މަޖިލީހުގެ ސުޕަރ މެޖޯރިޓީގައި ރަސްކަމެއް ނެތި ރަސްކަލަކަށް

ރައްޔިތުންގެ މަޖިލީހުގެ އިންތިޚާބުގެ ދުވަސްވަރެވެ. މުޅި ސަރުކާރު ނުކުމެ އުޅުނީ މެޖޯރިޓީ ހޯދުމަށެވެ. އެންމެ ބާރަށް ވިދާޅުވީ މެޖޯރިޓީ ނުލިބިއްޖެނަމަ ސަރުކާރު ހިންގަން ދަތިވާނެ ކަމަށެވެ. ރައްޔިތުންގެ ލާބަޔާ މަންފާއަށްޓަކައި ކޮންމެހެންވެސް މަޖިލީހުގެ މެޖޯރިޓީ ބޭނުން ކަމަށް ޚުދު ރައީސް މުއިއްޒު ވިދާޅުވިއެވެ.

އެވާހަކަތައް އަޑު އަހާފައި ރައްޔިތުން ސަރުކާރަށް މެޖޯރިޓީ ދިނީ ތިޔަހެނެއް ނޫނެވެ. އަތްގުޅި ނުކާވަރުގެ ބޮޑު މެޖޯރިޓީއެކެވެ. ސަރުކާރުން ކުރާ ކަމަކަށް އެހެން ބަޔަކަށް ކުޑަވައިއިނގިލިވެސް ހިއްލާ ނުލެވޭ މިންވަރަށެވެ.

ސުވާލަކީ އެ މެޖޯރިޓީއާއެކު ސަރުކާރުން ކަންކުރާން ފެށީ ކިހިނެއް ހެއްޔެވެ. އެމެޖޯރިޓީގެ ބޭނުން ހިފަނީ ކިހިނެއް ހެއްޔެވެ. ފޭސްބުކްގައި މީހަކު ލިޔެފައިވާ އެއްޗަކުން އޭގެ ޖަވާބެއް ރައްޔިތު މީހާ ދީފައިވާތީ ފެނިގެން އެކަމަށް ބަލާލާނަމެވެ. އަދި ހިސާބަކަށް އޭގެ ބައެއް ތަފްސީލަށް ޖެހިލާނަމެވެ. މިރިޕޯޓްގައި  ހިމަނާފައި މިލަނީ އާއްމު މީހަކު ފޭސްބުކްގައި ލިޔެފައިވާ ޚިޔާލީ ސުވާލު ތަކަކާއި އޭނާ ދީފައިވާ ޖަވާބު ތަކަށެވެ.

ޕީއެންސީ މީހާ: "ރައީސް، މެންބަރުން ޕާޓީއިން ވަކި ވާން އުޅެނީ"

ރައީސް: " ނުވެވޭ ގޮތް ހަދާ ވަކި ވެއްޖެނަމަ ގޮނޑި ގެއްލޭ ގޮތަށް އިސްލާހު ކޮށްލާ، އަދި ކޮންމެ މަހަކު 50 ހާސް ދޭނެ ކަމަށް ބުނޭ"

މަޖިލީހުގެ މެންބަރުންނަކަށް މިހާރު އެމީހުންގެ ފުރިހަމަ މިނިވަންކަން ނެތެވެ. އެވެރިން އަމިއްލައަށް އެބާރު ދޫކޮށްލުމުގެ ސަބަބުން އެމީހުންގެ ކޮންޓްރޯލް މިހާރު އެއޮތީ ޕާޓީތަކުގެ ފިޔަވަޅު އަޅާކޮމެޓީގެ އަތްމަތީގައެވެ. ޕާޓީން ވަކިކޮށްފިނަމަ އެ މެންބަރެއްގެ ގޮނޑި ގެއްލޭނެއެވެ.

މީގެ އިތުރުން ޕީއެންސީގެ މެންބަރުންނަށް ރައީސް މުއިއްޒު ދެމުންދިޔަ ފައިސާއަކީ އެވެރިންނަށް ލިބުނު ހަދިޔާއެކެވެ. އޭސީސީން ބުނާގޮތުން އެއީ ރިޝްވަތެއް ނޫނެވެ.

