ކައުންސިލްތަކަށް ދައުލަތުން ދޭ ބްލޮކް ގްރާންޓްގެ އަދަދު 3 ގުނަ ބޮޑުކޮށް، ކައުންސިލް ހޮވަން ވޯޓުލެވޭ ގޮތް ބަދަލުކުރާ "ލާމަރުކަޒީ ސިޔާސަތު" އެމްޑީޕީ އިން ފާސްކޮށްފި
3 އޮކްޓޯބަރު 2026 | ހޮނިހިރު 13:43ކައުންސިލްތަކަށް ދޭ ބްލޮކް ގްރާންޓް 15 އިންސައްތައަށް ބޮޑުކުރުމަށާއި، ދިރިއުޅޭ ރަށެއްގެ ކައުންސިލް ހޮވުމަށް ވޯޓުލުމުގެ އިހުތިޔާރު ރައްޔިތުންނަށް ދިނުމަށް އެމްޑީޕީގެ ކޮންގްރެސްއިން ފާސްކޮށްފި. މީގެއިތުރުން ކައުންސިލްތަކުގެ އިދާރީ ހިންގުން ސިވިލް ސަރވިސްއިން ވަކިކުރުމަށާއި، އަންހެނުންގެ ތަރައްގީއަށް މަސައްކަތްކުރާ ކޮމިޓީތައް އުވާލައި ކައުންސިލް ގޮނޑިތައް ދެޖިންސަށް ހަމަހަމަވާނެހެން ބަދަލުކުރުމަށް ވެސް ވަނީ ނިންމާފައި
އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ސިޔާސަތާ ގުޅޭގޮތުން، އަލީ ނިޔާޒު ހުށަހެޅުއްވި ކަރުދާހުގައި، ރާއްޖެއަކީ ފުރިހަމަ މާނައިގައި ލާމަރުކަޒީ ނިޒާމަކުން ހިންގާ ގައުމަކަށް ހެދުމަށްޓަކައި، ކައުންސިލްތަކަށް އިގުތިސާދީ އަދި އިދާރީ ބާރުވެރިކަން ހޯދައިދިނުމަށް ވަނީ ގޮވާލައްވާފައި | އެމްޑީޕީ ސެކްރިޓޭރިއެޓް
ކައުންސިލްތަކަށް ބްލޮކް ގްރާންޓްގެ ގޮތުގައި ދައުލަތުގެ ބަޖެޓުން ދޭ އަދަދު 3 ގުނަ އިތުރުކޮށް، ކައުންސިލް ހޮވަން ވޯޓުލެވޭ ގޮތް ބަދަލުކުރާ "ލާމަރުކަޒީ ސިޔާސަތު" އެމްޑީޕީގެ ކޮންގްރެސްއަށް ހާޒިރުވި މަންދޫބުންގެ ބޮޑު އަޣުލަބިއްޔަތަކުން ފާސްކޮށްފި އެވެ.
ލާމަރުކަޒީ ނިޒާމަށް ގެންނަން ފެންނަ ބަދަލުތައް ހިމަނައިގެން އެކުލަވާލާފައިވާ މި ހުށަހެޅުންތައް ހޮނިހިރު ދުވަހުގެ ކޮންގްރެސްގެ މެންދުރުފަހު ދަންފަޅިއަށް ހުށަހަޅުއްވާފައި ވަނީ އެ ޕާޓީގެ ލާމަރުކަޒީ ކޮމިޓީގެ މުގައްރިރު އަދި ރައްޔިތުންގެ މަޖިލީހުގެ ހުޅުމާލެ ދާއިރާގެ ކުރީގެ މެންބަރު އަލީ ނިޔާޒް އެވެ.
ކައުންސިލް އިންތިހާބުތަކުގައި މިހާރު އޮންނަގޮތުން ދާއިމީ އެޑްރެސް އޮންނަ ރަށަކަށް ވޯޓުލާން މަޖުބޫރުވާ އުސޫލު ބަދަލުކޮށް، އެމީހަކު ދިރިއުޅޭ ރަށެއްގެ ކައުންސިލް ހޮވުމަށް ވޯޓުދިނުމުގެ އިހުތިޔާރު ލިބޭގޮތަށް އެމްޑީޕީގެ ކޮންގްރެސްއަށް ސިޔާސަތު ކަރުދާހެއް ހުށަހަޅާފައިވެ އެވެ.
ނިޔާޒް ހުށަހަޅުއްވައި، މަރިޔަމް ޝިއުނާ ތާއީދު ކުރައްވާފައިވާ މި ގަރާރުގައި އިސްލާހު ހުށަހަޅާފައި ވަނީ މައިގަނޑު 5 ދާއިރާއަކުންނެވެ. އެ ގަރާރުގައިވާ އެންމެ ބޮޑު އެއް ކަމަކީ ކައުންސިލްތައް އިންތިހާބު ކުރާ އުސޫލު ބަދަލުކުރުމެވެ. މިގޮތުން، ދިރިއުޅޭ ރަށެއްގެ ރައްޔިތުންނަށް އެ ރަށެއްގެ ކައުންސިލަރުން އިންތިހާބު ކުރުމަށް ސީދާ ވޯޓުލެވޭނެ ގޮތް ހަމަޖެއްސުން ހިމެނެ އެވެ.
