ހޯމް މިނިސްޓަރު: ބިދޭސީން ކަންމަތީ ފިހާރަ ހިންގަނީ ޑޮލަރުގެ ކަޅުބާޒާރު ހިންގަން
14 ސެޕްޓެމްބަރު 2026 | ހޯމަ 13:42ގަވާއިދާ ހިލާފަށް ކަޅުބާޒާރުގައި ޑޮލަރުގެ މުއާމަލާތްކުރާ 12 ބިދޭސީއެއްގެ މައްސަލަ ބަލަމުންދާއިރު، މީގެ ތެރެއިން 9 މީހަކު މިހާރު ވަނީ ހައްޔަރުކޮށްފައި. މިފަދަ ކުށްތަކުގައި ބައިވެރިވާ ދިވެހިންނަށް ހޯމް މިނިސްޓަރު އިންޒާރު ދެއްވާފައިވާއިރު، ބޭރު ފައިސާގެ ގަވާއިދަށް ގެނައި އިސްލާހުތަކާއެކު ކަޅުބާޒާރުގައި ޑޮލަރު ވިއްކާ ފަރާތްތައް ބޮޑު އަދަދުން ޖޫރިމަނާ ކުރެވޭނެ
ހޯމް މިނިސަޓަރު އަލީ އިހުސާނު ހޯމަ ދުވަހު ބޭއްވި ނޫސްވެރިންގެ ބައްދަލުވުމުގައި ވަހަކަ ދައްކަވަނީ | ރާއްޖެ އެމްވީ
ބިދޭސީ މަސައްކަތްތެރިން ކަންމަތީ ފިހާރަތައް ހިންގަމުންދަނީ ގަވާއިދާ ހިލާފަށް ކަޅުބާޒާރުގައި ޑޮލަރު ވިއްކަން ކަމަށް ހޯމްލޭންޑް ސެކިއުރިޓީ މިނިސްޓަރު އަލީ އިހުސާން ވިދާޅުވެއްޖެ އެވެ.
ގަވާއިދާ ހިލާފަށް ޑޮލަރު ވިއްކުން ހުއްޓުވުމަށް ހިންގި އޮޕަރޭޝަނާ ގުޅޭ ގޮތުން، ހޯމަ ދުވަހުގެ މެންދުރުފަހު ބޭއްވި ނޫސްވެރިންގެ ބައްދަލުވުމެއްގައި ވާހަކަ ދައްކަވަމުން، ކަޅުބާޒާރުގައި ބޮޑު ފެންވަރެއްގައި ޑޮލަރު ގަނެ ވިއްކާ ކަމަށް ތުހުމަތު ކުރެވޭ 12 ބިދޭސީ މަސައްކަތްތެރިއެއްގެ މައްސަލަ ތަހުގީގު ކުރަމުންދާ ކަމަށް މިނިސްޓަރު ވިދާޅުވި އެވެ.
އެގޮތުން ހޮޓްލައިން މެދުވެރިކޮށް ލިބިފައިވާ މައުލޫމާތުގެ އަލީގައި ތަހުގީގު ކުރިއަށްދާ ކަމަށާއި، ތުހުމަތު ކުރެވޭ ފަރާތްތަކުގެ ތެރެއިން 9 ބިދޭސީއަކު މިހާރު ހައްޔަރުކޮށްފައިވާ ކަމަށް ވެސް މިނިސްޓަރު ވިދާޅުވި އެވެ.
މީގެއިތުރުން މިނިސްޓަރު ވިދާޅުވީ، ބައެއް ބިދޭސީ މަސައްކަތްތެރިން، ދިވެހިންގެ ނަމުގައި ރަޖިސްޓްރީކޮށްފައިވާ ވިޔަފާރި ބޭންކް އެކައުންޓްތަކަށް މުސާރަ ޖަމާކުރުމަށްފަހު، ކޮންމެ ދުވަހަކު ވެސް ޑޮލަރަށް ބަދަލު ކުރަމުންދާ ކަމަށެވެ. އަދި ގިނަ ބިދޭސީން ގަވާއިދާ ހިލާފަށް ރާއްޖެއިން ބޭރަށް ޑޮލަރު ފޮނުވަން އުޅެނިކޮށް ބޯޑަރުން ހިފަހައްޓާފައިވާ ކަމަށް ވެސް މިނިސްޓަރު ވިދާޅުވި އެވެ.
ބިދޭސީ ފަރާތްތައް ކޯނަރ ފިހާރަތައް ހުޅުވައި، ޑޮލަރު ވިއްކާ ތަންތަނެއްގެ ގޮތުގައި ހިންގަމުންދާތަން ފެނިފައިވޭ. ދިވެހިންގެ ނަމުގައި ހުޅުވާފައިވާ ވިޔަފާރި އެކައުންޓްތަކަށް ސެލަރީ ޖަމާކުރުމަށްފަހު، ކޮންމެ ދުވަހަކު ވެސް ޑޮލަރަށް ބަދަލުކޮށް، ބޯޑަރުން ފިލުވައިގެން ގެންދަން އުޅެނިކޮށް ހިފަހައްޓާފައި ވެސް ވޭއަލީ އިހުސާން
މިނިސްޓަރު އިތުރަށް ވިދާޅުވީ، ތަފާތު ވިޔަފާރިތަކަކާއި ބިދޭސީ ފަރާތްތަކެއް، ޓީޓީ ހިދުމަތް ނަހަމަ ގޮތުގައި ބޭނުންކޮށްގެން ރާއްޖެއިން ބޭރަށް ޑޮލަރު ފޮނުވި ކަމަށް ތުހުމަތު ކުރެވިގެން ތަހުގީގު ކުރަމުންދާ ކަމަށެވެ.
