އަންނަ އަހަރަށް ލަފާކޮށް ހުށަހަޅާފައިވާ ބަޖެޓުން ރަނގަޅު ގޮތެއް މިންވަރުކޮށްދެއްވުން އެދި ހެޔޮ ދުއާކުރުން ނޫން ގޮތެއް ނެތް: މެންބަރު ޒިޔާދު
16 ނޮވެމްބަރު 2026 | ހޯމަ 11:58އަންނަ އަހަރުގެ ބަޖެޓަކީ ދަރަނި ބޮޑުވެ، ކުންފުނިތައް މެދުވެރިކޮށް ވައްކަމާއި ފޭރުމަށް މަގުފަހިވާ ގޮތަށް އޮތް ބަޖެޓެއް ކަމަށް ވިދާޅުވެ ވައިކަރަދޫ ދާއިރާގެ މެންބަރު ހުސައިން ޒިޔާދު ފާޑުވިދާޅުވެއްޖެ. މަޝްރޫއުތަކުގެ އަގު ބޮޑުކޮށް ދައުލަތުގެ ފައިސާ ނަހަމަ ގޮތުގައި ބޭނުންކުރާ ކަމުގެ ތުހުމަތު ކުރައްވަމުން، އަސާސީ ޚިދުމަތްތަކަށް ބަޖެޓުގައި އިސްކަންދީފައި ނުވާތީ މެންބަރު ވަނީ ކަންބޮޑުވުން ފާޅުކުރައްވާފައި


ވައިކަރަދޫ ދާއިރާގެ މެންބަރު ހުސައިން ޒިޔާދު (ފިއްޓޭ) | ރައްޔިތުންގެ މަޖިލިސް
2027 ވަނަ އަހަރަށް ލަފާކޮށް ހުށަހަޅާފައިވާ ބަޖެޓުން ރަނގަޅު ގޮތެއް މިންވަރު ކޮށްދެއްވުން އެދި ހެޔޮ ދުއާކުރުން ނޫން ގޮތެއް ނެތް ކަމަށް ރައްޔިތުންގެ މަޖިލީހުގެ ވައިކަރަދޫ ދާއިރާގެ މެންބަރު ހުސައިން ޒިޔާދު (ފިއްޓޭ) ވިދާޅުވެއްޖެ އެވެ.
ހޯމަ ދުވަހުގެ ރައްޔިތުންގެ މަޖިލީހުގެ ޖަލްސާގައި ވާހަކަދައްކަވަމުން މެންބަރު ޒިޔާދު ވިދާޅުވީ 2027 ވަނަ އަހަރަށް ލަފާކޮށް ސަރުކާރުން ހުށަހަޅާފައިވާ ބަޖެޓު އޮތީ ދަރަނި ބޮޑުވާނެ ބަޖެޓެއްގެ ގޮތުގައި ކަމަށެވެ. އެގޮތުން ބަޖެޓުތައް ހުށަހެޅި ނަމަވެސް ކަމެއް ނުވަނީ ދަރަނީގެ ސަބަބުން ކަމަށް ވަޒީރުން ވިދާޅުވާކަން ފާހަގަކުރައްވާ މެންބަރު ޒިޔާދު ވިދާޅުވީ، މިއަހަރަކީ ރިކޯޑް މިންވަރަށް ދަރަނި ދެއްކި އަހަރެއް ކަމަށާއި ނަމަވެސް ދަރަނި ވީ ބޮޑު ކަމަށެވެ. އަދި މިވާ ގޮތެއް ބަލަން ޖެހޭ ކަމަށް ވެސް މެންބަރު ޒިޔާދު ވިދާޅުވި އެވެ.
އަންނަ އަހަރަށް ލަފާކޮށް ހުށަހަޅާފައިވާ ބަޖެޓާއި ނިމިދިޔަ އަހަރުތަކުގެ ބަޖެޓުތަކުގައި ކުރި ކަމަކީ ކުންފުނިތަކަށް ފައިސާ ޖަމާކުރުމަށްފަހު ކުންފުނިތަކުން ވައްކަން ކުރުން ކަމަށް އޭނާ ވިދާޅުވި އެވެ.
އަޅުގަނޑުމެން މިބުނާ ރަސްމާލެ ހިއްކުމަށް އެޗްޑީސީން ރާޖޫއަށް ނުދެވުނީމާ، އެމްއޭސީއެލްއިން ހިއްކާ ކުންފުންޏެއް ހަދާފައި، ރާޖޫ ކިޔާ މީހަކު ލައްވާ އެމްއޭސީއެލްއިން ހެދި ކުންފުނިން ހިއްކީ. މިއަދު ބަދަލު ދޭން އެމްއޭސީއެލް ރިޕޯޓުގައި ޖަހާފައި އޮތީ 1.7 ބިލިއަން އިއްޒަތްތެރި ރައީސް. އޭނަ އެތަން ހިއްކަން އެޅި ފަސް އާދައިގެ ފަޓުލޫނެއްގެ ފައިކައްޓަށް އެޅޭނެ އިއްޒަތްތެރި ރައީސް. ދެން ކުރި ކަމަކީ ޓިނުން ފެންސެއް ޖެހީ ހުޅުމާލޭގައި، ޓިނުން ޖެހީމައި ތޯއްޗެއް އެހާ އަގުބޮޑީ 1.7 ބިލިއަން ދޭން ޖެހޭ ކަަމަށް އެމްއޭސީއެލްއިން އެއޮތީ ބުނެފައި. މިއަކަށް ނުކިޔާނެ ވައްކަމެއް މިއީ ފޭރުން، މިއީ ލޫޓުވުންހުސައިން ޒިޔާދު (ފިއްޓޭ)
މީގެ އިތުރުން، އާރުޓީއެލް ފެރީ މިހާރު ބަރާބަރަށް ދަތުރު ނުކުރުމާއި ބޭސް ނުލިބުމުގެ އިތުރުން ދައުލަތުގެ މީޑިއާއަށް އަންނަ އަހަރުގެ ބަޖެޓުން 145 މިލިއަން ދޭން ހިމަނާފައިވުމުން މެންބަރު ޒިޔާދު ވަނީ ކަންބޮޑުވުން ފާޅުކުރައްވާފަ އެވެ.
އެހެންކަމުން 2027 ވަނަ އަހަރުގެ ބަޖެޓަކީ ދުއާކޮށްގެން ނޫން ގޮތަކަށް ކަމެއް ވާން އޮތް ބަޖެޓެއް ނޫން ކަމަށް މެންބަރު ޒިޔާދު ވިދާޅުވި އެވެ.










