ވިއްސާރައިގައި އަތޮޅުތަކަށް ބޮޑެތި ގެއްލުންތަކެއް: ހާލަތު ބަލައި އެހީތެރިކަން ފޯރުކޮށްދިނުމުގެ މަސައްކަތް އެންޑީއެމްއޭ އިން ކުރަނީ

ރާއްޖެއަށް މިހާރު ކުރަމުންދާ ވިއްސާރައިގައި އެކި ރަށްރަށަށް ބޮޑެތި ގެއްލުންތަކެއް ލިބެމުންދާއިރު، ހާލަތު ބަލައި އެހީތެރިކަން ފޯރުކޮށްދިނުމުގެ މަސައްކަތްތައް ނޭޝަނަލް ޑިޒާސްޓަރ މެނޭޖްމަންޓް އޮތޯރިޓީ (އެންޑީއެމްއޭ) އިން ބުނެފި އެވެ.

މިކަމުގެ އެންމެ ފަހުގެ މައުލޫމާތު ހިއްސާކޮށް އެ އޮތޯރިޓީ އިން ބުނީ، ކުޅުދުއްފުށި ސިޓީގައި 7 ޕަންޕު ބޭނުންކޮށްގެން ފެން ހިންދުމުގެ މަސައްކަތް ކުރަމުންދާއިރު، ފެންބޮޑުވުމުގެ ސަބަބުން 18 ގެއަކުން 140 އަށްވުރެ ގިނަ މީހުން 2 ސްކޫލަކަށް ވަގުތީގޮތުން ބަދަލުކުރުމުގެ މަސައްކަތްކޮށްފައިވާ ކަމަށެވެ. އަދި ހދ. ނޮޅިވަރަމްގެ 95 އިންސައްތަ ގޭގައި ފެންބޮޑުވެ، މީހުން އެހެން ގެތަކަށް ބަދަލުވަމުންދާއިރު، ފުލުހުންގެ އެހީތެރިކަމާއެކު 1 ޕަންޕު ބޭނުންކޮށްގެން ފެން ހިންދުމުގެ މަސައްކަތްކުރަމުންދާ ކަމަށް ވެސް އެންޑީއެމްއޭ އިން ބުނެ އެވެ. 

Advertisement

ނޮޅިވަރަންފަރުގައި ހާލަތު ގޯސްވި ތަންތަނުގެ މީހުން އަމިއްލައަށް އެހެން ގެތަކަށް ބަދަލުވެފައިވާއިރު، އެ ރަށުގައި 2 ޕަންޕުގެ އެހީގައި ފެން ހިންދުމުގެ މަސައްކަތް ކުރިއަށްދާ ކަމަށް ވެސް އެންޑީއެމްއޭ އިން ވަނީ ބުނެފަ އެވެ. އަދި ހދ. އަތޮޅުގެ އެހެން ރަށްރަށަށް ބަލާއިރު، ނެއްލައިދޫގެ 10 ވަރަކަށް ގެއަށް ފެންވަދެފައިވީ ނަމަވެސް މީހުން ބަދަލުކުރަންޖެހޭ ހާލަތަކަށް ގޮސްފައިނުވާ ކަމަށާއި ކުމުންދޫގެ 3 ގެއަކަށް ފެންވަދެ ކާޑުގެ ބާވަތްތައް ހަލާކުވެފައިވެ އެވެ. އަދި އެރަށުގައި ވިއްސާރަ އަލިކޮށް އަވިދިނުމާ ގުޅިގެން މިހާރު ހާލަތު ވަނީ ރަނގަޅުވެފައި ކަމަށް އެ އޮތޯރިޓީ އިން ބުނެ އެވެ.

ވައިކަރަދޫގައި ރަށުތެރޭގައި ފެންބޮޑުވެ ދަނޑުބިންތަކަށް ބޮޑެތި ގެއްލުންތަކެއް ވެފައިވީ ނަމަވެސް އެއްވެސް ގެއަކަށް ގެއްލުމެއް ވެފައެއް ނުވެ އެވެ. ނައިވަދޫގައި ފެން ހިންދުމުގެ މަސައްކަތް ކުރަމުންދާއިރު، ފިނޭގައި ޕަންޕުގެ އެހީގައި ފެން ވަނީ ހިންދާފަ އެވެ. ކުރިނބީގެ ދެ ސަރަހައްދެއްގައި ފެންބޮޑުވި ނަމަވެސް، ނައިވަދޫ، ފިނޭ އަދި ކުރިނބީގެ އެއްވެސް ގެއަކަށް ގެއްލުމެއް ލިބިފައެއް ނުވެ އެވެ. އަދި ހަނިމާދޫ އަދި މަކުނުދޫގެ ހާލަތު ވެސް ރަނގަޅު ކަމަށް އެންޑީއެމްއޭ އިން ވަނީ ބުނެފަ އެވެ.

