ރަސްމާލެ މަޝްރޫއާ ގުޅިގެން ރައްޔިތުންނަށް އޮޅުވާނުލުމަށް މާލީ ތަޖުރިބާކާރު ޒަރިޔަންދު، ރައީސްއަށް އަދި ކަމާބެހޭ ވަޒީރުންނަށް ގޮވާލައްވައިފި
27 އޮކްޓޯބަރު 2026 | އަންގާރަ 17:23ރަސްމާލެ މަޝްރޫއުގެ ދަށުން އަޅާ ހައުސިންގ ޔުނިޓުތަކުގެ އަގު ބޮޑުވުމާއި، އެ މަޝްރޫއަށް ނަގާފައިވާ ލޯނުތަކުގެ ތަފްސީލު ސަރުކާރުން ހާމަނުކުރާތީ މާލީ ތަޖުރިބާކާރު ޒަރިޔަންދު ވަނީ ކަންބޮޑުވުން ފާޅުކުރައްވާފައި. މީގެ އިތުރުން، އެ ސަރަހައްދުން ބިން ކުއްޔަށް ދީފައިވާ ކުންފުނިތަކަށް ލިބޭ ގެއްލުމުގެ ބަދަލު ދައުލަތުން ދޭންޖެހިދާނެތީ، ރައްޔިތުންނަށް ހަގީގަތް އޮޅޭގޮތަށް މައުލޫމާތު ނުދިނުމަށް އޭނާ ގޮވާލެއްވި
އަންގާރަ ދުވަހު ބޭއްވި ނޫސްވެރިންގެ ބައްދަލުވުމުގައި މާލީ ދާއިރާގެ ތަޖުރިބާކާރު އިސްމާއީލް ޒަރިޔަންދު ވާހަކަ ދައްކަވަނީ | ރާއްޖެއެމްވީ
ރަސްމާލެ މަޝްރޫއާ ގުޅޭގޮތުން ރައްޔިތުންނަށް އޮޅޭ ފަދަ ގޮތަކަށް މައުލޫމާތު ނުދިނުމަށާއި، މަގާމުގެ ހުވަޔާއި ގާނޫނުއަސާސީގެ 130 ވަނަ މާއްދާއަށް ހުރުމަތްތެރިކޮށް ހިއްތެވުމަށް މާލީ ދާއިރާގެ ތަޖުރިބާކާރު އިސްމާއީލް ޒަރިޔަންދު، ރައީސުލްޖުމްހޫރިއްޔާ ޑރ. މުހައްމަދު މުއިއްޒުއަށާއި ފިނޭންސް މިނިސްޓަރު ހަސަން ޒަރީރު އާއި ހައުސިންގ މިނިސްޓަރު ޑރ. އަބްދުﷲ މުއްތަލިބަށް ގޮވާލައްވައިފި އެވެ.
އަންގާރަ ދުވަހު ބޭއްވި ނޫސްވެރިންގެ ބައްދަލުވުމުގައި، ޒަރިޔަންދު ވިދާޅުވީ، ރަސްމާލޭގެ ސަރަހައްދުތައް ކުއްޔަށް ދޫކުރާއިރު، އެ މަޝްރޫއަށް ކުރި ބޮޑު ޚަރަދު އަނބުރާ ދައުލަތަށް އަދި ރައްޔިތުންނަށް ލިބޭނެ އެއްވެސް ގޮތެއް ސަރުކާރުން ހާމަކޮށްފައި ނުވާ ކަމަށެވެ. އަދި ރަސްމާލެއާ ގުޅުވައިގެން ދައުލަތުގެ ބައެއް ކުންފުނިތަކުން އެތައް މިލިއަން ޑޮލަރެއްގެ ލޯނު ނަގާފައިވާއިރު، އެ ލޯނުތަކުގެ އިންޓްރެސްޓަށް ވާނެ ގޮތެއް ވެސް އަންގައިދީފައި ނުވާ ކަމަށާއި، މިކަމާ ގުޅޭގޮތުން މީހަކު ސުވާލުކޮށްގެން ސަރުކާރުން ޖަވާބެއް ދީފައިވާ ތަނެއް ވެސް ފެނިފައިނުވާ ކަމަށް އޭނާ ވިދާޅުވި އެވެ.
