ރައިޓްސް އިޝޫގެ ދަށުން އެމްޓީސީސީއިން ހިއްސާ ވިއްކަން ފަށައިފި

ރައިޓްސް އިޝޫގެ ދަށުން އެމްޓީސީސީގެ ހިއްސާދާރުންނަށް ހިއްސާ ވިއްކަން ފަށައިފިއެވެ.

ބުރާސްފަތި ދުވަހު ހެނދުނު 9:00އިން ފެށިގެން ހިއްސާ ވިއްކަން ފަށާފައިވާއިރު، ރައިޓްސް އިޝޫގެ ދަށުން އަންނަ ޑިސެމްބަރު 3ގެ ނިޔަލަށް ހިއްސާ ވިއްކާނެކަމަށް އެމްޓީސީސިއިން ބުނެއެވެ. ރައިޓްސް އިޝޫގެ ދަށުން އެމްޓީސީސީގެ ހިއްސާ މިހާރު އޮތް ކޮންމެ ފަރާތަކަށް ހިއްސާއަކަށް ހިއްސާއެއްގެ މަގުން ހިއްސާ ގަނެވޭނެއެވެ. މިފަހަރު ހިއްސާއެއް ވިއްކުމަށް ނިންމާފައިވަނީ 62ރ ގެ ރޭޓުންނެވެ. އެމްޓީސީސީއިން ހިއްސާ ވިއްކުމަށް ނިންމާފައިވަނީ އެކުންފުނިން ގެންނަ ޑްރެޖަރ މަހާ ޖައްރާފު ގަތުމާއި އަދި ކުންފުނިން ކުރާ އެއާއި ގުޅިފައިވާ ކަންކަމަށް ޚަރަދުކުރުމަށް ބޭނުންވާ ފައިސާ ހޯދުމަށެވެ.

ރައިޓްސް އިޝޫގެ ދަށުން އެމްޓީސީސީއިން 5 މިލިއަން ހިއްސާ ވިއްކުމަށް ނިންމާފައިވެއެވެ. ހިއްސާ ވިއްކައިގެން 310 މިލިއަން ރުފިޔާ ރެއިޒްކުރުމަށް އެމްޓީސީސީއިން ދަނީ މަސައްކަތްކުރަމުންނެވެ.

ބުރާސްފަތި ދުވަހު ބޭއްވި ނޫސްވެރިންގެ ބައްދަލުވުމެއްގައި ވާހަކަ ދައްކަވަމުން އެމްޓީސީސީގެ ޗީފް ފައިނޭންޝަލް އޮފިސަރ މުހައްމަދު ހިލްމީ ވިދާޅުވީ މާލޭގައި ހިއްސާ ވިއްކުމުގެ މަސައްކަތް މިއަދު ފެށިގެންދާއިރު، އަތޮޅުތެރެއަށް އެމްޓީސީސީގެ ހިއްސާދާރުންގެ ގާތަށް ދިޔުމަށް އެކުންފުނިން ދަތުރުތައް ކުރާނެކަމަށެވެ. ރައިޓްސްގެ އިޝޫގެ ދަށުން އެމްޓީސީސީއިން ހިއްސާވިއްކުމުގައި އެންމެ ފުރަތަމަ ހިއްސާ ވިއްކުމަށް ހަމަޖެހިފައިވަނީ މިހާރުވެސް އެކުންފުނީގެ ހިއްސާދާރުންގެ ތެރޭގައި ހިމެނޭ ހިއްސާދާރުންނަށެވެ. އެމްޓީސީސީއަކީ ރާއްޖޭގައި އެންމެ ފުރަތަމަ ހިއްސާ ވިއްކަން ފެށި ކުންފުންޏަށް ވުމާއިއެކު، އެކުންފުނީގެ ހިއްސާދާރުންގެ ތެރޭގައި ވަރަށް ބޮޑު އިންސައްތައަކީ އުމުރުން ދުވަސްވީ ބޭފުޅުންކަން ހިލްމީ ފާހަގަކުރެއްވިއެވެ.

ރައިޓްސް އިޝޫގެ ދަށުން ހިއްސާ ގަންނަން ބޭނުން ނުވާ ހިއްސާ ދާރުންނަށް އެމީހުންނަށް ލިބޭ ހިއްސާ ގަތުމުގެ ހައްޤު އެހެން ފަރާތަކަށް ދޫކޮށްލެވޭނެއެވެ. އާއްމުންނަށް ހިއްސާ ވިއްކުމަށް އެމްޓީސީސީއިން ފެށިިރު، އެމްޓީސީސީއަށް ސަރުކާރުން މީގެ ކުރިން ދިން 11 މިލިއަން ޑޮލަރު އިކުއިޓީއަށް ބަދަލުކޮށް، ސަރުކާރަށް ގަތުމަށް ދޭނީ ބާކީވާ ބަޔަށްވާ ހިއްސާއެވެ.

އެމްޓީސީސީގެ ހިއްސާ ގަންނަން ބޭނުންވާ ހިއްސާދާރުންނަށް ހިއްސާ ވިއްކުމަށް ހަމަޖެހިފައިވަނީ އެމްޓީސީސީ ޓަވަރުގެ 3ވަނަ ފަންގިފިލާގައި ޤާއިމްކޮށްފައިވާ ރައިޓްސް އިޝޫ ސެންޓަރުންނެވެ. މީގެ އިތުރުން އިސްލާމިކް ބޭންކްގެ ބްރާންޗްތަކުންނާއި، މޯލްޑިވްސް ސެކިއުރިޓީސް ޑިޕޮޒިޓަރީގެ އޭޖެންޓުންގެ އިތުރުން ޕޯސްޓް އޮފީސްތަކުންވެސް ހިއްސާ ބަލައިގަނެވޭނެ އިންތިޒާމް ހަމަޖެހިފައިވާކަމަށް އެމްޓީސީސީއިން ބުނެއެވެ.