ވަރުގަދަ ޑިމޮކްރަސީއެއްގެ ހަގީގީ އެއް ބިންގަލަކީ އާންމު ރައްޔިތުންގެ ފުދުންތެރިކަމާއި ހަރުދަނާ އިގުތިސާދެއް: ޝާހިދު
2 އޮކްޓޯބަރު 2026 | ހުކުރު 17:47އެމްޑީޕީގެ ކޮންގްރެސްގެ ތެރެއިން ބޭއްވި އިންވެސްޓްމަންޓް ފޯރަމަކީ އިންވެސްޓަރުންގެ އިތުބާރު ހޯދައި، ކައުންސިލްތަކާއި އިންވެސްޓަރުން ގުޅުވައިދިނުމަށް އެޅުނު މުހިންމު ބިންގަލެއް ކަމަށް އަބްދުﷲ ޝާހިދު ވިދާޅުވެއްޖެ. މި ފޯރަމްގެ މައިގަނޑު މަގްސަދަކީ ރަށްރަށުގެ އިގުތިސާދު ވަރުގަދަކޮށް، ކައުންސިލްތަކުން ހުށަހަޅާފައިވާ ވިޔަފާރީގެ 100 މަޝްރޫއު މެދުވެރިކޮށް ރައްޔިތުންގެ ފުދުންތެރިކަން އިތުރުކުރުން ކަމަށް ރައީސް ނަޝީދު ވިދާޅުވި
އެމްޑީޕީގެ ކުރީގެ ރައީސް އަބްދުﷲ ޝާހިދު | ރާއްޖެއެމްވީ
ވަރުގަދަ ޑިމޮކްރަސީއެއްގެ ހަގީގީ އެއް ބިންގަލަކީ އާންމު ރައްޔިތުންގެ ފުދުންތެރިކަމާއި ހަރުދަނާ އިގުތިސާދެއް ކަމަށް ކުރީގެ ފޮރިން މިނިސްޓަރު އަދި އެމްޑީޕީގެ ކުރީގެ ރައީސް އަބްދުﷲ ޝާހިދު ވިދާޅުވެއްޖެ އެވެ.
އެމްޑީޕީގެ ކޮންގްރެސްގައި ކުރިއަށްގެންދާ އިންވެސްޓްމަންޓް ފޯރަމްއާ ގުޅިގެން ހިއްސާ ކުރެއްވި ޕޯސްޓެއްގައި ޝާހިދު ވިދާޅުވީ ވަރުގަދަ ޑިމޮކްރަސީއަކަށް އެންމެ މުހިއްމީ އާންމު ރައްޔިތުންގެ ފުދުންތެރިކަމާއި ހަރުދަނާ އިގުތިސާދެއް އޮތުުން ކަމަށާއި މުހިންމީ އިންވެސްޓްމަންޓްތަކަށް ފަހި މާހާއުލެއް ގައުމުގައި އޮތުން ކަމަށެވެ.
އޭގެ އިތުރުން އިންވެސްޓަރުންގެ އިތުބާރު އެ ގައުމަކަށް އޮތުމަކީ މުހިއްމު ކަމެއް ކަމަށާއި އެމްޑީޕީގެ 5 ވަނަ ކޮންގްރެސްގައި ކުރިޔަށްދާ އިންވެސްޓްމަންޓް ފޯރަމުން އިންވެސްޓަރުންނާއި ކައުންސިލްތަކާ ދެމެދު އަޅައި ދޭނެ ބިންގަލަކީ އެއީ ކަމަށެވެ.
މި ފޯރަމާ ގުޅިގެން އެ ޕާޓީގެ ޗެއަރޕާސަން، ކުރީގެ ރައީސް މުހައްމަދު ނަޝީދު ވިދާޅުވީ އެ ފޯރަމްގެ ބޭނުމަކީ، ރަށްރަށުން އެކިއެކި ބޭނުމަށް މާލެ އަށް އަންނަ ރައްޔިތުން އެދޭފަދަ ދިރިއުޅުމެއް، އެ ރަށްރަށުން ހޯދައިދީ ރަށްރަށުގެ އިގުތިސާދީ ހާލަތު ރަނގަޅު ކުރުން ކަމަށެވެ.
ރައީސް ނަޝީދު ވިދާޅުވީ، ކައުންސިލްތަކުން ޕްރޮޖެކްޓްތައް އުފެއްދުމުގެ ބޭނުން، އަދި އެ މީހުން ޕްރޮޖެކްޓުތައް ތަންފީޒުކުރުމުގެ ބޭނުން އިންތިހާ އަށް ބޮޑު ކަމަށެވެ. އެމަނިކުފާނު ވިދާޅުވީ އެ ޕާޓީގެ ޕްރޮޖެކްޓް އޮފީހުން، ކައުންސިލްތަކާއެކު މަސައްކަތްތަކެއް ކޮށްފައިވާ ކަމަށެވެ. އެގޮތުން، ކައުންސިލްތަކުން ވަނީ ވިޔަފާރީގެ 100 ޕްރޮޖެކްޓު ހުށަހަޅާފައި ކަމަށް ނަޝީދު ވިދާޅުވި އެވެ.
