ދީނީ އަދި އިގުތިސާދީ ކުށްތައް ހިމަނައި ގާނޫނުލްއުގޫބާތަށް ހުށަހެޅި އިސްލާހުގެ ބިލު، ބުދަ ދުވަހުގެ ޖަލްސާގެ އެޖެންޑާއިން ވެސް އުނިކޮށްފި
27 އޮކްޓޯބަރު 2026 | އަންގާރަ 16:32ގަތުލުއާންމު ހިންގުމާއި އިގުތިސާދަށް ގެއްލުންދޭ އަމަލުތައް ޖިނާއީ ކުށަކަށް ހެދުމަށް ގާނޫނުލްއުގޫބާތަށް ހުށަހެޅި އިސްލާހު، ރައްޔިތުންގެ މަޖިލީހުގެ އެޖެންޑާއިން ދެވަނަ ފަހަރަށް ވަނީ އުނިކޮށްފައި. މާފަންނު ދެކުނު ދާއިރާގެ މެންބަރު ހުށަހެޅުއްވި މި ބިލުގައި ވަކި ނަސްލަކަށް ނުވަތަ ދީނަކަށް އަމާޒުކޮށް ގެއްލުންދިނުން ކުށަކަށް ހެދުމަށް ހިމަނާފައިވޭ. މީގެ އިތުރުން މުސާރަތައް މުރާޖައާކުރުމާއި ބައެއް ގަރާރުތަކުގެ މަސައްކަތް މަޖިލީހުގައި ވަނީ ތާވަލުކޮށްފައި
20 ވަނަ ރައްޔިތުންގެ މަޖިލީހުގެ ޖަލްސާއެއްގެ ތެރެއިން | މަޖިލިސް
ގާނޫނުލްއުގޫބާތަށް ބަދަލު ގެނެސް، ވަކި ދީނެއްގެ ބަޔަކަށް އަމާޒުކޮށް ހިންގާ އަމަލުތަކާއި ގައުމުގެ އިގުތިސާދަށް ގެއްލުންދޭ ކަންކަން ޖިނާއީ ކުށަކަށް ހެދުމަށް ރައްޔިތުންގެ މަޖިލީހަށް ހުށަހެޅި ބިލުގެ މަސައްކަތް ބުދަ ދުވަހުގެ ޖަލްސާ އިން ވެސް އުނިކޮށްފި އެވެ.
ސަރުކާރުގެ ފަރާތުން މި ބިލު ހުށަހެޅުއްވީ ޕީއެންސީގެ މާފަންނު ދެކުނު ދާއިރާގެ މެންބަރު އަބްދުﷲ ރިފާއު އެވެ.
ބިލުގެ މައިގަނޑު މަގުސަދަކީ، ގަތުލުއާންމު ހުއްޓުވުމާއި އެފަދަ އަމަލުތަކަށް އަދަބު ކަނޑައެޅުމާ ގުޅޭގޮތުން ރާއްޖެއިން ބައިވެރިވެފައިވާ ބައިނަލްއަގުވާމީ މުއާހަދާއާ އެއްގޮތްވާ ގޮތުގެ މަތިން ގަތުލުއާންމު ހިންގުމަކީ ޖިނާއީ ބޮޑު ކުށެއްގެ ގޮތުގައި ގާނޫނުގައި ކަނޑައެޅުމެވެ. މި ބިލުގެ ފުރަތަމަ ކިޔުން އެންމެ ފުރަތަމަ ތާވަލުކުރީ އަންގާރަ ދުވަހަށެވެ. ނަމަވެސް އެ ދުވަހުގެ އެޖެންޑާއަށް ފަހުން ބަދަލު ގެނެސް ބިލުގެ މަސައްކަތް ވަނީ ބޭރުކޮށްލައިފަ އެވެ.
އެއަށްފަހު ބުދަ ދުވަހުގެ ޖަލްސާއަށް އަލުން ތާވަލުކުރި ނަމަވެސް، ދެވަނަ ފަހަރަށް ވެސް ވަނީ އެޖެންޑާ އިން އުނިކޮށްފަ އެވެ.
ރިފާއު ހުށަހެޅުއްވި އިސްލާހުގައި ބަޔާންކޮށްފައި ވަނީ ގާނޫނުލްއުގޫބާތުގެ 140 ވަނަ ބާބުގެ ފަހަތަށް ގަތުލުއާންމާ ގުޅޭ މާއްދާއެއް އިތުރުކުރުމަށެވެ.
