އިންޑިޔާ ސިފައިން ބަޑިޖަހައި ޕާކިސްތާނުގެ ދެ މީހުން މަރާލިކަމަށް ބުނުމުން ދެ ޤައުމުގެ މަސްރަހު އަނެއްކާ ވެސް ހޫނުވެއްޖެ
4 އޮކްޓޯބަރު 2026 | އާދީއްތަ 07:46ޕާކިސްތާނުގެ ދެ ރައްޔިތަކު މަރާލި މައްސަލައިގައި އިންޑިޔާގެ ބޯޑާ ސެކިއުރިޓީ ފޯސްއަށް ބޮޑެތި ތުހުމަތުތަކެއް ކުރަމުންދާއިރު، އިންޑިޔާއިން ވަނީ އެއީ ގަވާއިދާ ޚިލާފަށް ބޯޑަރު ހުރަސްކުރަން އުޅުނު ބައެއް ކަމަށް ބުނެ އެ ތުހުމަތުތައް ދޮގުކޮށްފައި. މި ހާދިސާއާ ގުޅިގެން ދެ ގައުމުގެ މެދުގައި ނުތަނަވަސްކަން އިތުރުވެ، މި ކަން މިނިވަންކޮށް ތަހުގީގު ކުރުމަށް ޕާކިސްތާނުން ވަނީ ގޮވާލާފައި
އިންޑިޔާގެ ބޯޑާ ސެކިޔުރިޓީ ފޯސްގެ ސިފައިން ޕާކިސްތާނާ ގުޅޭ ސަރަހައްދީ ރޮނގު ކައިރީގައި ފޯރިމަރަނީ | އޭއެފްޕީ
ހުކުރު ދުވަހު ސަރަހައްދީ ރޮނގުގައި ހިނގި ހާދިސާއަކާ ގުޅިގެން ޕާކިސްތާނާއި އިންޑިޔާއިން އެއްގައުމު އަނެއް ގައުމުގެ ޑިޕްލޮމެޓުން ހާޒިރުކޮށް، ކަންބޮޑުވުން ފާޅުކޮށްފި އެވެ. ދެ ޤައުމު ގުޅޭ ބޯޑަރު ސަރަހައްދުގައި ހިނގި ހާދިސާގައި ޕާކިސްތާނުގެ އާންމުންގެ ދެ މީހުން ވަނީ މަރުވެފަ އެވެ. މި ހާދިސާއާ ގުޅިގެން ދެ ޤައުމުގެ ދެމެދުގައި ބަހުގެ ހަމަލާތަކެއް އަމާޒުކުރަން ފަށާފައިވާއިރު، ނިއު ދެއްލީން ވަނީ އިސްލާމްއާބާދުން ހާމަކޮށްފައިވާ މައުލޫމާތު ދޮގުކޮށްފަ އެވެ.
ޕާކިސްތާނުގެ ޚާރިޖީ ވުޒާރާއިން ހޮނިހިރު ދުވަހު ނެރުނު ބަޔާނެއްގައި ބުނީ، އެ ޤައުމުގެ ދެ ރައްޔިތުން މަރާލާފައި ވަނީ ސަރަހައްދީ ރޮނގު ކައިރީގައި އޮންނަ ބޭދިޔާ އަވަށް ކައިރީގައި ހަރަކާތްތެރިވަމުން ދިޔަ އިންޑިޔާގެ ބޯޑާ ސެކިއުރިޓީ ފޯސްގެ (ބީއެސްއެފް) ސިފައިން ކަމަށެވެ. މީގެ އިތުރުން އެހެން މީހަކަށް އަނިޔާވެފައިވާ ކަމަށް ވެސް ރިޕޯޓުތައް ބުނެ އެވެ.
"ބީއެސްއެފްގެ ސިފައިން ވަނީ އެއްވެސް ސަބަބަކާ ނުލައި، ހަތިޔާރު ނެތް އާންމުންނާ ދެކޮޅަށް ނުރައްކާތެރި ބާރުގެ ބޭނުންކޮށްފައި. މި ފަދައިން ބާރުގެ ބޭނުންކުރުމަކީ އެއްގޮތަކަށް ވެސް ބަލައިގަނެވޭނެ ކަމެއް ނޫން. އަދި, މިއީ އެއްވެސް މިންވަރަކަށް ހަމަޖެހޭ ކަމެއް ނޫން. މީގެ ނަތީޖާއެއްގެ ގޮތުން އަގުހުރި ދެ ފުރާނަ ވަނީ ގެއްލިފައި،" ޕާކިސްތާނުގެ ޚާރިޖީ ވުޒާރާގެ ބަޔާނުގައި ބުނެފައިވެ އެވެ. އަދި، މި ހާދިސާއާމެދު ސުވާލުކޮށް، ކަންބޮޑުވުން ފާޅުކުރުމަށް ޕާކިސްތާނުގައި ހުންނަ އިންޑިޔާގެ އެމްބަސީގެ ޗާޖީ ދެފެއާގެ މަގާމު ފުރުއްވަމުން ގެންދަވާ ބޭފުޅާ ހާޒިރުކޮށްފައިވާނެ ކަމަށް ވެސް އެ ވުޒާރާއިން ހާމަކުރި އެވެ.