މީގެ އިތުރުން، އެ މަޝްރޫއުގެ ދަށުން އަޅާ 5,000 ހައުސިންގ ޔުނިޓާ ގުޅޭގޮތުން ޒަރިޔަންދު ވަނީ ކަންބޮޑުވުން ފާޅުކުރައްވާފަ އެވެ.
އޭނާ ވިދާޅުވީ އެ ތަންތަނަކީ އާންމު ސޯޝަލް ހައުސިންގ ޔުނިޓުތަކަށް ބަލާއިރު ގަބޫލުކުރެވޭ މިންގަނޑުތަކަށް ވުރެ ނުވަތަ އަގުތަކަށް ވުރެ މާ ބޮޑެތި އަގުތަކެއްގައި އަޅާ ތަންތަން ކަމަށާއި، އެ އަގުތަކާ އެ ޔުނިޓުތަކާ އަޅާބަލާއިރު އެއީ ''ހަމަ ބޮޑެތި މަހަލްތަކަކަށް'' ވެގެންދާ ކަމަށެވެ.
އެ 5000 ހައުސިންގ ޔުނިޓަކީ އާއްމު ރައްޔިތުންގެ ބޯހިޔާވަހިކަމަށް އަޅައިދޭ ތަންތަންކަން ދޭހާވާ ގޮތަށް ފިނޭންސް މިނިސްޓަރާއި ހައުސިންގ މިނިސްޓަރާ އަދި ޚާއްސަކޮށް ރައީސުލްޖުމްހޫރިއްޔާ އެ ގެންގުޅުއްވާ ބަހުރުވަ ބަދަލުކުރެއްވުން ވަރަށް ބޮޑަށް އެދެންއިސްމާއީލް ޒަރިޔަންދު
މީގެ އިތުރުން ޒަރިޔަންދު ވިދާޅުވީ، އެ 5000 ހައުސިންގ ޔުނިޓު އަޅާ ބިމަކީ މިހާރު ވެސް ރާއްޖޭގެ 21 ކުންފުންޏަކަށް އެޗްޑީސީން އެންމެ މަދުވެގެން 5 މިލިއަން ޑޮލަރު ނަގައި ކުއްޔަށް ދީފައިވާ ތަންތަން ކަމަށެވެ. އަދި އެ ތަންތަން އެގޮތަށް ކުއްޔަށް ދީފައި އޮއްވައި، ސަރުކާރުން އެކި ފަރާތްތަކަށް ކުއްޔަށް ދިނުމަށް މަސައްކަތްކުރުމުގެ ތެރޭގައި މިހާރު އީގަލް ހިލްސްއިން 5000 ހައުސިންގ ޔުނިޓް އެޅުމުގެ ނަމުގައި ކުއްޔަށް ދިނުމަކީ ރާއްޖޭގެ 21 ވިޔަފާރިއަކަށް ލިބޭ ބޮޑު ގެއްލުމެއް ކަމަށް ވިދާޅުވި އެވެ.
ޒަރިޔަންދު ވިދާޅުވީ، އެ ވިޔަފާރިތަކަށް ލިބޭ ގެއްލުމުގެ ބަދަލުގެ ގޮތުގައި މިހާރު ހިސާބުކުރި ކުރުމުން ވެސް 400 މިލިއަނަށް ވުރެ ގިނަ ދިވެހި ރުފިޔާ ދައްކަންޖެހޭ ފަދަ ހާލަތެއް މިހާރު ވެސް މެދުވެރިވެފައިވާ ކަމަށެވެ.
އެހެންކަމުން ރައްޔިތުންނަށް އޮޅޭ ގޮތަށް ރައީސުލްޖުމްހޫރިއްޔާއާއި ހައުސިންގ މިނިސްޓަރާއި ފިނޭންސް މިނިސްޓަރު މިފަދަ ކަންކަމުގައި މައުލޫމާތު ދެއްވުމަކީ، ވެރިން ކުރައްވައިގެން ތިއްބެވި ހުވަޔާއި ޚާއްސަކޮށް ދެ ވަޒީރުން ގާނޫނުއަސާސީގެ 130 ވަނަ މާއްދާއާ އެއްގޮތަށް އަމަލުކުރެއްވުމާ ޚިލާފު ކަމެއް ކަމަށް ވިދާޅުވެ ޒަރިޔަންދު ވަނީ އެކަން ކުށްވެރިކުރައްވާފަ އެވެ.