އެގޮތުން ވަކި ގައުމަކަށް، ދަރިފަސްކޮޅަކަށް، ނަސްލަކަށް ނުވަތަ ދީނަކަށް ނިސްބަތްވާ ޖަމާއަތަކަށް އަމާޒުކޮށް ގެއްލުންދިނުމަކީ ކުށެއްގެ ގޮތުގައި ކަނޑައަޅަން ވަނީ ހިމަނައިފަ އެވެ. އޭގެ ތެރޭގައި އެފަދަ ޖަމާއަތެއްގެ ބަޔަކަށް ޖިސްމާނީ ގޮތުންނާއި ނަފުސާނީ ގޮތުން ބޮޑެތި އަނިޔާތައް ދިނުން ފަދަ އަމަލުތައް ހިމެނެ އެވެ.
މީގެއިތުރުން، ދައުލަތުގެ އިގުތިސާދަށް ބޮޑު ގެއްލުމެއް ލިބިދާނެކަން އެނގިތިބެ ނުވަތަ އެކަމަށް ފަރުވާލެއް ނުބަހައްޓައި ހިންގާ ހަތަރު އަމަލެއް ޖިނާއީ ކުށެއްގެ ގޮތުގައި ހިމެނުމަށް ވެސް އެ ބިލުގައި ހިމަނައިފައިވެ އެވެ.
މި ބިލު ހުށަހަޅައިފައިވަނީ ރަސްމާލޭގެ ބޮޑު ސަރަހައްދެއް އީގަލް ހިލްސް ކުންފުންޏަށް ދާއިމީކޮށް ދީފައިވާ ކަމަށް ބުނާ މައްސަލައިގައި އާންމުންގެ ފާޑުކިޔުން ބޮޑުވެ، ކަންބޮޑުވުން ފާޅުކުރަމުންދާ ދަނޑިވަޅެއްގަ އެވެ.
މި ބިލުގެ އިތުރުން ވެސް މުހިންމު ބައެއް ކަންކަން ބުދަ ދުވަހުގެ މަޖިލިސް ޖަލްސާއަށް ވަނީ އެޖެންޑާކޮށްފަ އެވެ.
އެގޮތުން، އެއްވެސް އަސާސެއް ނެތް ތުހުމަތުތަކެއްގެ މައްޗަށް ބިނާކޮށް ސުޕްރީމް ކޯޓުގެ ތިން ފަނޑިޔާރަކު މަގާމުން ވަކިކުރި މައްސަލައިގައި މަޖިލިސް މެންބަރުން ދެކެވަޑައިގަންނަވާ ގޮތް ދެނެގަތުމަށް ގަލޮޅު އުތުރު ދާއިރާގެ މެންބަރު މުހައްމަދު އިބްރާހީމް ހުށަހެޅުއްވި ގަރާރާއި، މާލޭ ސިޓީ ކައުންސިލްގެ އިހުތިސާސްގައި ހިމެނޭ 14 ބިމެއް ވަކިކޮށް ދައުލަތުގެ މިލްކިއްޔާތަށް ބަދަލުކުރަން ސަރުކާރުން ނިންމި ނިންމުމާމެދު މެންބަރުން ދެކޭގޮތް ދެނެގަތުމަށް ގަލޮޅު ދެކުނު ދާއިރާގެ މެންބަރު މީކާއީލު އަހުމަދު ނަސީމް ހުށަހެޅުއްވި ގަރާރުގެ ފުރަތަމަ ކިޔުން އިއްވުން ހިމެނެ އެވެ.
ހަމައެއާއެކު، ސަރުކާރުގެ ފަރާތުން ހުރާ ދާއިރާގެ މެންބަރު ޑރ. އަނާރާ ނައީމް ހުށަހެޅުއްވި ތައުލީމުގެ ގާނޫނަށް އިސްލާހު ގެނައުމުގެ ބިލުގެ ފުރަތަމަ ކިޔުން އިއްވުން ވެސް ވަނީ އެޖެންޑާކޮށްފަ އެވެ.
މީގެ އިތުރުން ގާނޫނުއަސާސީގެ 102 ވަނަ މާއްދާގެ ދަށުން މަޖިލީހުން ކަނޑައަޅަންޖެހޭ މުސާރައާއި އިނާޔަތްތަކުގެ ތެރެއިން ރައްޔިތުންގެ މަޖިލީހުގެ ރައީސްގެ މުސާރައާއި އިނާޔަތްތަކާއި، ވަޒީރުންގެ ކާރުކޮޅުގެ އިނާޔަތްތަކާއި، ރަށު ކައުންސިލަރުންގެ އިނާޔަތްތައް މުރާޖައާކުރުމާ ގުޅޭގޮތުންނާއި، އުއްތަމަފަނޑިޔާރުގެ މުސާރައާއި އިނާޔަތްތައް މުރާޖައާކުރުމާ ގުޅޭގޮތުން މާލިއްޔަތު ކޮމިޓީން ދިރާސާކޮށް ނިންމި ގޮތުގެ ރިޕޯޓުތަކަށް ބަހުސްކުރުން ވެސް ވަނީ އެޖެންޑާގައި ހިމަނައިފަ އެވެ.
