ކުޑަކުދިންގެ ދުވަހާ ގުޅިގެން އައިކެއަރ އިން 30 އިންސައްތަ ޑިސްކައުންޓާއެކު ހާއްސަ ޕްރޮމޯޝަނެއް ފަށައިފި

ކުޑަކުދިންގެ ދުވަހުގެ މުނާސަބަތާ ގުޅުވައިގެން، ކުޑަކުދިންގެ ލޮލުގެ ސިއްހަތު ދެނެގަތުމަށާއި ލޮލުގެ މައްސަލަތަކަށް އަވަސް ފަރުވާ ހޯދުމަށް ހިތްވަރު ދިނުމުގެ ގޮތުން އައިކެއަރ ހޮސްޕިޓަލުން ހާއްސަ ޕެކޭޖުތަކެއް ތައާރަފްކޮށްފި އެވެ.

އައިކެއަރ އިން މައުލޫމާތު ދޭ ގޮތުގައި، 18 އަހަރުން ދަށުގެ ކުދިންނަށް ހާއްސަކޮށްގެން ކުރިއަށްގެންދާ މި ޕްރޮމޯޝަނުގެ ދަށުން، އިންޝުއަރެންސް ކެނޑުމަށްފަހު ދައްކަންޖެހޭ ފައިސާ އިން 30 އިންސައްތަ ޑިސްކައުންޓް ލިބިގެންދާނެ އެވެ. މި ޕްރޮމޯޝަން ރަސްމީކޮށް ފަށަފައިވަނީ 10 މެއި 2026 ގަ އެވެ.

މި ޕްރޮމޯޝަންގެ ދަށުން ތައާރަފްކުރި ޕެކޭޖުތަކަށް ބަލާއިރު، "ބްރައިޓް އައިސް – ބޭސިކް" ޕެކޭޖުގައި ހިމެނެނީ ލޮލުގެ ފެނުން ޓެސްޓުކުރުމާއި، ލޮލުގެ ނަންބަރު ބެލުމުގެ އިތުރުން ލޮލުގެ ހާއްސަ ޑޮކްޓަރަށް ދެއްކުމުގެ ހިދުމަތެވެ. އަދި "ބްރައިޓް އައިސް – އެޑްވާންސް" ޕެކޭޖުގައި ލޮލުގެ ހާއްސަ ޑޮކްޓަރަށް ދެއްކުމާއި، ލޮލުގެ ފެނުން ޓެސްޓުކުރުމާއި، ލޮލުގެ ނަންބަރު ބެލުމުގެ އިތުރުން ކޯނިއަލް ޓޮޕޮގްރަފީ އަދި ފަންޑަސް ފޮޓޯގްރަފީގެ ހިދުމަތް ހިމެނެ އެވެ.

އައިކެއަރ އިން ބުނީ، މި ފުރުސަތަކީ ކުދިން ބޮޑުވަމުން އަންނަ ދުވަސްވަރު ލޮލުގެ ފެނުން ގަވާއިދުން ޗެކްކުރުމަށް ބާރުއެޅުމުގެ ގޮތުން ހުޅުވާލި ފުރުސަތެއް ކަމަށެވެ. ހާއްސަކޮށް މިހާރަކަށް އައިސް ސްކްރީން ބޭނުންކުރާ މިންވަރު އިތުރުވުމާއި ކިޔެވުމުގެ ކަންކަމުގައި ލޮލަށް ކުރާ ބާރު ބޮޑުވުމުގެ ސަބަބުން ކުދިންގެ ލޮލުގެ ސިއްހަތަށް ބޮޑެތި އަސަރުތަކެއް ކުރަމުންދާކަން އެ ހޮސްޕިޓަލުން ފާހަގަކުރެ އެވެ.

އައިކެއަރ އިން އިތުރަށް ބުނި ގޮތުގައި، ގިނަ ކުދިންނަށް ލޮލުގެ ފެނުމުގެ މައްސަލަތައް ހުރި ނަމަވެސް އެކަން ސާފުކޮށް ބުނެދޭން ނޭނގިދާނެ އެވެ. މީގެ ސަބަބުން ކުއްޖާގެ އުނގެނުމަށާއި، ކަންކަމަށް ސަމާލުކަން ދިނުމަށް ބޮޑެތި ހުރަސްތަކެއް ކުރިމަތިވާ ކަމަށް އެ ހޮސްޕިޓަލުން ބުނެ އެވެ. އެހެންކަމުން މި ޕެކޭޖުތަކުގެ އެހީގައި ބެލެނިވެރިން ކުދިންގެ ލޮލުގެ ސިއްހަތަށް އިސްކަންދީ، ކުރިއަށް އޮތް ތަނުގައި ދިމާވެދާނެ މައްސަލަތަކުން ސަލާމަތްވުމަށް މަގުފަހިވާނެ ކަމަށް އައިކެއަރ އިން ދެކެ އެވެ.

މި ޕްރޮމޯޝަންގެ ދަށުން ޑޮކްޓަރަށް ދެއްކުމަށްޓަކައި، ލަސްނުކޮށް ކުރިން އެޕޮއިންޓްމަންޓް ހެއްދުމަށް އެ ހޮސްޕިޓަލުން ވަނީ ބެލެނިވެރިންނަށް އިލްތިމާސްކޮށްފަ އެވެ. އެޕޮއިންޓްމަންޓް ހެއްދެވުމަށް 7201026 ނަންބަރަށް ވައިބަރ ނުވަތަ ވޓްސްއެޕް މެދުވެރިކޮށް ގުޅޭނެއެވެ. މީގެ އިތުރުން އައިކެއަރގެ ވެބްސައިޓް މެދުވެރިކޮށް ވެސް އެޕޮއިންޓްމަންޓް ހެއްދޭނެ އެވެ.