އެމްޑީޕީގެ "ބޮޑު ބަދަލު" ސިޔާސަތު ކޮންގްރެސްގެ ބޮޑު އަޣުލަބިއްޔަތަކުން ފާސްކޮށްފި
3 އޮކްޓޯބަރު 2026 | ހޮނިހިރު 13:45ވެރިކަމުގެ ނިޒާމާއި ގާނޫނު އަސާސީއަށް ބޮޑެތި ބަދަލުތަކެއް ގެނައުމަށް ފައްޔާޒު އިސްމާއީލް ހުށަހެޅުއްވި ކަރުދާހުގައި، ދައުލަތުގެ ވެރިޔާ އާއި ސަރުކާރުގެ ވެރިޔާ ވަކިކުރުމަށާއި ފަނޑިޔާރުން ވަކިކުރުމުގައި ރައްޔިތުންގެ ރުހުން ހޯދަންޖެހޭ ގޮތަށް ވަނީ ހިމަނާފައި. މީގެ އިތުރުން މަޖިލިސް މެންބަރުން ވަކިކުރުމުގެ ބާރު ރައްޔިތުންނަށް ދިނުމަށް ހުށަހަޅާފައިވަނީ، މިހާރު އޮތް ނިޒާމުގައި ވެރިމީހާގެ ބާރުތައް އިންތިހާއަށް ބޮޑުވެފައިވާތީ ކަމަށް އޭނާ ވިދާޅުވި
ފައްޔާޒް އިސްމާއީލް "ބޮޑުބަދަލު" ގަރާރު ހުށަހަޅުއްވަނީ | އެމްޑީޕީ ސެކްރިޓޭރިއެޓް
ގާނޫނު އަސާސީ އާއި ވެރިކަން ހިންގުމުގެ ނިޒާމަށް ބޮޑެތި އިސްލާހުތަކެއް ގެނައުމަށް އެމްޑީޕީގެ ކުރީގެ ޗެއަރޕާސަން ފައްޔާޒު އިސްމާއީލް ހުށަހެޅުއްވި "ބޮޑު ބަދަލު" ސިޔާސަތު ކަރުދާސް، އެ ޕާޓީގެ ކޮންގްރެސްގެ ބޮޑު އަޣުލަބިއްޔަތަކުން ފާސްކޮށްފި އެވެ.
މި ހުށަހެޅުންތައް ހޮނިހިރު ދުވަހުގެ ކޮންގްރެސްގެ މެންދުރުފަހު ދަންފަޅިއަށް ހުށަހަޅުއްވާފައި ވަނީ އެ ޕާޓީގެ ކުރީގެ ޗެއަރޕާސަން އަދި ކުރީގެ އިކޮނޮމިކް މިނިސްޓަރު ފައްޔާޒު އިސްމާއީލް އެވެ. އެ ގަރާރަށް ތާއީދު ކުރެއްވީ އެމްޑީޕީގެ މެންބަރޝިޕް ކޮމިޓީގެ ކޯރ ޗެއަރ އަދި ރައްޔިތުންގެ މަޖިލީހުގެ ހުޅުދޫ ދާއިރާގެ ކުރީގެ މެންބަރު އިލްޔާސް ލަބީބް އެވެ.
ޖުމްލަ 520 ވޯޓުން އެންޑޯޒްކުރެވުނު މި ގަރާރުގެ މައިގަނޑު މަގުސަދަކީ ގާނޫނު އަސާސީއަށާއި ވެރިކަމުގެ ވައްޓަފާޅިއަށާއި މަޖިލީހަށް ރައްޔިތުންގެ ބައިވެރިވުން އިތުރުކޮށް، އިގުތިސާދީ ފުދުންތެރިކަން ވަރުގަދަ ކުރުމެވެ. މި ގަރާރުގައި ހިމެނޭ އެންމެ ފާހަގަކޮށްލެވޭ އެއް ބަދަލަކީ ދައުލަތުގެ ވެރިޔާ އާއި ސަރުކާރުގެ ވެރިޔާ ވަކިކޮށް، އެ މަގާމުތަކަށް މީހުން އައްޔަނުކުރާ އުސޫލު ބަދަލު ކުރުމެވެ.
