އެމްޑީޕީގެ ގައުމީ މަޖިލީހުގެ އިންތިހާބު ނޮވެމްބަރު 27 ގައި ބާއްވަން ނިންމައިފި
3 އޮކްޓޯބަރު 2026 | ހޮނިހިރު 20:35އެމްޑީޕީގެ އަސާސީ ގަވާއިދަށް ގެނައި ބަދަލުތަކާއެކު ޕާޓީގެ އެންމެ އިސް ފަރާތަކީ ޗެއާޕާސަން ކަމަށް ކަނޑައަޅައި، ރައީސް އާއި ނައިބު ރައީސްގެ މަގާމު ވަނީ އުވާލާފައި. މި އިސްލާހުތަކާއެކު ބާއްވާ ގައުމީ މަޖިލީހުގެ އިންތިހާބު ނޮވެމްބަރު 27 ގައި ބޭއްވުމަށް ނިންމާފައިވާއިރު، މިއީ ޕާޓީގެ ހިންގުމުގެ އޮނިގަނޑަށް ބޮޑެތި ބަދަލުތަކެއް އަންނާނެ އިންތިހާބެއް
އެމްޑީޕީ ކޮންގްރެސް 2026ގެ ތެރެއިން | އެމްޑީޕީ
މޯލްޑިވިއަން ޑިމޮކްރެޓިކް ޕާޓީ (އެމްޑީޕީ)ގެ ގައުމީ މަޖިލީހުގެ އިންތިހާބު، މިއަހަރުގެ ނޮވެމްބަރު މަހުގެ 27 ވަނަ ދުވަހު ބާއްވާނެ ކަމަށް ރަސްމީކޮށް އިއުލާނު ކޮށްފި އެވެ.
މިކަން ރަސްމީކޮށް އިއުލާނު ކުރެއްވީ "އެމްޑީޕީ ކޮންގްރެސް 2026" ނިންމުމުގެ ރަސްމިއްޔާތުގައި އެ ޕާޓީގެ ޗެއާޕާސަން މުހައްމަދު ނަޝީދެވެ.
މި އިންތިޚާބަކީ އެމްޑީޕީގެ ހިންގުމުގެ އޮނިގަނޑަށް ގެނެވުނު ބަދަލުތަކާއެކު ބާއްވާ ފުރަތަމަ އިންތިޚާބަށްވާއިރު، އަލަށް ގެނެވުނު އިސްލާހުތަކުގެ ތެރޭގައި ޕާޓީގެ ރައީސް އަދި ނައިބު ރައީސްގެ މަގާމު ވަނީ އުވާލާފަ އެވެ. އަދި މި ދެ މަގާމު އުވާލުމަށްފަހު، ޕާޓީގެ އެންމެ އިސް ފަރާތަކީ ޗެއަރޕާސަން ކަމުގައި ވަނީ ހަމަޖައްސާފަ އެވެ. ކުރިން ގަވާއިދު އޮތްގޮތުން ޕާޓީ ވެރިކަމުގައި އޮންނަ ހާލަތްތަކުގައި އެންމެ އިސް މީހަކީ ޤައުމުގެ ރައީސުލްޖުމްހޫރިއްޔާ އެވެ. ނަމަވެސް، ފާސްކުރެވުނު އައު އިސްލާހާއެކު ޕާޓީ ވެރިކަމުގައި އޮތަސް އަދި އިދިކޮޅުގައި އޮތް ނަމަވެސް، ޕާޓީގެ އެންމެ އިސް ވެރިޔަކީ ޗެއަރޕާސަން ކަމުގައި ވަނީ ކަނޑައަޅާފަ އެވެ.
އެމްޑީޕީގެ ޤައުމީ މަޖިލީހުގެ މުއްދަތު ދަންމާލުމާ ގުޅޭގޮތުން، މި އަހަރުގެ އޮގަސްޓް 31 ގައި ބޭއްވި އެ ޕާޓީގެ ޤައުމީ މަޖިލީހުގެ ބައްދަލުވުމުގައި ވަނީ މުހިންމު ނިންމުންތަކެއް ނިންމާފަ އެވެ. އެ ބައްދަލުވުމުގައި ބައިވެރިވި 34 މެމްބަރުންގެ ތެރެއިން 33 މެމްބަރުންގެ އަޣުލަބިއްޔަތުން ފާސްކުރީ، އެންމެ ލަސްވެގެން އަންނަ އަހަރުގެ ޖެނުއަރީ މަހުގެ ނިޔަލަށް މިހާރު އޮތް ހަތަރުވަނަ ޤައުމީ މަޖިލީހުގެ މުއްދަތު ދަންމާލުމަށެވެ.
އެ ނިންމުމުގައިވާ ގޮތުން، ޕާޓީގެ ކޮންގްރެސް ބާއްވާތާ އެއް މަސްދުވަހުގެ ތެރޭގައި ޤައުމީ މަޖިލީހުގެ އިންތިޚާބު ބާއްވަން ޖެހެއެވެ. އަދި އެ މުއްދަތުގެ ތެރޭގައި އިންތިޚާބު ނުބޭއްވިއްޖެ ހާލަތެއްގައި ވެސް، އެންމެ ލަސްވެގެން 2027 ވަނަ އަހަރުގެ ޖެނުއަރީ 31 ގެ ނިޔަލަށް ދައުރު ދަންމާލައި، އެ ތާރީޚުގައި އިންތިޚާބު ބާއްވަން ޖެހޭނެ ކަމަށް ވަނީ ކަނޑައަޅާފަ އެވެ. ނަމަވެސް، ކޮންގްރެސް ނިމުމާއެކު މިހާރު މިވަނީ އަންނަ ނޮވެމްބަރު މަހުގެ 27 ގައި އިންތިޚާބު ބޭއްވުމަށް ރަސްމީކޮށް ތާވަލުކޮށްފަ އެވެ.
