ލަންކާގެ 'ސުޕަރ ޕްރިޒަން' ހުޅުވަނީ

ލަންކާގައި ބައިނަލްއަޤްވާމީ މިންގަނޑުތަކާއި އެއްގޮތަށް ހުޅުވާ ފުރަތަމަ ޖަލު ހޯމަ ދުވަހު ހުޅުވާނެއެވެ.

ޖަލުތަކުގެ ޙާލަތު ދަށް ޤައުމެއްގެ ގޮތުގައި މަޝްހޫރުވެފައިވާ ލަންކާގެ ހަންބަންތޯޓާގައި ހަދާފައިވާ މި ޖަލު ހަދާފައިވާ ބައިނަލްއަޤްވާމީ މިންގަނޑުތަކާއި އެއްގޮތަށެވެ. އަދި ޖަލުގެ ވަޞީލަތްތައް ފުރިހަމަވުމުން ލަންކާގެ އާއްމުންގެ މެދުގައި މިތަން މަޝްހޫރުވެފައިވަނީ 'ސުޕަރ ޕްރިޒަން'ގެ ނަމުންނެވެ. 65 ހެކްޓަރުގެ ބިމެއްގައި 9.5 ބިލިއަން ރުޕީޒް ޚަރަދުކޮށްގެން ހެދި މިޖަލު ހުޅުވަން އެންމެ ފުރަތަމަ ތާވަލުކޮށްފައި އޮތީ މާޗް މަހުގެ 16 ވަނަ ދުވަހުއެވެ. އެހެން ނަމަވެސް ހުޅުވުމުގެ ރަސްމިއްޔާތަށް ރައީސް މައިތިރިޕާލާ ސިރިސެނާއަށް ފޮނުއްވި ދައުވަތަށް އެމަނިކުފާނު ދެކޮޅު ހެއްދެވުމުން ޖަލު ހުޅުވުން ލަސްކުރަން ޖެހުނީއެވެ.

1500 ޤައިދީންގެ ޖާގައިގެ މި ޖަލު ހުޅުވުމަށްފަހު ޓެންގޯލްގައި ހުންނަ ޖަލުގައި ތިބި ޤައިދީން މިޖަލަށް ބަދަލުކުރާ ގޮތަށް ވަނީ ހަމަޖެހިފައެވެ.

ހޯމަ ދުވަހު މި ޖަލު ހުޅުވުމުގެ ރަސްމިއްޔާތު ޝަރަފްވެރިކޮށްދެއްވާނީ ލަންކާގެ ޖަސްޓިސް މިނިސްޓަރ ތަލަތާ އަތުކޮރަލެއެވެ.