އެގޮތުން، ސަރުކާރުގެ ވެރިޔާ ރައްޔިތުންގެ ސީދާ ވޯޓަކުން އިންތިހާބުކުރާއިރު، ދައުލަތުގެ ވެރިޔާ އިންތިހާބުކުރުމަށް ހަމަޖެހިފައިވަނީ ރައްޔިތުންގެ މަޖިލީހާއި ކައުންސިލްތަކުން ނަގާ ވޯޓަކުންނެވެ.
މީގެ އިތުރުން، މިނިވަން މުއައްސަސާތަކާއި ފަނޑިޔާރުގެއަށް ސިޔާސީ ނުފޫޒު ފޯރުވުން ހުއްޓުވުމަށްޓަކައި، ސުޕްރީމް ކޯޓުގެ ފަނޑިޔާރުންނާއި މިނިވަން ކޮމިޝަންތަކުގެ މެންބަރުން ވަކިކުރުމަށް ރައްޔިތުންގެ ރުހުން ހޯދަންޖެހޭ ގޮތަށް ހަމަޖެއްސުމަށް ވެސް ހުށަހަޅާފައިވެ އެވެ. އަދި ރައްޔިތުންގެ މަޖިލީހުގައި އަތޮޅުތައް ރަނގަޅަށް ތަމްސީލުކުރުމުގެ ފުރުސަތު ދިނުމާއި، މަޖިލިސް މެންބަރުންގެ މަސައްކަތް ރަނގަޅު ނޫންނަމަ، ރައްޔިތުންނަށް އެ މެންބަރުން ރިކޯލް ކުރުމުގެ ނުވަތަ އާންމު ވޯޓަކުން މަގާމުން ވަކިކުރުމުގެ ބާރު ލިބޭ ގޮތަށް ކަންކަން ބަދަލުކުރުމަށް ވަނީ ހިމަނާފަ އެވެ.
ކޮންގްރެސްއަށް މި ގަރާރު ހުށަހަޅުއްވަމުން ފައްޔާޒު ވިދާޅުވީ، މިހާރު އޮތް ނިޒާމުގައި ރައްޔިތުންގެ ހައްގުތަކަށް ވުރެ ވެރިމީހާގެ ބާރުތައް މާބޮޑަށް އިތުރުވެފައިވާ ކަމަށެވެ. ޚާއްސަކޮށް ސަރުކާރުން މަޖިލީހުގެ ސުޕަރ މެޖޯރިޓީ ބޭނުންކޮށްގެން ގާނޫނު އަސާސީގެ ޗެކްސް އެންޑް ބެލެންސްގެ ނިޒާމު ނައްތާލަމުންދާކަން ފާހަގަކުރައްވައި، ރައްޔިތުންގެ ހައްގުތައް ކަށަވަރުކުރުމަށްޓަކައި މި ހިންގުމުގެ ނިޒާމާމެދު އަލުން ވިސްނާ ފިކުރުކުރަންޖެހިފައިވާ ކަމަށް އޭނާ ވިދާޅުވި އެވެ.
ފައްޔާޒު ވިދާޅުވީ ދިވެހި ދައުލަތުގެ އެންމެހައި ބާރުތައް ފެށިގެން އަންނަނީ ރައްޔިތުންގެ ކިބައިން ކަމަށާއި އަދި އެ ބާރުތައް ދެމި އޮންނާނީ ވެސް ރައްޔިތުންގެ ކިބައިގައި ކަމަށް ގާނޫނު އަސާސީގައި ބުނެފައިވާއިރު، ރައްޔިތުން ތަމްސީލުވާ މިންވަރާ ރައްޔިތުންގެ ބަސް ސީދާ އިއްވޭ މިންވަރު މިހާރު ވަނީ ވަރަށް ބޮޑަށް ކުޑަކޮށްލާފައި ކަމަށެވެ.
