ސްޕެއިންގެ މިނިވަން ސަރަޙައްދެއް ކަމުގައިވާ ކެޓަލޯނިއާއިން ފުރިހަމަ މިނިވަންކަމަށް ކުރަމުންދާ މަސައްކަތުގައި އޮކްޓޯބަރު މަހުގެ އެއްވަނަ ދުވަހު ބޭއްވުމަށް ހަމަޖެހިފައިވާ އިންތިހާބުގައި އެ ސަރަހައްދަށް މިނިވަންކަން ލިބިއްޖެނަމަ އަންނާނީ ކޮންކަހަލަ ބަދަލެއްތޯ މިއީ ގިނަ ބަޔަކު ކުރަމުންދާ ސުވާލެކެވެ. ދިވެހިރާއްޖޭގަ ވެސް މަގްބޫލު ޓީމެއް ކަމަށްވާ ބާސެލޯނާއަކީ ކެޓަލޯނިއާއަށް ނިސްބަތްވާ ޓީމެކެވެ.

ސުވާލަކީ ކެޓަލޯނިއާއަށް މި އިންތިހާބު މެދުވެރިކޮށް ފުރިހަމަ މިނިވަންކަން ލިބިއްޖެނަމަ ބާސެލޯނާ ލަލީގާއިން ވަކިވާނެތޯއެވެ. ފުޓްބޯޅައިގެ ދުނިޔޭގައި އޮތް އެންމެ ވާދަވެރި މެޗު ކަމަށްވާ "އެލް ކްލްސިކޯ" އަށް ނިމުމެއް އަންނާނެ ބާވައެވެ. ދުނިޔޭގެ އެންމެ މޮޅު ކުޅުންތެރިންގެ ކުޅުން ފެންނަލެއް މަދުވާނެތޯއެވެ.

ބާސެލޯނާގެ މެނޭޖްމެންޓުން ކެޓަލޯނިއާ މިނިވަންވެއްޖެ ނަމަ ލަލީގާ ދޫކޮށްލާނެ ކަމަށް އެ ޓީމުން މިހާތަނަށް ބުނެފައިނުވާއިރު އެ ޓީމުން މިކަމުގައި އަދި އެއްވެސް ކޮޅެއް ނަގާފައެއް ނުވެއެވެ. އެގޮތުން މި މައްސަލައިގައި ފާޅުގައި އެ ޓީމުން އެއްވެސް އެއްޗެއް ބުނެފައިނުވެއެވެ. އެހެން ނަމަވެސް އެ ޓީމުގެ މެނޭޖްމަންޓުން ވަނީ މި މައްސަލައިގައި ވޯޓު ނެގެން ޖެހޭނެ ކަމަށް ބުނެފައެވެ.

ބާސާގެ ރައީސް ޖޯސެފް މާރިއާ ބާޓަމޯ ބުނެފައިވަނީ ޑިމޮކްރަސީގެ އުސޫލުތަކުގެ ދަށުން ކޮންމެ ބަޔަކަށްވެސް ހިޔާލު ފާޅުކުރުމުގެ މިނިވަންކަން ލިބިފައިވާތީ ކެޓަލޯނިއާގެ ރައްޔިތުންނަށްވެސް މި މައްސަލައިގައި ވޯޓު ނެގެން ޖެހޭނެ ކަމަށެވެ. އެހެނަސް އޭނާ ބުނެފައިވަނީ އޭގެ މާނައަކީ އެ ކްލަބުން މި ކަމުގައި އެއްވެސް ކޮޅަކަށް ޖެހުން ނޫން ކަމަށެވެ. އަދި ރައްޔިތުންގެ ނިންމުމަށް ޑިމޮކްރަޓިކް އުސޫލްތަކުގެ ދަށުން އެންމެން ވެސް އިހުތިރާމް ކުރަން ޖެހޭނެ ކަމަށް އޭނާ ބުނެފައިވެއެވެ.

އޮގަސްޓް މަހުގެ ތެރޭގައި ބާސެލޯނާގެ ނައިބް ރައީސް ކާލްސް ވިލާރުބީ ބުނެފައި ވަނީ ކެޓަލޯނިއާއަށް މިނިވަންކަން ލިބިއްޖެ ހާލަތެއްގައި އެ ޓީމު ކުޅޭނީ އެސްޕަންޔޯލްއާ އެއް ލީގެއްގައި ކަމަށެވެ. އެސްޕަންޔޯލްއަކީ ކެޓަލޯނިއާގެ ދެވަނައަށް އެންމެ ބޮޑު ފުޓްބޯޅަ ކްލަބެވެ.

މިކަމާއި ރައްދު ދެމުން ލަލީގާގެ ރައީސް ހަވިޔާ ޓޭބާސް ބުނެފައިވަނީ ކެޓަލޯނިއާއަށް މިނިވަންކަން ލިބުނަސް ނުވަތަ ނުލިބުނަސް ބާސެލޯނާ ކުޅޭ ލީގު ނިންމާނީ އެ ޓީމުން ނޫން ކަމަށާއި ބާސެލޯނާ ލަލީގާގައި ދެމިއޮތުމުގެ ބާރު ލިބިގެންވަނީ ސްޕެއިންގެ ފުޓްބޯޅަ އިދާރާއަށް ކަމަށެވެ.