ސަބަބެއްގެ ގޮތުގައި ބުނެފައިވަނީ މީގެ ކުރިން ކިތަންމެ ދިގުމުއްތަކަށް ރަށުން ބޭރުގައި އުޅުނު ނަމަވެސް ދާއިމީ އެޑްރެސް އޮންނަ ރަށަކަށް ވޯޓުލާން ޖެހުމުގެ މަޖުބޫރުކަން ނިމުމަކަށް ގެނައުމެވެ. އަލީ ނިޔާޒު ފާހަގަކުރެއްވި ގޮތުގައި މި ބަދަލާއެކު މީހަކު ބޭނުންނަމަ އެމީހެއްގެ ދާއިމީ އެޑްރެސް އޮންނަ ރަށަށް ނުވަތަ ސިޔާސީ ބޭނުންތަކަށްޓަކައި އެ ރަށަކަށް ވޯޓުލުމުގެ އިހުތިޔާރު ވެސް ލިބިގެންދާނެ އެވެ.
މި ގަރާރު އެކުލަވާލާފައި ވަނީ ރާއްޖޭގައި ލާމަރުކަޒީ ނިޒާމު ހިންގައިގެން މިހާތަނަށް ލިބިފައިވާ ތަޖުރިބާތަކާއި، ދިވެހިރާއްޖޭގެ ގައުމީ ޔުނިވާސިޓީއާއި ލޯކަލް ކައުންސިލް އެސޯސިއޭޝަނުން މިކަމާ ގުޅޭގޮތުން ހަދާފައިވާ ދިރާސާތަކުގެ އަލީގައި ކަމަށް އަލީ ނިޔާޒު ވިދާޅުވި އެވެ.
ގަރާރުގައިވާ އެހެން ކަންކަމުގެ ތެރޭގައި، ކައުންސިލްތަކަށް ބްލޮކް ގްރާންޓްގެ ގޮތުގައި ދައުލަތުގެ ބަޖެޓުން ދޭ 5 އިންސައްތައިގެ އަދަދު ތިން ގުނަ ބޮޑުކޮށް 15 އިންސައްތަ އަށް ބޮޑުކުރުމާއި، ގްރީން ފަންޑުގެ 20 އިންސައްތަ އާއި ބިމު ކުލީގެ 50 އިންސައްތަ އަދި މަރުކަޒީ ޓެކްސްތަކުގެ 5 އިންސައްތަ ކައުންސިލްތަކަށް ދިނުމާމެދު މަޝްވަރާކުރުމަށް ހުށަހަޅާފައިވެ އެވެ.
މީގެއިތުރުން، ކައުންސިލްތަކުގެ އިދާރީ ހިންގުން ސިވިލް ސަރވިސް އިން ވަކިކޮށް، މުވައްޒަފުން އައްޔަނުކުރުމާއި ވަކިކުރުން އަދި ޕްރޮމޯޝަން ދިނުންފަދަ އިދާރީ ބާރުތައް ސީދާ ކައުންސިލްތަކަށް ދިނުމަށް ހިމަނާފައިވެ އެވެ. މި ކަރުދާހުގައި އިތުރަށް ހުށަހަޅާފައިވާ ކަންކަމުގެ ތެރޭގައި، ކައުންސިލްގެ ރައީސާއި ނައިބު ރައީސް ފިޔަވައި ދެން ތިބޭ މެންބަރުން ދުވަހުން ދުވަހަށް އޮފީހަށް ހާޒިރުވާން ނުޖެހޭގޮތަށް ބަދަލުކޮށް، ހާޒިރުވާ ޖަލްސާތަކަށް ނުވަތަ މަސައްކަތްތަކަށް ވަކި އެލެވަންސެއް ދިނުމާއެކު ގިނަ ދާއިރާތަކުން އިތުރު ކައުންސިލަރުން އިންތިހާބުކުރުމުގެ ފުރުސަތު ހުޅުވާލުން ހިމެނެ އެވެ. އަދި އަންހެނުންގެ ތަރައްގީއަށް މަސައްކަތް ކުރާ ކޮމިޓީ އުވާލައި، ކައުންސިލް ރައީސް ފިޔަވައި ދެން އިންތިހާބުކުރާ ކައުންސިލަރުންނަކީ ދެ ޖިންސަށް ހަމަހަމަ ގޮނޑިތަކެއް ލިބޭގޮތަށް އޮންނަ ނިޒާމަކަށް ލާމަރުކަޒީ ނިޒާމު ހެދުމަށް ވެސް އެ ގަރާރުގައިވެ އެވެ.
މި ގަރާރު ފާސްކޮށްފައި ވަނީ ހާޒިރުވެ ތިއްބެވި 564 މަންދޫބުންގެ ތެރެއިން 560 މަންދޫބުންގެ ވޯޓުންނެވެ.
