ފުލުހުން އަންނަ އަހަރު އިސްކަން ދޭނެ ދާއިރާތައް ކަނޑައެޅުމަށް ބާއްވާ "އެންސީޕީއެލްއީ އެނުއަލް ޕޮލިސިންގ ކޮންފަރެންސް 2026" ފަށައިފި
8 ނޮވެމްބަރު 2026 | އާދީއްތަ 08:34މި ކޮންފަރެންސްގައި ކުށުގެ ވެއްޓަށް އަންނަ ބަދަލުތަކާއި ފަންނީ ދިރާސާތަކަށް ބިނާކޮށް، ފުލުހުންގެ ޚިދުމަތް ހަރުދަނާކުރުމަށް ފުޅާދާއިރާއެއްގައި މަޝްވަރާކުރާނެ. މި މަޝްވަރާތަކުގެ އަލީގައި 2027 ވަނަ އަހަރުގެ އެކްޝަން ޕްލޭން އެކުލަވާލައި، މުއައްސަސާގެ އިސްކަންދޭނެ ދާއިރާތަކާއި ލަނޑުދަނޑިތައް ކަނޑައެޅިގެންދާނެ ކަމަށް ފުލުހުން ބުނޭ
ފުލުހުންގެ 2027 ވަނަ އަހަރުގެ އެކްޝަން ޕްލޭން އެކުލަވާލުމަށް ބާއްވާ "އެންސީޕީއެލްއީ އެނުއަލް ޕޮލިސިންގ ކޮންފަރެންސް 2026" ފެށި ރަސްމިއްޔާތުގެ ތެރެއިން | މޯލްޑިވްސް ޕޮލިސް ސާރވިސް
ދިވެހި ފުލުހުންގެ ޚިދުމަތުން 2027 ވަނަ އަހަރަށް ކަނޑައަޅާ އިސްކަންދޭ ދާއިރާތަކާއި އަހަރީ އެކްޝަން ޕްލޭން އެކުލަވާލުމަށް އަމާޒުކޮށްގެން ބާއްވާ "އެންސީޕީއެލްއީ އެނުއަލް ޕޮލިސިންގ ކޮންފަރެންސް 2026" ފަށައިފި އެވެ.
2026 ނޮވެމްބަރު 8 އިން 10 އަށް އިސްކަންދަރު ކޮށީގައި ކުރިއަށްދާ މި ތިން ދުވަހުގެ ކޮންފަރެންސަކީ ނޭޝަނަލް ކޮލެޖް އޮފް ޕޮލިސިންގ އެންޑް ލޯ އެންފޯސްމަންޓް އަދި ސްޓްރެޓީޖިކް ޕްލޭނިންގ އެންޑް ލީގަލް ސަރވިސަސް ގުޅިގެން ބާއްވާ ކޮންފަރެންސެކެވެ.
މި ކޮންފަރެންސްގައި އިލްމީ ހޯދުންތަކާއި، ދިރާސާތަކާއި އަދި ފުލުހުންގެ އޮޕަރޭޝަނަލް ތަޖުރިބާގެ އަލީގައި، އަމަލީ ގޮތުން ނަތީޖާ ނެރެވޭނެ ހަރުދަނާ ފިޔަވަޅުތަކެއް އެކަށައެޅިގެން ދާނެ ކަމަށް ފުލުހުން ބުނެ އެވެ.
ފުލުހުން ބުނީ، މި ކޮންފަރެންސްގައި ރާއްޖޭގެ އެކި ސަރަހައްދުތަކުގައި ފުލުހުންގެ ޚިދުމަތް ބޭނުންވާ މިންވަރާއި، ކުށުގެ ވެއްޓަށް އަންނަމުންދާ ބަދަލުތަކުގެ އިތުރުން ފަންނީ ދިރާސާތަކުގެ ހޯދުންތަކުގެ މައްޗަށް ބިނާކޮށް ފުޅާ ދާއިރާއެއްގައި މަޝްވަރާކުރެވޭނެ ކަމަށެވެ. އަދި މި މަޝްވަރާތަކުގެ ތެރެއިން، މުއައްސަސާގެ އިސްކަންދޭންޖެހޭ ދާއިރާތައް ދެނެގަނެވި، ސާފު ލަނޑުދަނޑިތަކެއް ކަނޑައެޅި، ދިވެހި ފުލުހުންގެ ޚިދުމަތުގެ 2027 ވަނަ އަހަރުގެ އެކްޝަން ޕްލޭންގައި ހިމެނޭ ވަކިވަކި ޒިންމާތައް ތަރުތީބުކޮށް ކަނޑައެޅިގެންދާނެ ކަމަށެވެ.
މި ކޮންފަރެންސްގައި ގިނަ އަދަދެއްގެ ފުލުހުން ބައިވެރިވެފައިވާއިރު، މިކަމުގެ ސަބަބުން ފުލުހުންގެ ހިންގުން ވަރަށް ބޮޑަށް ހަރުދަނާވާނެ ކަމަށް އެ ޚިދުމަތުން ބުނެ އެވެ.