ހއ. އަތޮޅުގެ ހާލަތަށް ބަލާއިރު، ފިއްލަދޫ، ކެލާ އަދި މާރަންދޫގައި ބޮޑުވި ފެންގަނޑު ވަނީ މޫދަށް ކޯރު ކަނޑައިގެން ހިންދާފަ އެވެ. ކެލާ އަދި މާރަންދޫގެ 1 ގެއަށް ފެންވަދެފައިވީ ނަމަވެސް ބޮޑު ގެއްލުމެއް ލިބިފައެއް ނުވެ އެވެ. ދިއްދޫ އަދި އިހަވަންދޫގެ ފެންބޮޑުވާ ސަރަހައްދުތަކުގައި ހުރި ގެތަކުގައި ރައްކާތެރިކަމުގެ ފިޔަވަޅެއްގެ ގޮތުން ވެލިބަސްތާ ޖަހާފައިވާއިރު، ދިއްދޫގެ 1 ގެއަކަށް ފެން ވަދެގެން ވަނީ ރިޕޯޓްކޮށްފަ އެވެ. ތަކަންދޫގައި ފެން ހިންދުމަށްޓަކައި ކާނު ކޮނުމުގެ މަސައްކަތް ކުރަމުންދާއިރު، ބުރާސްފަތި ދުވަހުގެރޭ ފެންވަދެ ގެއްލުންވި ގެތަކުގެ އެސެސްމަންޓް ހެދުމުގެ މަސައްކަތް ކުރަމުންދާ ކަމަށް އެންޑީއެމްއޭ އިން ވަނީ ބުނެފަ އެވެ.

އޭގެ އިތުރުން ބާރަށް، ހޯރަފުށި، މޮޅަދޫ، މުރައިދޫ، އުލިގަން، އުތީމު އަދި ވަށަފަރުގެ މަގުތަކުގައި ފެންހެދިފައި ވީނަމަވެސް، އެއްވެސް ގެއަކަށް ގެއްލުމެއް ލިބިފައިނުވާތީ އެ ރަށްރަށުގެ އާންމު ހާލަތު ރަނގަޅު ކަމަށް އެ އޮތޯރިޓީ އިން ބުނެފައިވެ އެވެ. ޅ. ނައިފަރުގެ ހާލަތަށް ބަލާއިރު، އެ ރަށުގެ 16 ގެއަކަށް ފެންވަދެފައިވާއިރު، އޭގެ ތެރެއިން 2 ގެއަކުން މީހުން ވަނީ ބަދަލުކޮށްފަ އެވެ. މި ވިއްސާރައިގައި ހާލުގައި ޖެހުނު ފަރާތްތަކަށް 3 ދުވަހުގެ ކެއުމާއި ބޯހިޔާވަހިކަން ފޯރުކޮށްދިނުމުގެ މަސައްކަތް ކަމާބެހޭ އޮތޯރިޓީ އާއި ކައުންސިލް މެދުވެރިކޮށް ކުރަމުންދާ ކަމަށް އެ އޮތޯރިޓީ އިން ވަނީ ބުނެފަ އެވެ. 

ރާއްޖެއަށް މިހާރު ކުރަމުންދާ ވިއްސާރައިގައި އެކި އަތޮޅުތަކުގެ ރަށްރަށަށް ބޯކޮށް ވާރޭވެހި، މަގުތަކުގައްޔާއި މީހުން ދިރިއުޅޭ ގެތަކުގައި ފެންބޮޑުވަމުންދާތީ، އާންމު ރައްޔިތުންނަށް އެހީތެރިކަން ފޯރުކޮށްދިނުމުގައްޔާއި ފެންހިންދުމުގެ މަސައްކަތުގައި ކައުންސިލްތަކާއި އެހެނިހެން މުއައްސަސާތަކާ ގުޅިގެން ފުލުހުން ހަރަކާތްތެރިވަމުންދާ ކަމަށާއި އެގޮތުން ހދ. އަތޮޅާއި، ނ. އަތޮޅާއި، ބ. އަތޮޅު އަދި ޅ. އަތޮޅުގެ ރަށްތަކެއްގައި ފެންބޮޑުވެގެން ރިޕޯޓުކުރުމާ ގުޅިގެން އެ ރަށްރަށުގައި މެދުކެނޑުމެއްނެތި އެހީތެރިކަން ފޯރުކޮށްދެމުންދާ ކަމަށް ފުލުހުން ވެސް ވަނީ ބުނެފަ އެވެ.