މީޑިއާތަކަށް މައްސަލަ ތިލަވެ، ފާޑުކިޔުން އަމާޒުވުމުން ޕެރޯލް ބޯޑު މެންބަރުން ވަކިކޮށް، އަބުޗާ އަލުން ބަންދުކުރަން ނިންމައިފި!
6 އޮކްޓޯބަރު 2026 | އަންގާރަ 13:27އައްޑޫގައި 80 ކިލޯގެ މަސްތުވާތަކެތި ގެންގުޅުނު މައްސަލައިގައި 25 އަހަރުގެ ޖަލު ހުކުމެއް ތަންފީޒު ކުރަމުންދިޔަ އިބްރާހީމް ރަޝީދު (އަބުޗާ) ޕެރޯލްގެ ދަށުން މިނިވަންކުރި ނިންމުން ސަރުކާރުން ބާތިލުކޮށްފި. ހޯމް މިނިސްޓަރު ވިދާޅުވީ ޕެރޯލް ބޯޑުން އެ ނިންމުން ނިންމާފައިވަނީ ގާނޫނީ ގޮތުން ބަލަންޖެހޭ ކަންކަމަށް ފުރިހަމައަށް ރިއާޔަތްނުކޮށް ކަމަށްވާތީ، އޭނާ އަލުން ބަންދުކޮށް ޕެރޯލް ބޯޑުގެ މެންބަރުން ވަނީ މަގާމުން ވަކިކޮށްފައި ކަމަށް
އައްޑޫ ސިޓީގެ އެންމެ ބޮޑު އެއް ޑްރަގު ޑީލަރު، އިބްރާހީމް ރަޝީދު (އަބުޗާ) | ޕޮލިސް
އުމުރު ދުވަހުގެ ޖަލު ހުކުމެއްގައި ހުރި އައްޑޫ ސިޓީގެ އެންމެ ބޮޑު އެއް ޑްރަގު ޑީލަރު ޕެރޯލް ބޯޑުން މިނިވަން ކުރި މައްސަލައިގައި މީޑިއާތަކަށް މައްސަލަ ތިލަވެ، ފާޑުކިޔުން އަމާޒުވުމުން ޕެރޯލް ބޯޑު މެންބަރުން ވަކިކޮށް އިބްރާހީމް ރަޝީދު (އަބުޗާ) އަލުން ބަންދުކޮށްފި އެވެ.
އިބްރާހީމް ރަޝީދު (އަބުޗާ) ހައްޔަރުކުރީ 2020 ވަނަ އަހަރު އައްޑޫގައި ދިވެހި ފުލުހުންގެ ހިދުމަތުން ހިންގި އޮޕަރޭޝަނެއްގަ އެވެ. އެގޮތުން އެ އޮޕަރޭޝަނުގައި 80 ކިލޯއަށް ވުރެ ގިނަ މަސްތުވާތަކެތި އަތުލައިގަނެފައިވެ އެވެ.
އައްޑޫ ސިޓީއަށް މަސްތުވާތަކެތި އެތެރެކޮށް، އޭގެ ވިޔަފާރި އެންމެ ވަރުގަދައަށް ކުރާ މީހުންގެ ތެރޭގައި ހިމެނޭ ކަމަށް ފުލުހުން ތުހުމަތުކުރާ އަބުޗާއަށް އުމުރު ދުވަހުގެ ޖަލު ހުކުމެއް އިއްވާފައި ވަނީ 2025 ވަނަ އަހަރުގެ މެއި މަހުގެ ތެރޭގަ އެވެ. މި ހުކުމް އިއްވީ ހިތަދޫ މެޖިސްޓްރޭޓް ކޯޓުންނެވެ.
މި މައްސަލައިގައި މަސްތުވާތަކެތި ޓްރެފިކް ކުރުމުގެ ދެ ދައުވާއަށް އޭނާ އިއުތިރާފުވެ، ދައުލަތާއެކު އެއްބަސްވުމެއް ވަނީ ހަދާފަ އެވެ. އޭނާގެ މައްޗަށް ކޯޓުން 50 އަހަރުގެ ޖަލު ހުކުމެއް ކުރި ނަމަވެސް، އިއުތިރާފުވުމުން ދިން ލުޔެއްގެ ގޮތުން އެ ހުކުމް ވަނީ 25 އަހަރަށް ކުޑަކޮށްދީފަ އެވެ.
