އަންނަ އަހަރުގެ ހައްޖުގެ އިންތިޒާމުތަކާ ގުޅޭ އެއްބަސްވުމުގައި ދިވެހިރާއްޖެއާއި ސައުދީ އަރަބިއްޔާއިން ސޮއިކޮށްފި
14 ނޮވެމްބަރު 2026 | ހޮނިހިރު 13:57ސައުދީގައި ބޭއްވި ހައްޖު ކޮންފަރެންސްގެ ތެރެއިން ދިވެހިރާއްޖެއާއި ސައުދީ ސަރުކާރާ ދެމެދު ސޮއިކުރި މި އެއްބަސްވުމުގެ ދަށުން، ހައްޖުވެރިންނަށް ބޭނުންވާނެ އެކި އިންތިޒާމުތަކާއި ސަލާމަތީ ކަންކަމުގެ އިތުރުން ހިދުމަތްތައް ދޭނެ އުސޫލުތައް ވަނީ ކަނޑައަޅާފައި. މި މަސައްކަތުގެ ސަބަބުން ހައްޖުގެ އިންތިޒާމުތައް އިތުރަށް ހަރުދަނާވެ، ހިދުމަތްތަކުގެ ފެންވަރު ހިފެހެއްޓުމަށް މަގުފަހިވާނެ
އަންނަ އަހަރުގެ ހައްޖުގެ އަޅުކަމާ ގުޅޭ ކަންކަން އިންތިޒާމުކުރުމަށްޓަކައި ދިވެހިރާއްޖޭގެ އިސްލާމިކް މިނިސްޓްރީއާއި ސައުދީ އަރަބިއްޔާގެ މިނިސްޓްރީ އޮފް ހައްޖު އެންޑް އުމްރާއާ ދެމެދު ރަސްމީ އެއްބަސްވުމެއްގައި ސޮއިކޮށްފި | އިސްލާމިކް މިނިސްޓްރީ
އަންނަ އަހަރުގެ ހައްޖުގެ އަޅުކަމާ ގުޅޭ ކަންކަން އިންތިޒާމުކުރުމަށްޓަކައި ދިވެހިރާއްޖޭގެ އިސްލާމިކް މިނިސްޓްރީއާއި ސައުދީ އަރަބިއްޔާގެ މިނިސްޓްރީ އޮފް ހައްޖު އެންޑް އުމްރާއާ ދެމެދު ރަސްމީ އެއްބަސްވުމެއްގައި ސޮއިކޮށްފި އެވެ.
މި އެއްބަސްވުމަކީ ހައްޖުގެ އަޅުކަމަށް ސައުދީއަށްދާ ހުރިހާ ގައުމަކުން ވެސް ކޮންމެ އަހަރަކު ސޮއިކުރަންޖެހޭ ރަސްމީ ލިޔުމެކެވެ.
މި އެއްބަސްވުމުގައި ސޮއިކުރުމުގެ ރަސްމިއްޔާތު ކުރިއަށްދިޔައީ ސައުދީ އަރަބިއްޔާގައި މިހާރު ކުރިއަށްދާ ހަ ވަނަ ހައްޖު ކޮންފަރެންސްގެ ތެރެއިންނެވެ.
މި ބައްދަލުވުމުގައި ރާއްޖޭގެ ފަރާތުން އެއްބަސްވުމުގައި ސޮއިކުރެއްވީ މިނިސްޓްރީ އޮފް އިސްލާމިކް އެފެއާޒްގެ ޑެޕިއުޓީ މިނިސްޓަރު އުސާމް މުހައްމަދު ސައީދު އެވެ. ސައުދީ އަރަބިއްޔާގެ ފަރާތުން ސޮއިކުރެއްވީ އެ ގައުމުގެ ހައްޖު އެންޑް އުމްރާ މިނިސްޓްރީގެ ޑެޕިއުޓީ މިނިސްޓަރު އަބްދުލް ފައްތާހް މަޝާތު އެވެ.
މި އެއްބަސްވުމުގެ ދަށުން ކުރިއަށް އޮތް ހައްޖު މޫސުމުގައި ދިވެހި ހައްޖުވެރިންނަށް ބޭނުންވާނެ އެކި ހިދުމަތްތަކާއި، ހައްޖުގެ ކަންކަން ކުރިއަށް ގެންދާނެ ގޮތުގެ މުހިންމު އުސޫލުތައް ވަނީ ކަނޑައަޅާފަ އެވެ. މީގެ ތެރޭގައި ހައްޖުވެރިންނަށް ބޭނުންވާނެ އެކި އިންތިޒާމުތަކާއި، ސަލާމަތީ ކަންކަމުގެ އިތުރުން ދެ ގައުމުގެ ދެމެދުގައި ވިލަރެސްކުރަންޖެހޭ މުހިންމު ކަންތައްތައް ހިމެނެ އެވެ.
މިއީ ކޮންމެ އަހަރަކު ވެސް ހައްޖުގެ އަޅުކަން ފެށުމުގެ ކުރިން، ހައްޖުވެރިންނަށް ދެވޭ ހިދުމަތްތަކުގެ ފެންވަރު ހިފެހެއްޓުމަށާއި، އިންތިޒާމުތައް ހަރުދަނާކުރުމުގެ މަގްސަދުގައި ސައުދީ ސަރުކާރުން އިސްނަގައިގެން ކުރިއަށްގެންދާ މުހިންމު މަސައްކަތެކެވެ. މި އެއްބަސްވުމާއެކު އަންނަ އަހަރުގެ ހައްޖުގެ އިންތިޒާމުތައް ރޭވުމަށް އިތުރު ފަސޭހަތަކެއް ލިބިގެންދާނެ ކަމަށް އިސްލާމިކް މިނިސްޓްރީން މައުލޫމާތުދެ އެވެ.
