މައުލޫމާތު ހޯދުމާއި ލިބިގަތުމުގެ ގާނޫނު ގެ ދަށުން އަންނަ ހުށަހެޅުންތަކަށް ޖަވާބު ފޯރުކޮށްދިނުމަށް ވަރަށް ބޮޑު ހަރަދެއް ހިނގާ ކަމަށާއި އެ ކަމަށް އަގެއް ނެގުން ރަނގަޅު ކަމަށް ހޯމް މިނިސްޓަރު އަލީ އިހުސާން ވިދާޅުވެއްޖެ އެވެ.

މިނިސްޓަރ އިހްސާން މިފަދައިން ވިދާޅުވީ، ދިވެހި ރާއްޖޭގެ ޤައުމީ ޔުނިވަރސިޓީ ގެ ބެޗްލަރ އޮފް އާރޓްސް އިން މީޑިއާ އެންޑް ޕަބްލިކް ރިލޭޝަންސްގެ ދަރިވަރުންގެ ކުރިއަށް ގެންދިޔަ "ނޯ ކެޕް ޖަސްޓް ފެކްޓްސް" ކެމްޕެއިން ޝަރަފްވެރި ކޮށްދެއްވާ ވާހަކަ ދައްކަވަމުންނެވެ.

މުއައްސަސާއަކުން މައުލޫމާތެއް ފޯރުކޮށްދިނުމަށް ކުރަން ޖެހޭ މަސައްކަތު ގެ ފަހަތުގައި ބޮޑު ހަރަދެއް ހިނގާތީ، މިހާރު ވެސް ވަރަށް ގިނަ ގައުމުތަކުގައި ކޮންމެވެސް އަގެއް އެ ކަމަށް ނަގާ ކަމަށް އިހުސާން ވިދާޅުވި އެވެ. މައުލޫމާތު ފޯރުކޮށްދިނުމު ގައި ބޮޑެތި ހަރަދުތައް ހިނގާ ކަމަށާއި، އެ ހަރަދުތައް ހަމަޖެއްސުމަށް ބައެއް ފީއެއް ނެގުން މުހިންމު ކަމަށް މިނިސްޓަރު ފާހަގަކުރެއްވި އެވެ.

ބައެއް ފަހަރު އެދޭ މައުލޫމާތެއްގެ ސަބަބުން ވެސް ބޮޑު ހަރަދެއް ހިނގާކަން މިނިސްޓަރު ފާހަގަކުރެއްވި އެވެ. ހޯދަން އުޅޭ މައުލޫމާތަކީ ފަސޭހައިން ލިބޭނެ މައުލޫމާތެއްތޯ ވެސް ބަލަން ޖެހޭ ކަމަށް އިހުސާން ވިދާޅުވި އެވެ. މިހާރު އޮންނަ ގޮތުން، އެދެނީ ކޮން ކަހަލަ މައުލޫމާތަކަށް ކަމެއް ބެލެވެން ނޯންނަ ކަމަށް އޭނާ ވިދާޅުވި އެވެ.

މިހާރު ވެސް އެ މަސައްކަތަށް މަދުވެގެން ދެ މުވައްޒަފަކު ކޮންމެ މުއައްސަސާއެއްގައި ހުންނަން ޖެހޭ ކަން މިނިސްޓަރު ފާހަގަކުރެއްވި އެވެ. އެއީ އިންފޮމޭޝަން އޮފިސަރާއި އެޕީލް އޮފިސަރެވެ. އެ ދެ މީހުންގެ މަސައްކަތް ވެސް ބަލާނެ މީހަކު ބޭނުންވާކަން، ކުރެއްވުނު ތަޖުރިބާތަކުން އެނގޭ ކަމަށް ވެސް އިހުސާން ވިދާޅުވި އެވެ. މި މުވައްޒަފުންގެ މުސާރައާއި އެހެނިހެން ހަރަދުތައް ވެސް ބޮޑުކަން އޭނާ ފާހަގަކުރެއްވި އެވެ.

މިއީ ދާއިރާގެ މާހިރުން ފުޅާ ދާއިރާއެއްގައި މަޝްވަރާކޮށްގެން ހައްލުތަކެއް ހޯދަން ޖެހޭ ކަމެއް ކަމަށް އިހުސާން ވިދާޅުވި އެވެ. މައުލޫމާތު ހޯދުމާއި ލިބިގަތުމުގެ ގާނޫނު ހަރުދަނާކުރުމަށާއި، އެ ގާނޫނުގެ ދަށުން ފޯރުކޮށްދޭ ހިދުމަތްތައް ރަނގަޅުކުރުމަށް ހުރިހާ ފަރާތްތަކުން ގުޅިގެން މަސައްކަތްކުރަން ޖެހޭ ކަމަށް އޭނާ ވިދާޅު ވިއެވެ.

އިހްސާން މިދަދައިން ވާހަކަ ދައްކަވާފަ ވާއިރު، ސަރުކާރުގެ އެކި މުއައްސަސާތަކާއި އޮފީސްތަކުން މައުލޫމާތު ހާމަ ނުކުރުމުގެ އެތައް ފާޑުކިޔުމެއް މި ސަރުކާރަށް ވަނީ އަމާޒުވެ ފައެވެ. މައުލޫމާތު ހޯދުމާއި ލިބިގަތުމުގެ ގާނޫނުގެ ދަށުން މައުލޫމާތު ހޯދުމަށް އަގެއް ނަގައިފި ނަމަ، މިހާރަށް ވުރެ ގިނަ ކަންކަން ފޮރުވުމުގެ ފުރުސަތު ސަރުކާރަށް ފަހިވެގެންދާނެ ކަމަށް ގިނަ ބަޔަކު ފާހަގަކުރެއެވެ.

މައުލޫމާތު ހޯދުމާއި ލިބިގަތުމުގެ ހައްގަކީ ޑިމޮކްރަސީގެ މުހިންމު ބައެެއްގެ ގޮތުގައި ބައިނަލްއަގުވާމީ ފެންވަރުގައި ގަބޫލުކުރެވިފައިވާ ހައްގެކެވެ. މި ހައްގު ފުރިހަމައަށް ލިބިދިނުމަށް ސަރުކާރުން މަސައްކަތްކުރަން ޖެހޭ ކަމަށް ހިއުމަން ރައިޓްސް ޖަމިއްޔާތަކުން ވެސް ފާހަގަކުރެ އެވެ.