އޭގެ ފަހުން އިންޑިޔާގެ ޚާރިޖީ ވުޒާރާއިން ވަނީ، މިއީ "އެއްވެސް އަސާސެއް ނެތް އަދި ވަކި މަގުސަދެއް އޮވެގެން ކުރާ ތުހުމަތުތަކެއް" ކަމަށް ބުނެ އެ ކަން ދޮގުކޮށްފަ އެވެ. "ޕާކިސްތާނުން [އެ ޤައުމުގެ ރައްޔިތުން] ގަވާއިދާ ޚިލާފަށް ސަރަހައްދީ ރޮނގު ހުރަސްކޮށް [އިންޑިޔާއަށް] ވަނުމަށް މެދުނުކެނޑި މަގުފަހިކޮށްދެމުންދޭ،" އިންޑިޔާގެ ޚާރިޖީ ވުޒާރާއިން ބުންޏެވެ. އަދި، އިސްލާމްއާބާދުގެ ބަޔާނާ ގުޅޭ ގޮތުން ސުވާލުކޮށް، ކަންބޮޑުވުން ފާޅުކުރުމަށް އިންޑިޔާއިން ވެސް ވަނީ ނިއު ދެއްލީގައި ހުންނަވާ ޕާކިސްތާނުގެ އެމްބަސީގެ ޗާޖީ ދެފެއާ ހާޒިރުކޮށްފަ އެވެ.
އިންޑިޔާގެ ޚާރިޖީ ވުޒާރާއިން ބުނީ، ޕަންޖާބުގެ ފީރޯޒްޕޫރު ސަރަހައްދުން އިންޑިޔާގެ ސަރަހައްދަށް ތިން މީހަކު ވަދެފައިވާ ކަމަށެވެ. އަދި, ޕާކިސްތާނަށް އެނބުރި ދިއުމަށް ބީއެސްއެފުން އެތައް ފަހަރަކު އިންޒާރު ދިނުމުން ވެސް، އެ މީހުން ސަރަހައްދީ ރޮނގުގެ ފެންސާ ދިމާއަށް ކުރިއަށް ދިޔަ ކަމަށް އެ ވުޒާރާއިން ބުނެ އެވެ. "ސަލާމަތީ ގޮތުން ވަގުތުންވަގުތަށް ކުރިމަތިވި ނުރައްކަލަކާ ގުޅިގެން، ބީއެސްއެފަށް މަޖުބޫރުވީ އެ މީހުންނާ ކުރިމަތިލާން،" އިންޑިޔާގެ ވުޒާރާއިން ބުނެ އެވެ.
ނަމަވެސް، ޕާކިސްތާނުގެ ޚާރިޖީ ވުޒާރާގެ ބަޔާނުގައި ބުނީ، މަރުވި މީހުންނަކީ "ގަވާއިދާ ޚިލާފަށް ވަން ބައެއް" ކަމަށް ސިފަކުރުމަށް ކުރާ ކޮންމެ މަސައްކަތަކަށް "ކަނޑައެޅިގެން" ދެކޮޅު ހަދާ ކަމަށެވެ.
މިއާއެކު، "އަވަސް، ފާޅުކަންބޮޑު އަދި އިތުބާރު ހިފޭ ތަހުގީގެއް ކުރުމަށް" ޕާކިސްތާނުން ވަނީ އިންޑިޔާއަށް ގޮވާލާފަ އެވެ. އަދި, މި ކަމުގައި ޒިންމާވާ ފަރާތްތަކާމެދު އަޚުލާގީ އަދި ގާނޫނީ ފިޔަވަޅު އެޅުމަށާއި، ތަހުގީގުން ހޯދުނު ކަންކަމާއި އެޅި ފިޔަވަޅުތައް ރަސްމީކޮށް ޕާކިސްތާނުގެ ސަރުކާރަށް އެންގުމަށް ވެސް ވަނީ އެދިފަ އެވެ.
އިންޑިޔާއިން ބުނީ މި ހާދިސާއިން ދައްކުވައިދެނީ "ޕާކިސްތާނުގައި ހަރަކާތްތެރިވާ ހަތިޔާރު އެޅި މަސްތުވާތަކެތީގެ ނެޓްވޯކްތަކުން ތަކުރާރުކޮށް ސަރަހައްދީ ރޮނގު ހުރަސްކުރަމުންދާ ސާފު މަންޒަރެއް" ކަމަށެވެ. އަދި, ސަރަހައްދީ ރޮނގު ހުރަސްކޮށް ވަނުމާއި މަސްތުވާތަކެތި އެތެރެކުރުމުގެ ހަރަކާތްތައް ކަމަށް އިންޑިޔާއިން ސިފަކުރާ ކަންކަން ތަހުގީގު ކުރުމަށް އިސްލާމްއާބާދަށް ވަނީ ގޮވާލާފަ އެވެ.
2025 އޭޕްރީލުގައި އިންޑިޔާގެ ބާރުގެ ދަށުގައި އޮތް ކަޝްމީރުގައި ފަތުރުވެރިންނަށް އަމާޒުކޮށް ދިން ހަމަލާއެއްގައި 26 މީހުން މަރުވެ، ހަތަރު ދުވަހުގެ ހަނގުރާމައެއް ފެށުނު ފަހުން، އަވައްޓެރި ދެ ގައުމުގެ މެދުގައި ގުޅުން ވަނީ ގޯސްވެފަ އެވެ. މި ހަމަލާއަށް ޕާކިސްތާނުން ތާއީދުކުރާ ކަމަށް ނިއު ދެއްލީން ތުހުމަތުކުރަމުންދާއިރު، އިސްލާމްއާބާދުން އެ ކަން ދޮގުކުރެ އެވެ.
މަސްދަރު: އަލް ޖަޒީރާ