ޑްރަގް އެތެރެކުރުމުގެ ބޮޑެއް ކަމަށްވާ އިބްރާހީމް ރަޝީދު (އަބުޗާ) ޕެރޯލް ބޯޑުން މިނިވަންކޮށްފައި ވަނީ މިދިޔަ ބުރާސްފަތި ދުވަހުގަ އެވެ.
އެކަމާ ގުޅިގެން ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި ހޯމް މިނިސްޓަރު އަލީ އިހުސާން ވިދާޅުވީ އަބުޗާ ދޫކޮށްލުމަށް ޕެރޯލް ބޯޑުން ނިންމި ނިންމުމުގައި ބަލަންޖެހޭ ބައެއް ކަންކަން ބަލާފައި ވަނީ ރަނގަޅަކަށް ނޫން ކަމަށާއި އެ ނިންމުން ބަދަލުކުރަން އެންގެވި ކަމަށެވެ. އަދި ޕެރޯލް ބޯޑުގެ ނިންމުން ބަދަލުކޮށް، އޭނާ ވަނީ އަންގާރަ ދުވަހުގެ ހަވީރު 16:48 ގައި އަލުން ހައްޔަރުކޮށްފަ އެވެ.
މައްސަލައިގެ މައުލޫމާތު މިނިސްޓްރީއަށް ވެސް ލިބުމާއެކީގައި އަޅުގަނޑުމެން މިކަން ހިނގާފައިވާ ގޮތް ބަލައިފިން. ބަލާފައި ބެލި ބެލުމުގައި ޕެރޯލް ބޯޑުގެ ނިންމުމުގައި އަޅުނޑުމެންނަށް ގަބޫލުކުރެވުނު ގާނޫނުގެ ތެރެއިން ބަލަންޖެހޭ ބައެއް ކަންކަން ބެލިފައި އޮތީކީ އެކަން ބަލަންޖެހޭ ގޮތަށް ނޫންކަން. އެހެންވީމަ އެކަމާ ގުޅިގެން މިއަދުގެ ވަގުތެއްގައި އަޅުގަނޑު ވާނެ އެ ޑިޒިޝަން އަލުން ރީކޮންސިޑާ ކޮށްދިނުމަށް ޕެރޯލް ބޯޑަށް އަންގާފައިއަލީ އިހުސާން
ފުލުހުން މީގެ ކުރިން މި މައްސަލައާ ގުޅޭ ގޮތުން މައުލޫމާތު ދިން ގޮތުގައި، 2020 ވަނަ އަހަރުގެ އޮކްޓޯބަރު މަހު ހިންގި ޚާއްސަ އޮޕަރޭޝަނެއްގައި އަބުޗާ އަތުން 61 ކިލޯގެ ޑައިމޯފިނާއި 17.97 ކިލޯގެ މެޓަމްފެޓަމިން ރެސިމޭޓް އަތުލައިގަނެފައިވެ އެވެ. މި އޮޕަރޭޝަނުގައި އޭނާއާއެކު އިތުރު 17 މީހަކު ވެސް ހައްޔަރުކޮށްފައިވެ އެވެ.
ޕެރޯލް ބޯޑަކީ، ޖަލުތަކާއި ޕެރޯލްގެ ގާނޫނުގެ ދަށުން ރައީސުލްޖުމްހޫރިއްޔާ އުފައްދާފައިވާ ބޯޑެކެވެ. މި ބޯޑު ހިންގަނީ، ހޯމްލޭންޑް މިނިސްޓްރީ ދަށުން ހިންގާ ކަރެކްޝަންސް ސަރވިސްގެ ބެލުމުގެ ދަށުންނެވެ. އަދި ބޯޑުގެ އެންމެހާ ކަންކަން ހިނގާ ނުހިނގާ ގޮތް ބަލައި، ގާނޫނުގެ ދަށުން ހުކުމް ތަންފީޒު ކުރާ މީހުން ދޫކުރުމަށްޓަކައި އަދި ޕެރޯލް ނިޒާމް އެކަށީގެންވާ ގޮތެއްގައި ހިންގައި ދެމެހެއްޓުމަށް ކުރަން ޖެހޭ އެންމެހާ ކަންކަން ބަލަހައްޓަން ގާނޫނުގެ 127 ވަނަ މާއްދާގައި ޒިންމާ މަތިކޮށްފައި ވަނީ ކަރެކްޝަންސްގެ ކޮމިޝަނަރަށެވެ.
