ހުރިހާ މީޑިއާތަކަށް ހަމަހަމަކަމާއި އިންސާފުވެރިކަމެއް ނެތް ކަމަށް ވިދާޅުވެ މީޑިއާ ކޮމިޝަނުގެ ރައީސް އިސްތިއުފާ ދެއްވައިފި
28 އޮކްޓޯބަރު 2026 | ބުދަ 10:38މީޑިއާތަކަށް ހަމަހަމަކަމާއި އިންސާފުވެރިކަމާއެކު ކަންކަން ކުރުމަށް ހައްލުނުކުރެވޭ ގޮންޖެހުންތަކެއް ހުރި ކަމަށް ވިދާޅުވެ، މޯލްޑިވްސް މީޑިއާ އެންޑް ބްރޯޑްކާސްޓިން ކޮމިޝަންގެ ރައީސް މުހައްމަދު ފަރުޝަތު މަގާމުން އިސްތިއުފާ ދެއްވައިފި. ރައީސުލްޖުމްހޫރިއްޔާއަށް ފޮނުއްވި ސިޓީގައި އޭނާ ވަނީ ރާއްޖޭގެ މީޑިއާތަކަކީ އިލްމީ އަދި މާލީ ގޮތުން މިނިވަން، ޒިންމާދާރު ބަޔަކަށް ވުމަށް އެދިވަޑައިގެންފައި
މޯލްޑިވްސް މީޑިއާ އެންޑް ބްރޯޑްކާސްޓިން ކޮމިޝަން (އެމްއެމްބީސީ)ގެ ރައީސް މުހައްމަދު ފަރުޝަތު | ސޯޝަލް މީޑިއާ
މޯލްޑިވްސް މީޑިއާ އެންޑް ބްރޯޑްކާސްޓިން ކޮމިޝަން (އެމްއެމްބީސީ)ގެ ރައީސް މުހައްމަދު ފަރުޝަތު މަގާމުން އިސްތިއުފާ ދެއްވައިފި އެވެ.
ރައީސް ޑރ. މުހައްމަދު މުއިއްޒުއަށް ފޮނުއްވި ސިޓީއެއްގައި ފަރުޝަތު ވަނީ މީޑިއާތަކަށް އިންސާފުން ކަންކަން ކުރުމަށް ގޮންޖެހުންތައް ހުރި ކަމަށް ވިދާޅުވެފަ އެވެ.
އެގޮތުން، މީޑިއާ ކޮމިޝަންގެ މަސައްކަތްތައް ފުރިހަމަކަމާއި ހުރިހާ މީޑިއާތަކަށް ހަމަހަމަކަމާއި އިންސާފުވެރިކަމާއެކު ރާވައި ހިންގުމަށް ހައްލުނުކުރެވޭ ގޮންޖެހުންތަކެއް ހުރި ކަމަށް ފަރުޝަތު ވިދާޅުވި އެވެ. އެހެންކަމުން އެ މަގާމުން އިސްތިއުފާ ދެއްވަން ނިންމެވީކަމުގައި އޭނާ ހާމަކުރެއްވި އެވެ.
މޯލްޑިވްސް މީޑިއާ އެންޑް ބްރޯޑްކާސްޓިންގ ކޮމިޝަނަކީ މޯލްޑިވްސް މީޑިއާ އެންޑް ބްރޯޑްކާސްޓިންގ ރެގިއުލޭޝަންގެ ޤާނޫނުގެ ދަށުން އުފައްދާފައިވާ މީޑިއާތަކާއި ބްރޯޑްކާސްޓަރުން ބަލަހައްޓާ މައި އިދާރާ އެވެ. މި ކޮމިޝަންއަކީ ހަތް މެންބަރުންގެ މައްޗަށް އެކުލެވޭ ކޮމިޝަނެކެވެ. އަދި މި ކޮމިޝަންގެ ރައީސް ކަނޑައަޅަނީ ރައްޔިތުންގެ މަޖިލީހުންނެވެ.
