ރާއްޖޭގެ އިގުތިސާދާއި ސިއްހީ ނިޒާމު މިއޮތީ ފުލުން ގޮސްފައި: ޝާހިދު
3 އޮކްޓޯބަރު 2026 | ހޮނިހިރު 20:48އެމްޑީޕީގެ ކޮންގްރެސް ނިންމުމުގެ ރަސްމިއްޔާތުގައި ވާހަކަފުޅު ދައްކަވަމުން އަބްދުﷲ ޝާހިދު ވިދާޅުވީ، މި ސަރުކާރުގެ ނާޤާބިލުކަމުން އިގުތިސާދާއި ވިޔަފާރިތައް ބޮޑު ހާސްކަމެއްގެ ތެރެއަށް ވެއްޓިފައިވާ ކަމަށް. އަދި ލާމަރުކަޒީ ނިޒާމު ބާރުވެރިކޮށް، ސިއްރު އެއްބަސްވުންތައް ހާމަކުރުމަށް ގޮވާލައްވައި، ރައްޔިތުން މި ދަންތުރައިން ސަލާމަތްކޮށްދޭނެ ކަމުގެ ޔަގީންކަން އެމަނިކުފާނު ދެއްވި
އެމްޑީޕީގެ ކުރީގެ ރައީސް, އަބްދުﷲ ޝާހިދު | އެމްޑީޕީ ސެކްރިޓޭރިއެޓް
ރާއްޖޭގެ އިގުތިސާދާއި، ސިއްހީ ނިޒާމާއި، ބޯހިޔާވަހިކަމުގެ އިތުރުން ވަޒީފާގެ ފުރުސަތުތައް މިއަދު މިއޮތީ މުޅިން ބޮއްސުންލައި ފުލުން ގޮސްފައި ކަމަށް އެމްޑީޕީގެ ކުރީގެ ރައީސް, އަބްދުﷲ ޝާހިދު ވިދާޅުވެއްޖެ އެވެ.
މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) ގެ 5 ވަނަ ކޮންގްރެސް ނިންމުމުގެ ރަސްމިއްޔާތުގައި ވާހަކަފުޅު ދައްކަވަމުން ޝާހިދު ވިދާޅުވީ، ޤައުމަށް ހެޔޮ ބަދަލެއް ގެނެސް، ރައްޔިތުންގެ ދިރިއުޅުމުގެ ފުދުންތެރިކަން އިތުރުކޮށްދީ، އިތުރު ފައިސާފޮއްޗެއް ދިވެހި ރައްޔިތަކަށް ހޯދައިދިން ހަމައެކަނި ޕާޓީއަކީ އެމްޑީޕީ ކަމަށެވެ.
ފަތުރުވެރިކަމުގެ ސިނާއަތާއި ކުދި އަދި މެދުފަންތީގެ ވިޔަފާރިތައް މިއަދު އޮތީ ބޮޑު ހާސްކަމެއްގެ ތެރޭގައި ކަމަށް ޝާހިދު ވިދާޅުވި އެވެ. އަދި ޓެކްސްތަކުގެ ދަންތުރަތަކާއި ޑޮލަރު މާރުކުރުމުގެ ނަމުގައި ބޮޑެތި އިންވެސްޓްމަންޓްތަކަށް ވާނުވާ ޖަހާފައިވާ ކަމަށާއި، ބޭރުގައި ކިޔަވަން ތިބި ކުދިން ކިޔެވުން ހުއްޓާލަންޖެހޭ ހިސާބަށް ކަންކަން ގޮސްފައިވާ ކަމަށް އެމަނިކުފާނު ވިދާޅުވި އެވެ. އަދި އަމިއްލަ އުފެއްދުންތެރިކަމުގައި ޒަމާނީ ޓެކްނޮލޮޖީ ބޭނުންކޮށްގެން ވިޔަފާރިކުރާ ޒުވާނުންގެ ނޭވާހޮޅި މި ސަރުކާރުން ބައްދާލާފައިވާ ކަމަށް ވެސް ޝާހިދު ވިދާޅުވި އެވެ.
