ވައިގެ ތެރޭ ދިމާވި ކަމަކުން އެއާއޭޝިއާގެ ފްލައިޓެއް އަނބުރާ ޖައްސައިފި
16 އޮކްޓޯބަރު 2017 | ހޯމަ 04:51އެއަރއޭޝިއާއިން ބުނެފައިވަނީ ފްލައިޓަށް ޓެކްނިކަލް މައްސަލައެއް ދިމާވީ ކަމަށް
ކިއުޒެޑް 535ގެ މިސްރާބު ބަދަލުކުރަން ޖެހުނީ އާދީއްތަ ދުވަހު ބޯޓް ފުރިތާ 25 އަކަށް މިނެޓްގެ ތެރޭގަ
އެއަރ އޭޝިއާ އިންޑޮނީޝިއާގެ ފްލައިޓެއްގެ ކެބިން ޕްރެޝަރ ގެއްލުމުގެ ޕްރުސަތު އޮތް ކަމަށް ޕައިލެޓުންގެ ސަމާލުކަމަށް އައުމާއެކު އެނބުރި އޮސްޓްރޭލިއާގައި ޖައްސަން ޖެހިއްޖެ އެވެ.
އިންޑޮނީޝިއާގެ ބާލީއަށް ދަތުރު ފެށި ފްލައިޓް ކިއުޒެޑް 535ގެ މިސްރާބު ބަދަލުކުރަން ޖެހުނީ އާދީއްތަ ދުވަހު ބޯޓް ފުރިތާ 25 އަކަށް މިނެޓްގެ ތެރޭގައެވެ. ސަތޭކަ ފަންސާސް އެއް މީހުންނާއެކު ދަތުރު ކުރި އެއަރބަސް އޭ 320 ގެ ބޯޓް ޕަރތް އެއަރޕޯޓްގައި ވަނީ ރައްކާތެރިކަމާއެކު ޖައްސާފައެވެ.
އެއަރއޭޝިއާއިން ބުނެފައިވަނީ ފްލައިޓަށް ޓެކްނިކަލް މައްސަލައެއް ދިމާވީ ކަމަށެވެ.
އޮސްޓްރޭލިއާގެ މީޑިއާތަކުން ބުނީ ފެންނަ ފެނުމަށް ބޯޓް ތިރިވާން ފެށީކަމަށެވެ.
އޮސްޓްރޭލިއާގެ މީޑިއާތަކުން ދައްކާފައިވާ ފްލައިޓގެ ތެރޭގައި ނަގާފައިވާ ވީޑިއޯއަކުން ފެންނަ ގޮތުގައި ބޯޓްގެ ސީލިންގއިން އޮކްސިޖަން މާސްކްތައް އެލިފައި ހުރި އިރު ފަސިންޖަރުން އިށީނުމަށް ގޮވާ އެކަކު ހަޅޭއްލަވާ އަޑުއިވެއެވެ.
ސެވެން ނެޓްވޯކްގައި އިތުރު ފަސިންޖަރަކު ބުނެފައިވާ ގޮތުގައި ކަންބޮޑުވުން އިތުރުވީ ފްލައިޓްގެ ސްޓާފަކު ރޮވިފައި ހުރެ ހަޅޭއްލަވަމުން ދިއުމުންނެވެ.
އެއާއޭޝިއާގެ ބަޔާނުގައި ބުނެފައިވަނީ ފަސިންޖަރުންގެ ރައްކާތެރިކަމާމެދު އެއާލައިނުން ފުރިހަމައަށް ޒިންމާވާކަމަށެވެ.
އެއަރއޭޝިއާއިންވަނީ ފަސިިންޖަރުންނަށް ދިމާވެފައިވެދާނެ އެއްވެސް ދަތިކަމަކަށް ފަސިންޖަރުންގެ ކިބައިން މައާފަށްއެދޭކަމަށް ބުނެފައެވެ.
ޖޫން މަހުވެސް އެއަރއޭޝިއާ އެކްސް ގެ ފްލައިޓެއް ބާލީއަށް ދަތުރު ކުރަނިކޮށް "ދޮންނަ މެޝިނެއް ތެޅޭހެން ތެޅެން ފެށުމުން" ޕަރތްގައި ޖައްސަން ޖެހިފައިވެއެވެ.
