޓަލޯނިއާ ސަރުކާރުން މަސައްކަތް ކުރަނީ "ގާނޫނުތަކާއި ހިލާފަށް ކަމަށާއި އަދި ބޭނުން ވަނީ ކުރިމަތިލުމަކަށް ދާން ކަމަށެވެ."
ބޮޑު ވަޒީރު މާރިއާނޯ ގެ ވާހަކަފުޅުގައި ކެޓަލޯނިއާ ގެ ގާނޫނު ހަދާ މަޖިލިސް އުވާލުމަށް ނިންމާފައިވާ ކަން ހާމަ ކުރައްވާފައިނުވެއެވެ. އެހެން ނަމަވެސް އެ ސަރަހައްދުގައި އިލެކްޝަންސް ބާއްވަން ނިންމާފައިވާ ކަން ވަނީ ހާމަ ކުރައްވާފައެވެ.
ސްޕެއިންގެ ބޮޑު ވަޒީރު މާރިއާނޯ ހާމަ ކުރައްވާފައިވާ ޕްލޭން، ދެން އޮތީ ސްޕެއިންގެ ގާނޫނު ހަދާ މަޖިލީހުން އެޕްރޫޕް ކުރުމެވެ.
ކެޓަލޯނިއާ އަކީ ސްޕެއިންގެ ބާރުގެ ދަށުގައިވާ ސަރަހައްދެކެވެ. ކެޓަލޯނިއާ އިން ދަނީ ސްޕެއިން އިން މިނިވަންވުމަށް މަސައްކަތް ކުރަމުންނެވެ.
ސްެޕެއިންގެ މައި ސަރުކާރުން ކުރިން ބުނެފައި ވަނީ ކެޓަލޯނިއާ އިން މިނިވަންކަން އިއުލާން ކޮށްފައިވާ ކަމަށް ބުނެފި ނަމަ މިނިވަންކަން އަނބުރާ ގެންދަން ޖެހޭނެ ކަމަށެވެ. ނުވަތަ ސްޕެއިންގެ މައި ސަރުކާރުން ކެޓަލޯނިއާގެ މިނިވަންކަން ސަސްޕެންޑްކޮށް ސްޕެއިންގެ މައި ސަރުކާރުގެ ފުރިހަަމަ ބާރު ހިންގާނެ ކަމަށެވެ.
ކެޓަލޯނިއާގެ މިނިވަންކަން އިއުލާން ކުރަން ފެނޭތޯ ބެލުމަށް އޮކްޓޯބަރު 1 ގައި ބޭއްވި ވޯޓުގައި، 90 ޕަސެންޓް މީހުން ސްޕެއިން އިން މިިނިވަން ވާން ފެންނަ ކަމަށް އާނ ބަސް ބުނެފައި ވެއެވެ. ކެޓަލޯނިއާގައި ނެގި ވޯޓާ ގުޅިގެން ސްްޕެއިންގެ މައި ސަރުކާރުން ބުނެފައި ވަނީ އެ ވޯޓަކީ ގާނޫނު އަސާސީއާ ޚިލާފު ބާތިލް އެއްޗެއް ކަމަށެވެ. ވޯޓު ނިމުނުތާ ކުޑަވަގުތުކޮޅެއްގެ ތެރޭގައި ސްޕެއިންގެ ބޮޑުވަޒީރު މާރިއާނޯ ރަޚޮއި ވިދާޅުވީ ޣައިރު ގާނޫނީ ވޯޓެއްގައި ބައިވެރިކޮށް ކެޓަލޯނިއާގެ ރައްޔިތުން މޮޔަ ހައްދާފައިވާ ކަމަށެވެ. ބޮޑުވަޒީރު ވަނީ އެ ވޯޓަކީ ޑިމޮކްރަސީއަށް ކުރި ފުރައްސާރައެއް ކަމަށް ވިދާޅުވެފައެވެ.
ސްޕެއިންގެ ކެޓަލޯނިއާއަކީ ސްޕެއިންގެ އެންމެ ފުދުންތެރި އަދި މުއްސަނދި ސަރަހައްދުތަކުގެ ތެރޭގައި ހިމެނޭ، އަމިއްލަ ބަހަކާއި، ސަގާފަތަކާއި އަދި އަމިއްލަ ތާރީޚެއް އޮތް ސަރަހައްދެކެެވެ.