ޕީއެންސީ މީހާ: " ރައީސް، މީޑިޔާ ތަކުން ސަރުކާރުގެ ސިއްރުތަށް ފަޟީހަތް ކުރަނީ"

ރައީސް:" މީޑިޔާ ބަންދު ކޮށްލާ، ޖަލުހުކުމެއް އަންނަ ކުށަކަށްހަދާ"

މީޑިޔާތައް ކޮންޓްރޯލް ކޮށްފިއެވެ. ސަރުކާރާ ދެކޮޅު ވާހަކަތައް ދައްކާ މީޑިޔާތަކަށް ވަރުގަދަ ފިޔަވަޅުތަކެއް އެޅިދާނެ ގޮތް އެވަނީ ހަދާފައެވެ. ދައްކާ ވާހަކައަކުން ލިޔެވޭ އެއްޗަކުން އެނޫސްވެރިއަކު ޖަލަށް ދާން ޖެހިދާނެކަން އެވަނީ މިހާރު ކަށަވަރު ވެފައެވެ. މީޑިޔާ އޮގަނައިޒޭޝަނަކަށް ވަދެ އެތަނުގެ ތަކެތި އެވަނީ ގެންގޮސްފައެވެ. މީޑިޔާގެ ލައިސަންސް އަތުލެވޭވަރަށް ގާނޫން އެވަނީ ބަދަލުކޮށްފައެވެ. މީގެ އިތުރުން 60 ހަކަށް މީޑިއާއަށް ސީދާ ސަރުކާރުން ފައިސާ ދީގެން ސަރުކާރުން ބޭނުންވާހާ ޕްރޮޕެގެންޑާއެއް އެދަނީ ފަތުރަމުންނެވެ. ޚާއްޞަކޮށް ދައުލަތުގެ މީޑިޔާ އެވަނީ ސަރުކާރުގެ ޖަގަހައަކަށް ވެފައެވެ.

ޕީއެންސީ މީހާ: " ރައީސް، އެއްކަލަ އޮފީހުގެ ތެރޭ ރައީސް ހިންގިކަންތަކުގެ ވާހަކަ ދައްކަނީ"

ރައީސް: "ގެގް އޯޑަރ އެއް ނެރިލާ ޖަލަށް ލާ"

ރާއްޖޭގައި ފުރަތަމަ ފަހަރަށް އެވަނީ ވަކި ވާހަކައެއް ދައްކައިފިނަމަ ޖަލަށްލައި އަދަބު ދެވޭނޭ ގޮތައް ވަރުގަދަ ކޯޓު އަމުރެއް ނެރެފައެވެ. ތާއަބަދަށް ދިގު ދެމިގެން ދާފަދަ "ގެގް އޯޑަރެއް" ނެރެފައެވެ. ބައެއް ވާހަކަ އެކަމުގެ ސަބަބުން ދެއްކުން އެވަނީ މަނާ ވެފައެވެ. ޚާއްޞަކޮށް ސީދާ ވަކި ވާހަކައެއް ދެއްކުން އެއީ މުޅިން މަނާ ކަމެކެވެ. ގެގް އޯޑަރު އަރާ ހަމަ ކުރާނެތީއެވެ.

ޕީއެންސީ މީހާ:" ރައީސް، ރަށްރަށުގެ ބޮޑެތި ބިން ހޯދަން އުދަގޫތަކެއް ހުރޭ"

ރައީސް: "ލާމަރުކަޒީ ޤާނޫނު އޮޅާލާ ސަރުކާރުގެ ބާރު ދަށަށް ހުރިހާ އެއްޗެއް ނަގާ"

މަޖިލީހުގެ މެޖޯރިޓީ ދިނުމުން ކަންވީ ގޮތުގެ ސަބަބުން ކައުންސިލްގެ މެޖޯރިޓީއެއް ރައްޔިތުން ސަރުކާރަކަށް ނުދިނެވެ. ގިނަ ކައުންސިލްތަކަށް ހޮވުނީ ސަރުކާރުން ކުރާހާ ކަމަކަށް އާނބަސް ބުނާނޭ މީހުންނެއް ނޫނެވެ. ނަތީޖާއެއްގެ ގޮތުން ސަރުކާރަކަށް ކައުންސިލްތަކަކަށް ހަންފެތުރޭނޭ ގޮތެއް ނުވިއެވެ. އެކަމާހުރެ ފުރަތަމަ މަދުކޮށްލީ ކައުންސިކލްތަކަށް ދިނުމަށް ޤާނޫނުން މަޖްބޫރުކުރި ބްލޮކް ގްރާންޓެވެ. މާލީގޮތުން ކައުންސިލްތަކުގެ ވަރަ ކޮށާލުމެވެ. އިތުރަށް މާލީ ތަނަވަސްކަން ހޯދަފާނެތީ ކައުންސިލްތަކުގެ ބިންތައް ސަރުކާރަށް ނެގޭނޭ ބާރު ޤާނޫނަށް ބަދަލު ގެނެސްގެން ސަރުކާރުން އެވަނީ ނަގާފައެވެ.  ބިންތައް އަތުލުމުގެ ފެށުމުގެ ގޮތުން ރަސްމިއްޔާތެއް ނުބޭއްވިއަސް ފުރަތަމަ އެކަހާލީ މާލޭ ސިޓީ ކައުންސިލްގެ ދަށުގައިވާ 14 ބިމެކެވެ.

