ފަސް ލައްކަ ރުފިޔާ ނުދައްކާތީ ކަމަށް ބުނެ ރާއްޖެ ޓީވީގެ މައްސަލަ ބޭރުކޮށްލައިފި
19 އޮކްޓޯބަރު 2017 | ބުރާސްފަތި 13:42މައްސަލަ ބޭރުކޮށްލީ ޖޫރިމަނާ ދެއްކިކަން އެނގޭ ލިޔުމެއް ހުށަނާޅާތީ
ރާއްޖެޓީވީގެ އަބުރުފުޅު ފަންޑަށް ގއ. ވިލިނގިލީ ބަޔަކު އެހީވަނީ
ރާއްޖެ ޓީވީގައި ތިމަރަފުށީ ދާއިރާގެ މެންބަރު މުހައްމަދު މުސްތަފާ ދެއްކެވި ވާހަކައަކާ ގުޅިގެން ފަސް ލައްކަ ރުފިޔާއިން ރާއްޖެ ޓީވީ ޖޫރިމަނާ ކުރުމުން ބްރޯޑްކާސްޓިން ކޮމިޝަނާ ދެކޮޅަށް ރާއްޖެ ޓީވީން ސިވިލް ކޯޓަށް ހުށަހެޅި މައްސަލަ ބަލައި ނުގަނެ ބޭރުކޮށްލައިފިއެވެ.
ސިވިލް ކޯޓުން ހުސަހެޅި މައްސަލަ ބޭރުކޮށްލިކަން އަންގައި ސިވިލް ކޯޓުގެ ރަޖިސްޓްރާ ރާއްޖެ ޓީވީއަށް ފޮނުވާފައި ސިޓީގައި ބުނެފައި ވަނީ 2017 ޖުލައި 28 ވަނަ ދުވަހު ރާއްޖެ ޓީވީން ވަގުތުން ގެނެސްދިން ޕްރޮގްރާމެއްގައި ދައްކާފައިވާ ވާހަކައެއް، އަބުރު ރައްކާތެރިކޮށްދިނުމާއި ޚިޔާލުފާޅު ކުރުމުގެ މިނިވަންކަމުގެ ޤާނޫނުގެ 9 ވަނަ މާއްދާއާއި ޚިލާފް ކަމަށް ބުނެ 2017 އޮކްޓޯބަރ 5 ވަނަ ދުވަހު ރާއްޖެ ޓީވީ 500،000 ރުފިޔާއިން ޖޫރިމަނާ ކޮށްފައިވާތީ އެނިންމުމަކީ ޝަރުޢީ އަދި ޤާނޫނީ އުސޫލުން ބޭރުން ނިންމާފައިވާ ނިންމުމެއް ކަމަށް ކަނޑައަޅައި އެނިންމުން ބާތިލު ކުރުމަށް ހުށަހަޅާފައިވާ ދައުވާ ފޯމެއްކަން އެނގޭ ކަމަށެވެ.
ސިވިލް ކޯޓުން ބުނީ އަބުރު ރައްކާތެރިކޮށްދިނުމާއި ޚިޔާލުފާޅުކުރުމުގެ މިނިވަންކަމުގެ ޤާނޫނުގެ 4 ވަނަ ބާބުގެ ދަށުން ކުރެވޭ ޖޫރިމަނާ އިސްތިއުނާފްކުރެވޭނީ ފައިސާ ދެއްކުމަށް ފަހުގައި ކަމަށް އެޤާނޫނުގެ 32 ވަނަ މާއްދާގެ (ހ) ގައި ބަޔާންކޮށްފައިވާ ކަމަށެވެ. އެހެންކަމުން ދައުވާ ފޯމާއެކު ޖޫރިމަނާ ފައިސާ ދައްކާފައިވާކަން އެނގޭ ލިޔުމެއް ހުށަހަޅާފައި ނުވާތީ އެކަމަކީ ޤާނޫނުގައި ބުނާ އިޖުރާއަތްތައް ފުރިހަމަކޮށް ހުށަހަޅާފައިވާ ދައުވާއެއް ކަމަށް ބެލެވެން ނެތުމުން މައްސަލަ ބަލައިގަތެވެން ނެތީ ކަމަށް އެ ސިޓީގައި ވެއެވެ. އަދި މިހާރު ހުށަހަޅާފައިވާ ގޮތައް އެދައުވާ ރަޖިސްޓްރީ ކޮށްދެވެން ނެތް ކަމަށް ވެސް އަންގާފައި ވެއެވެ.
ޖޫރިމަނާ ފައިސާ ނުދައްކާތީ ކަމަށް ބުނެ މިމައްސަލަ ސިވިލް ކޯޓުން ބޭރުކޮށްލާފައިވާއިރު ރާއްޖެޓީވީ ރޯކޮށްލުމުގެ ސަބަބުން ލިބުނު 11.65 މިލިއަން ރުފިޔާގެ ގެއްލުމުގެ ބަދަލު ހޯދަން ހުށަހެޅި މައްސަލަ ވެސް ބެލެން ނެތް ކަމަށް ކަނޑައަޅައި ސިވިލް ކޯޓުން އެ މައްސަލަ ވެސް ވަނީ ބޭރުކޮށްލާފައެވެ.
