ހަރަދުތައް ފޫބައްދަން ސަރުކާރުން އިތުރު 3.2 ބިލިއަން ރުފިޔާގެ ޓީ-ބިލް ވިއްކަނީ!
15 ނޮވެމްބަރު 2026 | އާދީއްތަ 13:09ދައުލަތުގެ ޚަރަދުތައް ހަމަޖެއްސުމަށްޓަކައި 3.2 ބިލިއަން ރުފިޔާގެ ޓީ-ބިލް ވިއްކަން ފިނޭންސް މިނިސްޓްރީން ހުޅުވާލާފައިވަނީ 3.50 އިންސައްތައާއި 4.60 އިންސައްތައާ ދެމެދުގެ އިންޓްރެސްޓް ރޭޓްތަކެއްގައި. ހަތަރު މުއްދަތަކަށް ބަހާލައިގެން ވިއްކާ މި ބިލްތަކަށް ފައިސާ ދެއްކުމުގައި އުސޫލާ ޚިލާފުވާ ފަރާތްތައް ސަރުކާރުގެ ސެކިއުރިޓީޒް މުއާމަލާތްތަކުން ސަސްޕެންޑް ކުރާނެ ކަމުގެ އިންޒާރު ވެސް އެ މިނިސްޓްރީން ވަނީ ދީފައި
ފިނޭންސް މިނިސްޓަރު ހަސަން ޒަރީރު | ރައްޔިތުންގެ މަޖިލިސް
ދިވެހި ސަރުކާރުގެ ބޭނުމަށް 3.2 ބިލިއަނަށްވުރެ ގިނަ ރުފިޔާގެ ޓްރެޜަރީ ބިލް (ޓީ-ބިލް) ވިއްކުމަށް މިނިސްޓްރީ އޮފް ފައިނޭންސް އެންޑް ޕަބްލިކް އެންޓަޕްރައިޒަސް އިން އާދިއްތަ ދުވަހު ހުޅުވާލައިފި އެވެ.
ފިނޭންސް މިނިސްޓްރީން މައުލޫމާތު ދީފައިވާ ގޮތުގައި މި ފަހަރު ވިއްކުމަށް ހަމަޖެހިފައިވާ ޓީ-ބިލްތަކުގެ ތެރޭގައި ހިމެނެނީ 28 ދުވަހުން ފައިސާ ދައްކަންޖެހޭ 1.32 ބިލިއަން ރުފިޔާގެ ޓީ-ބިލަކާއި، 98 ދުވަހުގެ މުއްދަތަށް ވިއްކާ 70.18 މިލިއަން ރުފިޔާގެ ޓީ-ބިލެއްގެ އިތުރުން 188 ދުވަހުން ފައިސާ ދައްކަންޖެހޭ 50 މިލިއަން ރުފިޔާގެ ޓީ-ބިލެކެވެ. މީގެ އިތުރުން އެންމެ ބޮޑު އަދަދެއްގެ ގޮތުގައި ހިމެނެނީ 364 ދުވަހުގެ މުއްދަތަށް ވިއްކާ 1.76 ބިލިއަން ރުފިޔާގެ ޓީ-ބިލެވެ.
މި ހުރިހާ ޓީ-ބިލެއްގެ ޖުމްލަ އަދަދު 3,202,359,000 (ތިން ބިލިއަން ދުއިސައްތަ ދެ މިލިއަން ތިން ލައްކަ ފަންސާސް ނުވަ ހާސް) ރުފިޔާއަށް އަރަ އެވެ.
މި ޓީ-ބިލްތަކަށް ކަނޑައަޅާފައިވާ އިންޓްރެސްޓް ރޭޓްތަކަށް ބަލާއިރު، 28 ދުވަހުގެ ޓީ-ބިލަށް 3.50 އިންސައްތަ، 98 ދުވަހުގެ ޓީ-ބިލަށް 3.87 އިންސައްތަ، 188 ދުވަހުގެ ޓީ-ބިލަށް 4.23 އިންސައްތަ އަދި 364 ދުވަހުގެ ޓީ-ބިލަށް 4.60 އިންސައްތަ ވަނީ ކަނޑައަޅާފަ އެވެ. މި ޓީ-ބިލްތައް ވިއްކުމަށް ހަމަޖެހިފައިވާ ތާރީޚަކީ 2026 ނޮވެމްބަރު 15 ވާ އާދީއްތަ ދުވަހެވެ. އަދި ސެޓްލްމަންޓް ޑޭޓް ނުވަތަ ފައިސާ ދައްކަންޖެހޭ ތާރީޚަކީ ނޮވެމްބަރު 16 އެވެ.
ފައިނޭންސް މިނިސްޓްރީން ބުނި ގޮތުގައި ޓީ-ބިލްތަކަށް ސަބްސްކްރައިބް ކުރަން ބޭނުންވާ ފަރާތްތަކުން އެ މިނިސްޓްރީގެ 'ސަބްސްކްރިޕްޝަން ފޯމް' މެދުވެރިކޮށް ހުށަހަޅަންޖެހޭނެ އެވެ.
މި ޓީ-ބިލްތަކަށް ފައިސާ ދެއްކުމުގައި އަމަލުކުރަންޖެހޭނީ ޓީ-ބިލާ ގުޅޭ ޕްރޮސްޕެކްޓަސްގައިވާ އުސޫލުތަކާ އެއްގޮތަށެވެ. ކަނޑައެޅިފައިވާ ތާރީޚަށް ފައިސާ ނުދައްކާ ފަރާތްތަކަށް، ސަރުކާރުން ކުރިއަށްގެންދާ ސެކިއުރިޓީޒްގެ މުއާމަލާތްތަކުގައި ބައިވެރިނުވެވޭ ގޮތަށް ސަސްޕެންޑް ކުރުމުގެ ފުރުސަތު އޮންނާނެ ކަމަށް ވެސް މިނިސްޓްރީން ވަނީ އިންޒާރު ދީފަ އެވެ.
ޓީ-ބިލަކީ ދައުލަތުގެ ޚަރަދުތައް ހަމަޖެއްސުމަށްޓަކައި ކުރު މުއްދަތަށް ފައިސާ ހޯދުމަށް ސަރުކާރުން ވިއްކާ މާލީ ސެކިއުރިޓީއެކެވެ.
ރައީސް މުއިއްޒުގެ ސަރުކާރުގެ އާމްދަނީ އަށް ވުރެ ޚަރަދު ބޮޑުވެ، ހަރަދުތައް ހަމަޖެއްސުމަށްޓަކައި، މީގެ ކުރިން ވެސް ޓީ-ބިލް ވިއްކާފައިވެ އެެވެ. އަދި މި ބިލްތައް އާންމު ގޮތެއްގައި ގަންނަނީ ޕެންޝަން ފަންޑާއި ބޭންކުތަކާއި ސަރުކާރު ހިއްސާވާ ކުންފުނިތަކުންނެވެ. އެގޮތުން، މިއަހަރު ޖޫން މަހު 1.26 ބިލިއަން، މާރޗް މަހު 1.1 ބިލިއަން އަދި ފެބްރުއަރީ މަހު 1.16 ބިލިއަން ރުފިޔާގެ ޓީ-ބިލް ވިއްކަން ހުޅުވާލާފައިވާއިރު ސެޕްޓެމްބަރު މަހުގެ ތެރޭގައި ވެސް ވަނީ 645 މިލިއަން ރުފިޔާގެ ޓީ-ބިލް ވިއްކަން ހުޅުވާލާފަ އެވެ.
