ބޭނުން ގޮތަކަށް މޮޑޭ ފުއްގަނޑަކަށް ގައުމުގެ ޓެކްސް ނިޒާމް ހެދީމަ އޭގެ ގެއްލުން ކުރާނީ މުޅި ގައުމުގެ އިގްތިސާދަށާއި ރައްޔިތުންނަށް: މެންބަރު އަމީން
27 އޮކްޓޯބަރު 2026 | އަންގާރަ 12:38ޓެކްސްގެ ނިޒާމަށް ކުއްލި ބަދަލުތައް ގެނައުމަކީ އިގްތިސާދީ ރޭވުންތެރިކަމެއް ނެތްކަން ހާމަވާ ކަމެއް ކަމަށާއި، މީގެ ސަބަބުން އިންވެސްޓަރުންގެ އިތުބާރު ގެއްލިދާނެ ކަމަށް މެންބަރު އަމީން ފައިސަލް ވިދާޅުވެއްޖެ. މީގެ އިތުރުން، ޓެކްސް މައްސަލަތައް އިސްތިއުނާފު ކުރުމުގެ ކުރިން ފައިސާ ދައްކަންޖެހޭ ގޮތަށް އޮތުމުން ވިޔަފާރިތަކަށް ބޮޑެތި ގެއްލުންތަކެއް ލިބިދާނެ ކަމުގެ ކަންބޮޑުވުން އޭނާ ފާޅުކުރެއްވި
ރައްޔިތުންގެ މަޖިލީހުގެ ކަނޑިތީމު ދާއިރާގެ މެންބަރު އަމީން ފައިސަލް | ރައްޔިތުންގެ މަޖިލިސް
ބޭނުން ގޮތަކަށް މޮޑޭ ފުއްގަނޑަކަށް ގައުމުގެ ޓެކްސް ނިޒާމް ހެދުމުން އޭގެ ގެއްލުން ކުރާނީ މުޅި ގައުމުގެ އިގްތިސާދަށާއި ރައްޔިތުންނަށް ކަމަށް ރައްޔިތުންގެ މަޖިލީހުގެ ކަނޑިތީމު ދާއިރާގެ މެންބަރު އަމީން ފައިސަލް ވިދާޅުވެއްޖެ އެވެ.
އަންގާރަ ދުވަހުގެ ރައްޔިތުންގެ މަޖިލީހުގެ ޖަލްސާގައި ޓެކްސް ނެގުމާބެހޭ އިދާރީ ގާނޫނަށް އިސްލާހު ގެނައުމުގެ ބިލަށް ބަހުސް ކުރައްވަމުން މެންބަރު އަމީން ވިދާޅުވީ ކުއްލި ކުއްލިއަށް ޓެކްސްގެ ނިޒާމަށް ބަދަލު ގެނައުމުން ދޭހަވަނީ މިސަރުކާރުގައި އިގްތިސާދު ހަމައަކަށް އެޅުވުމުގައި އެއްވެސް ކަހަލަ ރޭވުންތެރިކަމެއް ނެތް ކަން ކަމަށެވެ.
އެގޮތުން ސަރުކާރުގެ އިގްތިސާދީ ސިޔާސަތު އެހާ ދޯހަޅިވެގެން ދިޔުމުން މީރާއަށް އޮތް އިތުބާރު ގެއްލިގެންދާ ކަމަށާއި ދެ ދުވަހުން އެއް ދުވަހު އިސްލާހުތައް ގެންނަން ވެއްޖެ ކަމުގައި ވާނަމަ ޓެކްސްގެ ނިޒާމާ މެދު ރައްޔިތުންނާއި އިންވެސްޓަރުންގެ މެދުގައި އޮތް އިތުބާރު ގެއްލިގެން ދާނެ ކަމަށް މެންބަރު އަމީން ވިދާޅުވި އެވެ. މީގެ ސަބަބުން ގައުމުގެ އިގްތިސާދަށް ނުރައްކަލަކަށް ވެގެން ދާނެ ކަން މެންބަރު އަމީން ފާހަގަކުރެއްވި އެވެ.
ހަމައެއާއެކު، މި ބިލުގެ އާމްދަނީ އިން ޓެކްސް ނެގުމުގެ ގާނޫނުގެ ގާނޫނު ނަންބަރު 25 އޮބްލިކް 2019 ގެ 66 ވަނަ މާއްދާ އަދި 67 ވަނަ މާއްދާގައި ބަޔާންކުރާ މުއާމަލާތްތަކާއި މުދަލާއި ހިދުމަތުގެ އަގުން ޓެކްސް ނެގުމުގެ ގާނޫނުގެ ދަށުން ގުޅުން ހުރި ފަރާތްތަކަށް ކުރާ މުއާމަލާތްތަކުގައި އިސްތިއުނާފް ކުރުމުގެ އަދަދު 100 އިންސައްތަ ދައްކަން ޖެހޭ ކަމަށް އޮތުމުން މެންބަރު އަމީން ވަނީ ކަންބޮޑުވުންފާޅު ކުރައްވާފަ އެވެ.
އަޅުގަނޑުމެންގެ ޝަރުއީ ނިޒާމުގައި މި މައްސަލަތައް ދިގުލައިގެން ދިޔުމާއި މިގޮތަށް މިހުރި ކަންކަމަށް ބަލާލާއިރުގައި މިއީ ކިހާ ވަރެއްގެ ގެއްލުމެއް މިކަމާއި ގުޅުން ހުރި ނޫނީ ޓްރައިބިއުނަލްއަށްދާ ވިޔަފާރިތަކަށް އެ ކުޑަވިޔަސް ބޮޑު ވިޔަސް މި ކިހާވަރެއްގެ ގެއްލުމަކާއި އެފަރާތްތަކާއި އިންސާފު ލިބޭ އިރުގައި ކުރިމަތިލާން ޖެހިދާނެ ކަމެއްތޯ އިއްޒަތްތެރި ރައީސް މިއީ ހަމަ އަޅުގަނޑުމެން ކޮމިޓީ މަރުހަލާގައި ވިސްނާލަން ވަރަށް ރަނގަޅު ކަމެއްއަމީން ފައިސަލް
މީގެ އިތުރުން، ޓެކްސްގެ ސިޔާސަތަކީ ގައުމެއްގައި އެންމެ ހަރުދަނާވާން ޖެހޭނެ ސިޔާސަތުކަން ފާހަގަކުރައްވައި މެންބަރު އަމީން ވިދާޅުވީ ކުއްލި ކުއްލި އަށް ނުވަތަ ބޭނުން ގޮތަކަށް މޮޑޭ ފުއްގަނޑަކަށް ގައުމެއްގެ ޓެކްސް ނިޒާމް ހެދުމުން އޭގެ ގެއްލުން ކުރާނީ މުޅި ގައުމުގެ އިގްތިސާދަށް ކަމަށެވެ. އަދި އޭގެ އަސަރު ކުރާނީ ދިވެހި ރައްޔިތުންނަށް ކަމަށް މެންބަރު އަމީން ވިދާޅުވި އެވެ.