ބީބީސީއިން ހާމަކޮށްފައިވާ ގޮތުގައި ކެޓަލޯނިއާއަށް މިނިވަންކަން ލިބިއްޖެ ހާލާތެއްގައި ލަލީގާއިން ވަކިވުމަށް އެ ޓީމަށް ނިންމޭނީ އެ ޓީމުގެ އާންމު މެމްބަރުންގެ ތެރޭގައި ނެގޭ ސިއްރު ވޯޓަކުންނެވެ. އަދި މިފަދަ ހާލަތެއް މެދުވެރިވެއްޖެ ނަމަ ބާސާ ލަލީގާގައި މަޑުކުރުވުމަށް ސްޕެއިންގެ ފުޓްބޯޅަ އިދާރާއިން މަސައްކަތް ކުރާނެ ކަމަށްވެސް ބީބީސީއިން ބުނެފައިވެއެވެ. އެއީ ބާސާއަކީ ދުނިޔޭގެ އެންމެ ބޮޑު އެއް ކްލަބަށް ވެފައި އެ ޓީމަކީ ދުނިޔޭގައި ތިބި އެންމެ މޮޅެތި ކުޅުންތެރިން ކުޅޭ ޓީމަށް ވީމައެވެ.

ސްޕެއިންގެ ކެޓަލަން ރިޕަބްލިކްގެ ވާތު ފިޔައިގެ ޕާޓީގެ ކޮންގްރެސް މެމްބަރެއްވެސް ވަނީ ބާސާ ލަލީގާގައި މަޑުކުރާނެ ކަމުގެ އިޝާރާތެއް ދީފައެވެ. އެގޮތުން އޭނާ ބުނެފައިވަނީ އޭއެސް މޮނާކޯ ފްރެންޗް ލީގުގައި ކުޅޭ އުސޫލުން ބާސާއަށްވެސް ލަލީގާގައި ކުޅުމުގެ ފުރުސަތު އޮންނާނެ ކަމަށެވެ. މޮނާކޯއަކީ ވަކި ގައުމަކަށްވާ އިރު އެގައުމަށް ނިސްބަތްވާ އެންމެ ބޮޑު ފުޓްބޯޅަ ޓީމު ކަމަށްވާ އޭއެސް މޮނާކޯ ކުޅެނީ ފްރެންޗް ލީގުގައެވެ.

މިދިޔަ ހަފްތާގައި ކެޓަލޯނިއާގެ ސަރަޙައްދީ ސަރުކާރުގެ އޮފީސްތަކުން، އިސް 14 އޮފިޝަލަކު ހައްޔަރު ކުރުމާ ވިދިގެން ބާސެލޯނާއިން ވަނީ އެކަން ކުށްވެރިކޮށް ބަޔާނެއް ނެރެފައެވެ. އެގޮތުން އެ ޓީމުން ބުނެފައިވަނީ މިއީ ޑިމޮކްރަސީއާ ހިޔާލް ފާޅުކުރުމުގެ މިނިވަންކަމަށް ލިބުނު ވަރަށް ބޮޑު ގެއްލުމެއް ކަމަށާއި ކެޓަލޯނިއާގެ ރައްޔިތުންނާ ދެކޮޅަށް މިފަދަ ޖަރީމާތަށް ހިންގުން ކުއްވެރި ކުރާ ކަމަށެވެ.

ކެޓަލޯނިއާގެ ދިދަ ބޭނުން ކުރުމާ ވިދިގެން މީގެ ކުރިން ޔޫރަޕުގެ ފުޓްބޯޅައިގެ މައި އިދާރާ ކަމަށްވާ ޔުއެފާއިން ވަނީ އެތަކެއް ފަހަރެއްގެ މަތިން ބާސެލޯނާ ޖޫރިމަނާ ކޮށްފައެވެ. އަދި 1900 އިގެ އަހަރުތަކުގައި ކުރިޔަށް ދިޔަ ސްޕެއިންގެ ދާހިލީ ހަނގުރާމައިގައި އެ ގައުމުގައި މިލިޓަރީ ވެރިކަން ކުރެއްވި ފްރޭންސިސްކޯ ފްރޭންކޯ ވެސް ވަނީ ބާސެލޯނާއަށް އެތަކެއް ފިއްތުންތަކެއް ކުރިމަތި ކުރުވާފައެވެ.

ފުޓްބޯޅައިގެ ދުނިޔެއާ މި ވޯޓު ވަރަށް ބޮޑަށް ގުޅިލާމެހިފައިވާ އިރު މިހާރު ގިނަ ސަޕޯޓަރުންނާ ކުޅިބަލާ މީހުން އިންތިޒާރު ކުރަމުން އަންނަނީ މި ވޯޓުގެ ނަތީޖާ ނުކުންނަ ގޮތަކުން ބާސެލޮނާއިން އަޅާނީ ކޮންކަހަލަ ފިޔަވަޅެއްތޯ ބެލުމަށެވެ.