ޕީއެންސީ މީހާ: "ރައީސް، ސަރުކާރާއި އިދިކޮޅަށް ޕެޓިޝަން ލަނީ"

ރައީސް: "ގަވައިދު އިސްލާހުކޮށް ލާ ޕެޓިޝަން އަކާއި ދެކޮޅަށް ސަރުކާރުން ޕެޓިޝަން ލެވޭ ގޮތަށް ހަދާ ހުރިހާ ބޮޓުން ލައްވާ ސޮއެ ހޯދާ"

ސަރުކާރު ޖަވާބު ދާރީ ކުރުވުމަށް އާއްމު ރައްޔިތު މީހާއަށް ދީފައިވާ އެއްބާރަކީ ސަރުކާރުތަކުން ކުރާ ކަންކަމާ ގުޅިގެން ޕެޓިޝަން ހުށަހެޅުމެވެ. ރައްޔިތުންގެ މަޖިލީހަށް އެފަދަ ކަންބޮޑުވުންތަކާއެކު އާއްމުންނަށް ހުށަހެޅޭވަރުވީ ދެތިން ޕެޓިޝަނެކެވެ. ވަގުތުން ޕެޓިޝަން ހުށަހެޅުމުން އަމަލު ކުރާނެގޮތް އިސްލާހު ކުރިއެވެ. އެއްކަމެއްގައި އެއް ޕެޓިޝަނަށްވުރެ ގިނަ ޕެޓިޝަން ހުށެހެޅޭގޮތް ހެދިއެވެ. ހަމަ އެއާއެކު ހުށަހަޅާފައިވާ ޕެޓިޝަނަށް ސަރުކާރުން ދިފާއުގައި ޕެޓިޝަނެއް ހުށަހަޅާ ސަރުކާރުގެ ކުންފުނިތަކާއި ސަރުކާރުން ފައިސާދީފައި ތިބޭ މީހުން ލައްވާ އެޕެޓިޝަނަށް ސޮއި ގިނަކުރުމުގެ ބާރު އޮއިވަރެއް ދަންމާލިއެވެ.

ޕީއެންސީ މީހާ: "ރައީސް، ޕާޓީ އަށް މެންބަރުން އިތުރު ކުރަން ގޮތެއް ހަދަން ޖެހޭ"

ރައީސް: "ސަރުކާރު ކުންފުނިތަކުގެ ހުރިހާ މުއައްޒަފުންނަށް ވަޒީފާގެ ބިރު ދައްކާ ސޮއެ ކުރުވާ"

ސަރުކާރު ހިންގާ ޕާޓީން އެވަނީ ލައްކައެއްހާ މީހުން އެޕާޓީއަށް ހަމަ ކުރުމަށް ހިފާފައެވެ. އެކަމަށްޓަކައި ހިންގާ ކެންޕޭނަކީ މަޖްބޫރު ކެންޕޭނެކެވެ. ވަޒީފާގެ ބިރެވެ. ވަޒީފާ ބޭނުންނަމަ ނުވަތަ ވަޒީފާގައި ހުންނަން ބޭނުންނަމަ ޕީއެންސީއަށް ވަނުން ނޫން ގޮތެއް ނެތްކަމުގެ މަޖްބޫރެވެ. ވަކި ކުންފުންޏެއް ނޫނެވެ. ސަރުކާރު ހިއްސާވާ ހުރިހާ ކުންފުންޏަކުންވެސް މަޖްބޫރުކުރަމުން އެދަނީ ޕީއެންސީއަށް ވަނުމަށެވެ. އަދި ޕީއެންސީއަށް ވަންކަމުގެ ސްކްރީން ޝޮޓްވެސް ހުށަހެޅުމަށެވެ.

