އައިކެއަރ ހޮސްޕިޓަލުން އޭއައި ބޭނުންކޮށްގެން ލޮލުގެ ބަލިތައް ދެނެގަންނަ ޒަމާނީ ސްކްރީނިންގ ހިދުމަތް ތައާރަފްކޮށްފި
8 ނޮވެމްބަރު 2026 | އާދީއްތަ 09:58އައިކެއަރ ހޮސްޕިޓަލުން އަލަށް ތައާރަފްކުރި އޭއައި ޓެކްނޮލޮޖީގެ އެހީގައި، ހަކުރުބައްޔާއި ގްލޮކޯމާ ފަދަ ބަލިތަކުގެ ސަބަބުން ލޮލުގެ ރެޓިނާއަށް ލިބޭ ގެއްލުންތައް ވަރަށް އަވަހަށް ދެނެގަނެވޭނެ އެވެ. މި ޒަމާނީ ސްކްރީނިންގ ހިދުމަތުގެ ސަބަބުން ބަލިތައް ކުރިއާލާ ދެނެގަނެވި، ފަރުވާގެ ކަންކަން އަވަސްކުރުމަށް މަގުފަހިވެގެންދާނެކަމަށް އައިކެއަރ ހޮސްޕިޓަލުން މައުލޫމާތުދޭ. މި ހިދުމަތް ވަރަށް އަވަހަށް މާލޭގައި ހުންނަ އައިކެއަރ ހޮސްޕިޓަލުން ލިބެން ފަށާނެ
އައިކެއަރ ހޮސްޕިޓަލުން އޭއައި ބޭނުންކޮށްގެން ލޮލުގެ ބަލިތައް ދެނެގަންނަ ޒަމާނީ ސްކްރީނިންގ ހިދުމަތް ތައާރަފްކުރުން | އައިކެއަރ ހޮސްޕިޓަލް
އައިކެއަރ ހޮސްޕިޓަލުން "އައިރިސް" އާ ގުޅިގެން، އާޓިފިޝަލް އިންޓެލިޖެންސް (އޭއައި) ބޭނުންކޮށްގެން ލޮލުގެ ރެޓިނާ ސްކްރީން ކުރާ ޒަމާނީ ހިދުމަތެއް ރަސްމީކޮށް ތައާރަފްކޮށްފި އެވެ.
މި ހިދުމަތް ރަސްމީކޮށް އިފްތިތާހުކޮށްފައިވަނީ ނޮވެމްބަރު މަހުގެ 5 ވަނަ ދުވަހު، ހުޅުމާލެ ސެންޓްރަލް ޕާކުގައި ކުރިޔަށްދިޔަ "މޯލްޑިވްސް ހެލްތު އެންޑް ފެމިލީ އެކްސްޕޯ 2026" ގެ ތެރެއިންނެވެ. މި ހިދުމަތް އިފްތިތާހުކޮށްދެއްވީ މިނިސްޓްރީ އޮފް ހެލްތު، ފެމިލީ އެންޑް ވެލްފެއަރގެ ޑެޕިއުޓީ މިނިސްޓަރު އަހްމަދު ހަމްދޫން ނާސިރު އާއި އައިކެއަރގެ މެނޭޖިންގ ޑައިރެކްޓަރ ޑރ. އަބްދުﷲ ޒާހިރު އެވެ.
މި އައު ހިދުމަތުގެ ސަބަބުން އައިކެއަރގެ ސްކްރީނިންގ ހިދުމަތްތަކަށް އޭއައިގެ ޒަމާނީ ޓެކްނޮލޮޖީ ތައާރަފްވެ، ލޮލުގެ ބަލިތަކުގެ އަލާމާތްތައް ކުރިއާލާ ދެނެގަނެވި، އިތުރު ތަހުލީލުތަކާއި ފަރުވާ ބޭނުންވާ ފަރާތްތައް އަވަހަށް ފާހަގަކުރުމަށް ވަރަށް ބޮޑު ލުޔަކާއި ފަސޭހައެއް ލިބިގެންދާނެ އެވެ.
ސްކްރީން ކުރުމުގެ މަރުހަލާގައި ހާއްސަ ކެމެރާއެއް ބޭނުންކޮށްގެން ލޮލުގެ ފަހަތުގައިވާ ރެޓިނާގެ ފޮޓޯ ނެގުމަށްފަހު، އެ ފޮޓޯތައް ތަހުލީލުކުރަނީ އައިރިސްގެ އޭއައި ސިސްޓަމް މެދުވެރިކޮށެވެ. މި ސިސްޓަމްގެ އެހީގައި ހަކުރުބަލީގެ ސަބަބުން ލޮލަށް ލިބޭ ގެއްލުންތަކާއި، ގްލޮކޯމާ އަދި އުމުރުން ދުވަސްވުމުގެ ސަބަބުން ލޮލުގެ ފެނުމަށް ދިމާވާ މައްސަލަތައް ދެނެގަނެވެ އެވެ. އަދި މި ސިސްޓަމުން ތައްޔާރުކުރާ ތަފްސީލީ ރިޕޯޓުގެ އެހީގައި، ވަރަށް ކުޑަވަގުތުކޮޅެއްގެ ތެރޭގައި މައްސަލަތައް ދެނެގަނެވި، ލަސްނުކޮށް އިތުރު ފަރުވާ ހޯދަންޖެހޭކަން ކަށަވަރުކުރެވެ އެވެ.
ލޮލުގެ ދުޅަހެޔޮކަން ދަމަހައްޓައި ފެނުން ސަލާމަތްކުރުމުގައި ބަލިތައް ކުރިއާލާ ދެނެގަތުމަކީ ނުހަނު މުހިންމު ކަމެކެވެ. ހާއްސަކޮށް، އުމުރުން ދުވަސްވާ ވަރަކަށް ކުރިމަތިވާ ލޮލުގެ ބައެއް ބަލިތަކަކީ އެއްވެސް އަލާމާތެއް ނުފެނި ޖެހޭ ބަލިތަކަށް ވުމާއެކު، ފެނުމަށް އުނިކަމެއް އައުމުގެ ކުރިން މިފަދަ ސްކްރީނިންތަކުގެ އެހީގައި ބަލި ދެނެގަތުމަށް މަގުފަހިވެ އެވެ. އޭއައި ޓެކްނޮލޮޖީއާއި ތަޖުރިބާކާރު ޑޮކްޓަރުންގެ ލަފާ އެކުލެވޭ މި ހިދުމަތުގެ މައިގަނޑު މަގްސަދަކީ، ލޮލުގެ ފަރުވާއާ މެދު އަވަސް އަދި ސައްހަ ނިންމުންތައް ނިންމުމަށް މަގުފަހިކޮށްދިނުމާއި، ލޯ ސްކްރީން ކުރުމުގެ ހިދުމަތް ވީހާ ވެސް ފަސޭހަކޮށްދީ ލޮލުގެ ފެނުން ރައްކާތެރިކުރުމަށް އާންމުން ހޭލުންތެރިކުރުވުމެވެ.
އައިކެއަރއިން މައުލޫމާތު ދޭ ގޮތުގައި، މި ހިދުމަތް ވަރަށް އަވަހަށް މާލޭގެ އޯކިޑްމަގުގައި ހުންނަ އައިކެއަރ ހޮސްޕިޓަލުން ލިބެން ފަށާނެ އެވެ.