ރާއްޖޭގެ ތަރައްޤީ ގުޅިފައިވަނީ ލާމަރުކަޒީ ނިޒާމާއި އެ ނިޒާމު ބާރުވެރިކުރުވުމާ ކަމަށް ޝާހިދު ފާހަގަކުރެއްވި އެވެ. މާލެ ވަށައިގެން މުޅި ޤައުމުގެ އިގުތިސާދު ހިފަހައްޓައިގެން ޤައުމު ތަރައްޤީ ނުކުރެވޭނެ ކަމަށާއި، ސަރުކާރުން ޚަރަދުކުރަންވީ ކައުންސިލްތަކަށް ކަމަށް އެމަނިކުފާނު ވިދާޅުވި އެވެ. އަދި ކައުންސިލްތަކާއި ޑަބްލިޔުޑީސީތަކުގެ މުސާރައާއި އިނާޔަތް ބޮޑުކުރުމަށް ވެސް ޝާހިދު ގޮވާލެއްވި އެވެ.
ޤާނޫނު އަސާސީއަށް ގެންނަންޖެހޭ އިސްލާހީ ބަދަލުތަކާ ގުޅޭގޮތުން ވާހަކަފުޅު ދައްކަވަމުން، އެމްޑީޕީގެ ކޮންގްރެސް އިން ނިންމާފައިވަނީ ރައްޔިތުންގެ މަޝްވަރާއާއެކު ބޮޑެތި ހެޔޮ ބަދަލުތަކެއް ގެނައުމަށް ކަމަށް ޝާހިދު ވިދާޅުވި އެވެ. މިއީ އެމްޑީޕީގެ ދުރުވިސްނޭކަމާއި ހަރުދަނާކަން ސާބިތުކޮށްދޭ ކަމެއް ކަމަށް ވެސް އެމަނިކުފާނު ފާހަގަކުރެއްވި އެވެ.
ބައިނަލްއަޤްވާމީ ގުޅުންތަކާއި ޑިޕްލޮމަސީގެ މުހިންމުކަމުގެ މައްޗަށް އަލިއަޅުއްވާލައްވަމުން، ފުށިދިއްގަރު ފަޅުގެ އެގްރީމެންޓަކީ އުފެދުމުގައި ވެސް އޮޅުވާލުމެއް އޮތް އަދި ސިއްރުކޮށްފައިވާ އެއްބަސްވުމެއް ކަމަށް ޝާހިދު ވިދާޅުވި އެވެ. ބޭރުގެ ކުންފުނިތަކާއެކު ވެވޭ އެއްބަސްވުންތައް ސިއްރުނުކޮށް ހާމަކުރުމަށް ޝާހިދު ގޮވާލެއްވި އެވެ. އަދި ކޮވިޑްގެ ބަލިމަޑުކަމުގެ ތެރޭގައި އެމްޑީޕީގެ ވެރިކަމުގައި ރާއްޖެ ހިންގާފައިވަނީ މުޅި ދުނިޔެއަށް ނަމޫނާއެއް ދައްކަމުން ކަމަށާއި، އިންޑިއާގެ އެހީތެރިކަމާއެކު ރައްޔިތުން ބަނޑަށްނުޖެހި ބޭހަށްނުޖެހި ކަންކަން މެނޭޖުކުރިކަން ޝާހިދު ފާހަގަކުރެއްވި އެވެ.
ރާއްޖެއަށް ބޭނުންވަނީ ބޭސް ސިޓީއަށް ސަލާންޖަހަން ނުޖެހޭ، ދަރަނިން މިންޖުވާ، ބޯހިޔާވަހިކަން ލިބޭ، އަދި ވަޒީފާގެ ފުރުސަތު ލިބޭ އޯގާތެރި ހެޔޮ ވެރިކަމެއް ކަމަށް ޝާހިދު ވިދާޅުވި އެވެ. އަދި މި ސަރުކާރަކީ ނާޤާބިލު، ދޮގުހަދާ، އަދި ރައްޔިތުންނަށް އޮޅުވާލާ ސަރުކާރެއް ކަމަށް ސިފަކުރައްވައި، ކުރިއަށް އޮތް ތަނުގައި މި ސަރުކާރު ބަލިކޮށް ރައްޔިތުން މި ދަންތުރައިން ސަލާމަތްކުރާނެ ކަމަށް ޝާހިދު ވިދާޅުވި އެވެ.
