އެމްޑީޕީގެ ރައީސް އަދި ނައިބު ރައީސްގެ މަގާމުތައް އުވާލުން ހިމެނޭހެން އެމްޑީޕީގެ އަސާސީ ގަވާއިދަށް ބޮޑެތި އިސްލާހުތަކެއް
3 އޮކްޓޯބަރު 2026 | ހޮނިހިރު 12:19އެމްޑީޕީގެ ރައީސާއި ނައިބު ރައީސްގެ މަގާމު އުވާލައި، ޕާޓީގެ އެންމެ އިސް ފަރާތަކީ ޗެއަރޕާސަން ކަމަށް ކަނޑައެޅުމަށް އަސާސީ ގަވާއިދަށް އިސްލާހު ހުށަހަޅައިފި. މި ބަދަލުތަކުގެ ތެރޭގައި ޗެއަރޕާސަންގެ ތިން ނައިބުން ތިބުމާއި ގައުމީ މަޖިލީހުގައި ދާއިރާތައް ތަމްސީލުކުރާ މެންބަރުންގެ އަދަދު ޕާޓީގެ މެންބަރުންގެ އާބާދީއަށް ބިނާކުރުން ހިމެނޭ
އެމްޑީޕީގެ ކޮންގްރެސްގެ ސެޝަނެއް | އެމްޑީޕީ ސެކްރިޓޭރިއެޓް
ސިޔާސީ ޕާޓީ އެއްގެ ގޮތުގައި އެމްޑީޕީގެ ހިންގުން ހަރުދަނާކޮށް، އެ ޕާޓީގެ އުސޫލުތައް ހަރުދަނާކޮށް، ވަރުގަދަ ކުރުމަށްޓަކައި، ޕާޓީގެ އަސާސީ ގަވާއިދަށް ބޮޑެތި އިސްލާހުތަކެއް ހުށަހަޅައިފި އެވެ.
މި އިސްލާހުތައް ހުށަހަޅުއްވާ، އެ ޕާޓީގެ ކުރީގެ ޗެއަރޕާސަން އަދި ކުރީގެ އިކޮނޮމިކް މިނިސްޓަރު ފައްޔާޒް އިސްމާއީލް ވިދާޅުވީ މި އިސްލާހުތަކަކީ ޕާޓީ އަށް މިހާރު މުހިއްމު އިސްލާހުތަކެއް ކަމަށެވެ. އަދި މި އިސްލާހުތަކުގެ އަމާޒަކީ ޕާޓީގެ އެތެރޭގެ ހިންގުން ދެފުށް ފެންނަ ނިޒާމަކަށް ބަދަލުކޮށް، މެންބަރުންގެ ބައިވެރިވުން އިތުރުކުރުން ކަމަށެވެ.
އިސްލާހުތަކަށް ބަލާއިރު ޕާޓީގެ ރައީސް އަދި ނައިބު ރައީސްގެ މަގާމު އުވާލުމަށް ވަނީ ހުށަހަޅާފަ އެވެ. މި ދެ މަގާމު އުވާލާއި، ޕާޓީގެ އެންމެ އިސް މީހަކީ ޕާޓީގެ ޗެއަރޕާސަން އަށް ހެދުމަށް ވަނީ ހުށަހަޅާފަ އެވެ. ގަވާއިދުގައި މިހާރު ބުނަނީ ޕާޓީ ވެރިކަމުގައި އޮންނަ ދުވަސްވަރު އެންމެ އިސް މީހަކީ އޭރު ގައުމުގެ ރައީސް ކަމަށެވެ. އެހެން ނަމަވެސް ހުށަހަޅާފައިވާ އިސްލާހުގައި ބަޔާންކޮށްފައިވާ ގޮތުން، ވެރިކަމުގައި އޮންނަ އިރު ވެސް އަދި އިދިކޮޅުގައި އޮންނަ އިރު ވެސް އެންމެ އިސް މީހަކީ ޗެއަރޕާސަން އެވެ.
އޭގެ އިތުރުން ޗެއަރޕާސަންގެ ނައިބުންގެ ގޮތުގައި ތިން ނައިބުން ތިބޭ ގޮތަށް ހެދުމަށް ހުށަހެޅުމާއެކު އޭގެ ތެރެއިން އެއް ނައިބަކީ އަންހެނަކަށް ހެދުމަށް ވެސް ހުށަހަޅާފައިވެ އެވެ. މިހާރު ތިބެނީ ދެ ނައިބުންނެވެ. އެއީ އިދާރީ ކަންކަމަށް ހާއްސަ ނައިބަކާއި މާލީ ކަންކަމަށް ހާއްސަ ނައިބެކެވެ. އިތުރު ކުރުމަށް ހުށަހަޅާފައި ވަނީ ސިޔާސީ ކަންކަމަށް ޚާއްސަ ނައިބެކެވެ.
އެމްޑީޕީ އިން އެ ޕާޓީގެ އަސާސީ ގާނޫނަށް ގެންނަ އިސްލާހުގައި ފާހަގަކޮށްފައިވާ ބައެއް މުހިއްމު ކަންކަމުގެ ތެރޭގައި އެމްޑީޕީގެ ގައުމީ މަޖިލީހުގައި ދާއިރާ ތަމްސީލުކުރާނެ މެންބަރުން ހޮވުމުގައި އަމަލުކުރާނީ އެތަނެއްގައި ޕާޓީގެ މެންބަރުން ތިބި އަދަދަށް ބަލައިގެން ކަމަށް ބަޔާންކޮށްފައިވުން ހިމެނެ އެވެ.
އެގޮތުން ސިޓީތަކާއި، އެއް ރަށެއްގައި އެއް ދާއިރާ އަށް ވުރެ ގިނަ ދާއިރާ ހިމެނޭ ރަށްތައް ފިޔަވައި ކޮންމެ ރަށެއްގައި ޕާޓީގެ 100 މެންބަރުން ހަމަވާނަމަ އެ ރަށަކުން ގައުމީ މަޖިލިސްގެ 1 މެންބަރުން، އަފި މެންބަރުންގެ އަދަދު 500 އަށް ވުރެ ގިނަ ނަމަ، އިތުރު މެންބަރެއް އަދި 1000 މެންބަރުން ހަމަވެއްޖެނަމަ 3 މެންބަރުން ގައުމީ މަޖިލީހުގައި އެ ދާއިރާ ތަމްސީލުކުރާ ގޮތް ހެދުން ހިމެނެ އެވެ.
މީގެ އިތުރުން ސިޓީތަކާއި އެއް ރަށެއްގައި އެއް ދާއިރާ އަށް ވުރެ ގިނަ ދާއިރާ ހިމެނޭ ރަށްތަކުގެ ކޮންމެ ރަށެއްގައި ޕާޓީގެ 100 މެންބަރުން ހަމަވާނަމަ އެ ރަށަކުން ގައުމީ މަޖިލިސްގެ 2 މެންބަރުން، އަފި މެންބަރުންގެ އަދަދު 500 އަށް ވުރެ ގިނަ ނަމަ، އިތުރު މެންބަރެއް އަދި 1000 މެންބަރުން ހަމަވެއްޖެ ނަމަ 3 މެންބަރުން ގައުމީ މަޖިލީހުގައި އެ ދާއިރާ ތަމްސީލުކުރާ ގޮތް ހެދުން ހިމެނެ އެވެ.
