އައިކެއަރ ހޮސްޕިޓަލްގައި ކޮމްބައިންޑް ބެލްޓް ބަކަލް އަދި ޕަރސް ޕްލާނާ ވިޓްރެކްޓަމީ ކާމިޔާބުކަމާއެކު ކޮށްފި

އައިކެއަރ ހޮސްޕިޓަލްގައި 51 އަހަރުގެ ބަލިމީހަކަށް ކޮމްބައިންޑް ބެލްޓް ބަކަލް އަދި ޕަރސް ޕްލާނާ ވިޓްރެކްޓަމީގެ ފަރުވާ ކާމިޔާބުކަމާއެކު ދީފި އެވެ.

މި އޮޕަރޭޝަން ކޮށްފައިވަނީ އައިކެއަރ ހޮސްޕިޓަލްގެ ކޮންސަލްޓަންޓް ވިޓްރިއޯ-ރެޓިނަލް ސަރޖަން، ޑރ. އަމޯގް އަސްގަވޮންކަރ އަދި އޭނާގެ ޚާއްޞަ ޓީމުންނެވެ. މި އޮޕަރޭޝަން ކުރީ 2025 ނޮވެންބަރު 2 ވީ އާދީއްތަ ދުވަހު އެވެ.

މި އޮޕަރޭޝަން ކުރީ ކައިރި ފެނުމުގެ މައްސަލަ ހުރި ލޮލެއްގައި ދިމާވެފައިވާ ރެޓިނާ ޑިޓެޗްމަންޓްގެ މައްސަލައެއް ހައްލުކުރުމަށެވެ. މި ޙާލަތުގެ ނާޒުކުކަމަށް ބަލާއިރު، މި އޮޕަރޭޝަން ކުރުމަށް ޚާއްޞަ ސަރޖިކަލްގެ ފަރުވާތެރިކަމާއި، ހުނަރުވެރިކަން ބޭނުންވެ އެވެ.

މިއީ މުޅި ދިވެހިރާއްޖޭގައިވެސް މިބާވަތުގެ ބޮޑު ރެޓިނާ ސަރޖަރީއެއް ކާމިޔާބުކަމާއެކު ކުރެވުނު ފުރަތަމަ ފަހަރު ކަމުން، މިއީ އައިކެއަރ ހޮސްޕިޓަލްއަށް ލިބުނު ވަރަށް މުހިންމު ކާމިޔާބީއެއްކަމަށް އެ ހޮސްޕިޓަލުން ބުނެ އެވެ.

މި އޮޕަރޭޝަން ކާމިޔާބުވުމަކީ، ރާއްޖޭގެ ލޮލުގެ ފަރުވާގެ ދާއިރާގައި ވަރަށް ބޮޑު ކުރިއެރުމެއް ކަމުގައި އައިކެއަރ އިން ދެކެ އެވެ. މިކަމުގެ ސަބަބުން ބަލިމީހުންނަށް މިހާރު ރާއްޖެއިން ބޭރަށް ދަތުރުކުރަން ނުޖެހި ރާއްޖޭގައި ތިބެގެން ޒަމާނީ ރެޓިނާ ސަރޖަރީތަކުގެ ފަރުވާ ލިބިގެންދާނެ ކަމަށް އައިކެއަރ އިން ބުނެ އެވެ.