ޕީއެންސީ މީހާ: "ރައީސް، ބުލެކްމާކެޓް ރޭޓް ހާމަ ކުރާތީ ޑޮލަރު ނެތް ކަން އިނގޭ:

ރައީސް" ބުލެކް ރޭޓް ހާމަ ކުރުން ކުށަކަށް ހަދާ ހަރުކަށި އަދަބު ދީ"

މިހާރު ޑޮލަރު ރޭޓު ހުރިވަރެއް އެއްވެސް މީހަކަށް ނުބުނެވޭނެއެވެ. ނޫސްތަކުގައި އެވާހަކައެއް ނުދެއްކޭނެއެވެ. ބޭރު ފައިސާ މާރުކުރާ ފަރާތްތަކުން އޭގެ އިޝްތިހާރެއްވެސް ނުކުރެވޭނެއެވެ. ސަރުކާރުން ކަނޑައަޅާފައިވާ ރޭޓަށްވުރެ ބޮޑު އަގަކަށް ޑޮލަރު ލިބުނަސް އެވާހަކަ ބުނެލާއިރަށް ބޮޑެތި ޖޫރިމަނާތަކެއް ދައްކަން ޖެހިދާނެ ކަމަށް އެވަނީ ކަނޑައަޅާފައެވެ.

ޕީއެންސީމީހާ "ރައީސް، އީގަލްސްހިލްސް އަށް ތާއީދު ހޯދަން ޖެހޭ "

ރައީސް: ސަރުކާރު ހަރަދުގައި ބޮޓު މީޑިޔާތަށް ޔޫއޭއީއަށް ފޮނުވާލާ"

ސަރުކާރުން ފައިސާ ދީގެން ހިންގާ މީޑިޔާތަކުގެ ބަޔަކު އެވަނީ ދުބާއީގައެވެ. އަގުބޮޑު ހޮޓާ ތަކުގައެވެ. ދައްކަމުން އެދަނީ ރަސްމާލޭގެ 500 ހެކްޓަރުގެ ބިން ސަރުކާރުން ދޭން އުޅޭ އީގަލް ހިލްސްގެ ކުރިއެރުންތަކުގެ ވާހަކައެވެ. އެވެރިން ކުރާ މަސައްކަތްތަކާއި އީގަލް ހިލްސްއިން ތަރައްގީކުރާ އަދި ކޮށްފައިވާ ތަންތަނުގެ ވާހައެވެ. ސީދާ އީގަލް ހިލްސްއާއި އައްބާރުގެ ޕްރޮމޯޝަނެވެ. ޚުދު ސަރުކާރުގެ ތަރުޖަމާން މުހައްމަދު ހުސައިން ޝަރީފްވެސް އެވަނީ އެކަމުގެ ޕްރޮމޯޝަންގެ ޓިކްޓޮކްތައް ކުޅުއްވަން ފަށްޓަވާފައެވެ.

ޕީއެންސީ މީހާ: "ރައީސް، ރަސްމާލެ ޔަހޫދީންނަށް ދޭ ވާހަކަ ދައްކަނީ"

 ރައީސް: "ޔަހޫދީންނަށް ހިމާޔަތް ދޭން ދީން ތަކާ ބެހެންޏާ ހަރުކަށި އަދަބު ދެވޭ ގޮތަށް ޤާނޫނު އިސްލާހު ކޮށްލާ"

އެއްވެސް ދީނަކާ ދެކޮޅު ވާހަކަ ނުދެއްކޭ ގޮތަށް ޤާނޫނަށް އިސްލާހު ގެނައުމަށް މަޖިލީހަށް އެވަނީ ހުށަހަޅާފައެވެ. ރަސްމާލޭގައި ވަޒަންވެރި ކުރުވަން އުޅެނީ ޔަހޫދީ ޒައިނިސްޓުން ކަމުގެ ވާހަކަ އާއްމުން ދައްކާތީއެވެ. އަލް އައްބާރަކީ ޔަހޫދީ ޒައިނިސްޓުންގެ ގާތް އެކުވެރިއެއް ކަމާ އެމީހުންނަށް ވާގިވެރިވާ މީހެއްކަމަށް ދައްކާ އަޑު ގަދަވުމުންނެވެ.

ކޮންމެއަކަސް މިއީ މިއަދުގެ ހާލަތެވެ. މަޖިލީހުގެ ސުޕަރ މެޖޯރިޓީއާއެކު ސަރުކާރުން ކަންކުރާ ގޮތެވެ. ރައީސުލް ޖުމްހޫރިއްޔާ ހިތުހުރި ގޮތަކަށް ވެރިކަން ކުރެއްވުމަށް އެމަޖިލީސް ބޭނުން ކުރައްވާ ގޮތެވެ. ރައްޔިތުންނަށް ކުރެވޭނެ ކަމެއް ނެތްކަން އަންގައިދޭ ވަރުގަދަ ދިރިހުރި މިސާލެކެވެ. ރަސްކަލަކަސް ނުވިއަސް ހިންގާ ރަސްކަމެކެވެ.