އެމްޑީޕީ ކޮންގްރެސް: ފައްޔާޒްގެ އިސްލާހުތައް ގަނޑުކޮށް ފާސްކުރާތީ މެންބަރުންގެ ކަންބޮޑުވުން
3 އޮކްޓޯބަރު 2026 | ހޮނިހިރު 11:34އެމްޑީޕީގެ ލީޑަރޝިޕަށް ބޮޑެތި ބަދަލުތަކެއް ގެނައުމަށް ޗެއަރޕާސަން ހުށަހެޅުއްވި އިސްލާހުތައް ގަނޑުކޮށް ފާސްކުރަން އުޅޭތީ، ބައެއް މެންބަރުން ވަނީ އެއީ ހުދުމުހުތާރު އުސޫލެއް ކަމަށް ބުނެ ކަންބޮޑުވުން ފާޅުކޮށްފައި. ނަމަވެސް ފައްޔާޒް އިސްމާއީލް ވިދާޅުވީ ވަކިވަކި މާއްދާތަކަށް ވޯޓަށް އެހުމަކީ އަމަލީ ގޮތުން ދަތި ކަމެއް ކަމަށް. މި ހިޔާލުތަފާތުވުންތަކާއެކު ޕާޓީގެ އަސާސީ ގަވާއިދަށް ގެންނަ މި ބަދަލުތަކުގެ މަސައްކަތް ކޮންގްރެސްގައި ދަނީ ކުރިއަށް
އެމްޑީޕީގެ ކުރީގެ ޗެއަރޕާސަން ފައްޔާޒް އިސްމާއީލް | ސޯޝަލް މީޑިއާ
މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) ގެ އަސާސީ ގަވާއިދަށް އެ ޕާޓީގެ ޗެއަރޕާސަން ފައްޔާޒް އިސްމާއީލް ހުށަހެޅުއްވި އިސްލާހުތައް އެއްކޮށް، ގަނޑުކޮށް ފާސްކުރަން އުޅޭތީ އެޕާޓީގެ ކޮންގްރެސްގެ ބައެއް މެންބަރުން ކަންބޮޑުވުން ފާޅުކުރަން ފަށައިފި އެވެ.
އެމްޑީޕީގެ ކޮންގްރެސްގައި ފައްޔާޒް ހުށަހެޅުއްވި އިސްލާހުތަކުގެ ތެރޭގައި ޕާޓީގެ ލީޑަރޝިޕަށް ބޮޑެތި ބަދަލުތަކެއް ގެނައުން ހިމެނެ އެވެ. އެގޮތުން އިތުރު ނައިބު ޗެއަރޕާސަނެއް ހަމަޖެއްސުމާއި، ކޮންގްރެސް އެކުލެވިގެންވާ ގޮތަށް ބަދަލު ގެނައުމާއި، ގައުމީ މަޖިލީހަށް މެންބަރުން އިތުރުކުރުމުގެ އިތުރުން، ޕާޓީގެ ރިޔާސީ ކެންޑިޑޭޓު ތަބާވާންޖެހޭ އުސޫލުތައް ކަނޑައެޅުން ހިމެނެ އެވެ.
މި އިސްލާހުތަކަށް ކޮންގްރެސްގެ ގިނަ މެންބަރުންތަކެއް ތާއީދުކުރި ނަމަވެސް، ބައެއް މެންބަރުން ވަނީ މި ބަދަލުތަކާ މެދު ހިތްހަމަނުޖެހުން ފާޅުކޮށްފަ އެވެ. ވަކިން ހާއްސަކޮށް، އާބާދީއަށް ބަލައި ގައުމީ މަޖިލީހަށް މެންބަރުން އިތުރުކުރުމަށާއި، ޕާޓީގެ ބައެއް މަގާމުތައް އުވާލައި ހުރިހާ ބާރުތަކެއް ޗެއަރޕާސަނަށް ލިބޭ ގޮތަށް ހުށަހަޅާފައިވާ މާއްދާތަކަށް ބައެއް މެންބަރުން ވަނީ ދެކޮޅު ހަދާފަ އެވެ. އަދި މިއީ ޕާޓީގެ ތެރޭގައި ހުދުމުހުތާރު އުސޫލުތަކެއް ގާއިމުކުރުން ކަމަށް ބުނެ އެ މެންބަރުން ވަނީ ސިފަކޮށްފަ އެވެ. މީގެއިތުރުން ހުރިހާ އިސްލާހަކަށް އެއްފަހަރާ ގަނޑުކޮށް ވޯޓަށް އެހުމަކީ ޑިމޮކްރެޓިކް ހަމަތަކާ ހިލާފު ކަމެއް ކަމަށް ވެސް އެ ފަރާތްތަކުން ފާހަގަކުރެ އެވެ.
މެންބަރުންގެ މި ކަންބޮޑުވުންތަކަށް ރައްދު ދެއްވަމުން ޗެއަރޕާސަން ފައްޔާޒް އިސްމާއީލް ވިދާޅުވީ، އޭނާ މި އިސްލާހުތައް ހުށަހެޅުއްވީ ގަވާއިދަށް އިސްލާހު ހުށަހެޅުމަށް ޕާޓީން ހުޅުވާލި ރަސްމީ ފުރުސަތުގެ ތެރެއިން ކަމަށެވެ. އަދި ކޮންގްރެސް ފަދަ ބޮޑު އެއްވުމެއްގައި ކޮންމެ މާއްދާއަކަށް ވަކިވަކިން ވޯޓަށް އެހުމަކީ ކުރީގެ ތަޖުރިބާތަކަށް ބަލާއިރު ވެސް އަމަލީ ގޮތުން ދަތި އަދި އުނދަގޫ ކަމެއް ކަމަށް ފައްޔާޒް ވިދާޅުވި އެވެ.
މި އިސްލާހުތަކާ ގުޅިގެން ކޮންގްރެސްގެ ތެރޭގައި ހިޔާލު ތަފާތުވުންތައް އުފެދިފައިވާއިރު، އެމްޑީޕީގެ އަސާސީ ގަވާއިދަށް މި ގެންނަ ބަދަލުތަކަކީ ކުރިއަށް އޮތް ތަނުގައި ޕާޓީ ހިންގުމުގެ އޮނިގަނޑަށް ބޮޑެތި ބަދަލުތަކެއް އަންނާނެ ކަންކަމެވެ.
އެމްޑީޕީގެ 5 ވަނަ ކޮންގްރެސް ބުރާސްފަތި ދުވަހުގެރޭ ފަށާފައިވާއިރު މި ކޮންގްރެސް ހޮނިހިރު ދުވަހުގެ ނިޔަލަށް ކުރިއަށް ދާނެ އެވެ. ކޮންގްރެެސްގެ ތެރޭއިން ހުކުރު ދުވަހުގެ މެންދުރު ފަހުން ފެށިގެން އެ ދުވަހު އެއްކޮށް އިންވެސްޓްމަންޓް ފޯރަމްއާ ގުޅޭ ކަންކަން ކުރިއަށް ގެންދިޔުމަށް ފަހު، ހޮނިހިރު ދުވަހު އޮތީ ކޮންގްރެސްގެ ރިޕޯޓު ހުށަހެޅުމުގެ އިތުރުން، އެމްޑީޕީގެ އެޕްލިކޭޝަން ލޯންޗުކުރުމެވެ.
