ހުޅުމާލޭގައި ގާއިމުކުރާ ޖާމިޢުއްސުލްޠާން މުޙައްމަދު ބުން ޢަބްދުﷲ މިސްކިތުގެ ބިންގާ އަޅައިފި
13 ސެޕްޓެމްބަރު 2026 | އާދީއްތަ 13:16ޖާމިޢުއްސުލްޠާން މުޙައްމަދު ބުން ޢަބްދުﷲގެ ނަމުން ނަން ދީފައިވާ މި މިސްކިތަކީ މަދުވެގެން 10،000 މީހުންގެ ޖާގައިގެ މިސްކިތެއް
ޖާމިޢުއްސުލްޠާން މުޙައްމަދު ބުން ޢަބްދުﷲ މިސްކިތުގެ ބިންގާ އެޅުމަށް ބޭއްވި ރަސްމިއްޔާތުގެ ތެރެއިން | ރާއްޖެ އެމްވީ
ރާއްޖެ އިސްލާމްވިތާ 900 އަހަރު ފުރުން ފާހަގަކުރުމުގެ މުނާސަބަތާ ދިމާކޮށް ހުޅުމާލޭގައި ޤާއިމުކުރާ ބޮޑު މިސްކިތުގެ ބިންގާ އަޅައިފި އެވެ.
މި މިސްކިތުގެ ބިންގާ އެޅުމަށް އާދީއްތަ ދުވަހުގެ ހަވީރު ހުޅުމާލޭގައި ވަނީ ޚާއްސަ ރަސްމިއްޔާތެއް ބާއްވައިފަ އެވެ. މި ރަސްމިއްޔާތުގައި ރައީސް ޑރ. މުހައްމަދު މުއިއްޒުގެ އިތުރުން، އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ވެސް ބައިވެރިވެ ވަޑައިގެންނެވި އެވެ.
ޖާމިޢުއްސުލްޠާން މުޙައްމަދު ބުން ޢަބްދުﷲގެ ނަމުން ނަން ދީފައިވާ މި މިސްކިތަކީ މަދުވެގެން 10،000 މީހުންގެ ޖާގައިގެ މިސްކިތެކެވެ. މި މިސްކިތުގައި އެޑިއުކޭޝަނަލް، ކަލްޗްރަލް އަދި ކޮމިއުނިޓީ ސެންޓަރެއް ވެސް ހިމެނެ އެވެ. މީގެ އިތުރުން، އިމާމުންނާއި އިދާރީ މަސައްކަތް ކުރާނެ އޮފީހަކާއި އިސްލާމިކް ލައިބްރަރީ އަކާއި ކަލްޗްރަލް ސެންޓަރަކާއި ޤުރުއާނާ ބެހޭ މިއުޒިއަމްއަކާއި މަލްޓިޕާޕަސް ކޮމިއުނިޓީ ހޯލްއަކާއި އިސްކާމިކް ބުކްޝޮޕެއް އަދި އެކްޒިބިޝަން ހޯލެއް ވެސް ހިމެނެ އެވެ.
މި ރަސްމިއްޔާތުގައި ވާހަކަ ދައްކަވަމުން އިސްލާމިކް މިނިސްޓަރު ޝަހީމް ވިދާޅުވީ، މި މިސްކިތުގައި ހިމެނޭ ތަންތަނުގެ ތެރޭގައި ރާއްޖެ އިސްލާމްވި ގޮތާާއި އެކަމުގެ ތާރީޚީ ވާހަކަތައް ކިޔައިދޭނެ މަރުކަޒުތައް ހިމެނޭނެ ކަމަށެވެ. މިސްކިތާ އެކުގައި ވަޤުފްގެ މަޝްރޫއުތަކެއް ވެސް ހިމެނޭ ކަމަށާއި ނަމަވެސް މިސްކިތުގެ މަޝްރޫއު އެންމެ ގިނަވެގެން ދެ އަހަރު ދުވަހުގެ ތެރޭގައި ނިންމުމަށް އަމާޒު ހިފާފައިވާ ކަމަށް ވެސް މިނިޝްޓަރު ޝަހީމް ވިދާޅުވި އެވެ.
މިއީ ރާއްޖޭގައި މިހާތަނަށް ތަރައްޤީ ކުރެވޭ އެންމެ ބޮޑު އެއް މިސްކިތަށް ވާނެ އެވެ. އަދި އިސްލާމިކް މިނިސްޓްރީ އިން ބުނެފައި ވަނީ، ހުޅުމާލޭގެ ދެ ވަނަ ފިޔަވަހީގައި ކުރިއަށް ގެންދެވޭ މި މަޝްރޫއަކީ މިހާތަނަށް ރާއްޖޭގައި ކުރިއަށް ގެންދެވޭ މިފަދަ އެންމެ ފުރިހަމަ އަދި އެންމެ ބޮޑު މަޝްރޫއަށް ވާނެ ކަމަށެވެ.