އަދި ދިވެހީން ވެސް މިފަދަ ކުށްތަކުގައި ބައިވެރިވުމާ ދެކޮޅަށް، މިނިސްޓަރު ވަރުގަދަ އިންޒާރެއް ދެއްވި އެވެ. އެގޮތުން ހައްޔަރު ކުރެވިފައިވާ ބިދޭސީ ފަރާތްތައް ގޭގައި ކައްކާ ނުވަތަ ޑްރައިވަރެއްގެ ގޮތުގައި ވަޒީފާ ދީފައިވާ ކަމަށް ބުނެ ދައުވާކޮށްގެން ދޫކުރުވަން ބައެއް ދިވެހީން މަސައްކަތް ކުރުން ވަގުތުން ހުއްޓާލަން ޖެހޭ ކަމަށް ވެސް ވިދާޅުވި އެވެ.
ބޭރު ފައިސާގެ ގާނޫނަށް ފަހުން ގެނެވުނު އިސްލާހުތަކުގެ ދަށުން، އެމްއެމްއޭ އިން ރަސްމީކޮށް ކަނޑައަޅާ ރޭޓަށް ވުރެ މަތިން ބޭރު ފައިސާ ގަނެ ވިއްކުން އިސްތިހާރު ކުރުމާއި ކުރިއެރުވުން ވަނީ މަނާކޮށްފަ އެވެ. އަދި ޑިޖިޓަލް ޕްލެޓްފޯމްތައް ނުވަތަ އެހެން ވެސް ވަސީލަތެއް ބޭނުންކޮށްގެން ކަޅު ބާޒާރުގެ އަގު ހާމަކުރުމާއި ފަތުރައި ނުވަތަ ޝާއިއުކުރުމަކީ ވެސް ކުށެއް ކަމަށްވާ އިރު، ފަރުދެއްނަމަ 500،000 ރުފިޔާއާ ހަމައަށް އަދި ގާނޫނީ ފަރާތްތަކާއި ރަޖިސްޓްރީ ކޮށްފައިވާ ވިޔަފާރިތައް 5 މިލިއަން ރުފިޔާއާ ހަމައަށް ޖޫރިމަނާ ކުރެވޭ ގޮތަށް ވަނީ ނިންމާފަ އެވެ.
މީގެ އިތުރުން، ޑޮލަރު ލިބޭ ފަތުރުވެރިކަމާ ނުގުޅޭ ވިޔަފާރިތަކަށް ބޭރު ފައިސާ މާރުކުރަން ލާޒިމު ލކުރެވޭ އަހަރީ ތަންފީޒީ އަދަދު، 15 މިލިއަން ޑޮލަރުން 25 މިލިއަން ޑޮލަރަށް ވަނީ ބޮޑުކޮށްފަ އެވެ. މިފަދަ ވިޔަފާރިތަކުން ކޮންމެ މަހަކު ލިބޭ އާމްދަނީގެ 40 އިންސައްތަ މާރުކުރަން ލާޒިމުވާ ނަމަވެސް، 100 އިންސައްތަ ދިވެހި ހިއްސާދާރުންގެ ތެރެއިން ހިންގާ ވިޔަފާރިއެއް ނަމަ، މާރުކުރަން ޖެހޭ ނިސްބަތް 7 އިންސައްތައަށް ވަނީ ކުޑަކޮށްފަ އެވެ.
ކެޓަގަރީ އޭގެ ތަންތަން ކަމަށްވާ ރިސޯޓްތަކާއި އިންޓަގްރޭޓެޑް ޓޫރިސްޓް ރިސޯޓްތަކާއި ޕްރައިވެޓް އައިލެންޑްތަކުން، ކޮންމެ މަހަކު ލިބޭ އާމްދަނީގެ 40 އިންސައްތަ މާރުކުރަން ލާޒިމުވާއިރު، ކެޓަގަރީ ބީގެ ތަންތަން ކަމަށްވާ ގެސްޓްހައުސްތަކާއި ހޮޓެލްތަކާއި ލިވްއަބޯޑްތަކުން ކޮންމެ މަހަކު ލިބޭ އާމްދަނީގެ 20 އިންސައްތަ ނުވަތަ ފަތުރުވެރިއަކަށް 25 ޑޮލަރު މާރުކުރަން ލާޒިމުވެ އެވެ.
ސަރުކާރުން ބުނާ ގޮތުގައި، މި އިސްލާހުތައް ގެނެވުނީ ރާއްޖޭގައި ހިނގާ ވިޔަފާރިތަކުން ލިބޭ ޑޮލަރު ރާއްޖޭގެ ދާހިލީ އިގުތިސާދުގެ ތެރޭގައި ދެމެހެއްޓުމުގެ ބޭނުމުގަ އެވެ.
