އަމާޒަކީ މާލެ އިން ރައްޔިތުން ހޯދަން އެދޭ ދިރިއުޅުން ރަށްރަށުން ހޯދާ ދީ، ރަށްރަށުގެ އިގްތިސާދީ ހާލަތު ރަނގަޅު ކުރުން: ނަޝީދު
2 އޮކްޓޯބަރު 2026 | ހުކުރު 14:19ރަށްރަށުގެ އިގްތިސާދު ކުރިއަރުވައި ވަޒީފާގެ ފުރުސަތުތައް އިތުރުކުރުމަށްޓަކައި ކައުންސިލްތަކުން އިސްނަގައިގެން ވިޔަފާރި ޕްރޮޖެކްޓްތައް ހިންގުމުގެ މުހިންމުކަން ރައީސް ނަޝީދު ފާހަގަކުރެއްވި. މިގޮތުން ކައުންސިލްތަކުން ހުށަހަޅާފައިވާ 100 މަޝްރޫއަކަށް އިންވެސްޓްކުރުމުގެ ފުރުސަތު ހުޅުވާލުމުން، ރަށްރަށުން މީހުން ހިޖުރަކުރުން ހުއްޓުވައި މާލީގޮތުން ކައުންސިލްތައް ބާރުވެރިވުމަށް މަގުފަހިވާނެ.
އެމްޑީޕީގެ ޗެއަރޕާސަން، ކުރީގެ ރައީސް މުހައްމަދު ނަޝީދު | އެމްޑީޕީ ސެކްރިޓޭރިއެޓް
އެމްޑީޕީ ގެ ކޮންގްރެސްގައި ކުރިއަށް ގެންދާ އިންވެސްޓްމަންޓް ފޯރަމްގެ ބޭނުމަކީ، ރަށްރަށުން އެކިއެކި ބޭނުމަށް މާލެ އަށް އަންނަ ރައްޔިތުން އެދޭފަދަ ދިރިއުޅުމެއް، އެ ރަށްރަށުން ހޯދައިދީ ރަށްރަށުގެ އިގްތިސާދީ ހާލަތު ރަނގަޅު ކުރުން ކަމަށް، އެ ޕާޓީގެ ޗެއަރޕާސަން، ކުރީގެ ރައީސް މުހައްމަދު ނަޝީދު ވިދާޅުވެއްޖެ އެވެ.
އެމްޑީޕީގެ ކޮންގްރެސްގައި، އެ އިންވެސްޓްމަންޓް ފޯރަމް ފައްޓަވަމުން ހުކުރު ދުވަހު ދެއްކެވި ވާހަކައިގައި ރައީސް ނަޝީދު ވިދާޅުވީ، ކައުންސިލްތަކުން ޕްރޮޖެކްޓްތައް އުފެއްދުމުގެ ބޭނުން، އަދި އެ މީހުން ޕްރޮޖެކްޓުތައް ތަންފީޒުކުރުމުގެ ބޭނުން އިންތިހާ އަށް ބޮޑު ކަމަށެވެ.
ތިބޭފުޅުންނަށް އެނގިލައްވާނެ، މިހާރު ކިނބިދޫގައި ގްރޭޑް 1 ނެތް. އަދި މިހެން ގޮސް ގްރޭޑް 1 ނެތް ކިތަންމެ ރަށެއް އެބައޮތް. މި ރަށްރަށް މިދަނީ ފަޅުވަމުން. މި އަންނަ އަހަރު ގްރޭޑް 2 ނޯންނާނެ. އަނެއް އަހަރު ގްރޭޑް 3 ނޯންނާނެ. ދެން އަނެއްކާ މާލެ ސަރަހައްދުގައި އެންމެ ބައިވަރު ޕްރޮޖެކްޓުތައް މި އަންނަނީ ރަސްމާލެ މި އަންނަނީ. އެކިއެކި މާލެ ކިޔައިގެން އެބަ އާދޭ. ހުޅުމާލެ އެބައޮތް. ވިލިމާލެ އެބައޮތް. އަނެއްކާ ރަސްމާލެ. މިތަނަށް އެބަ އާދޭ ވަރަށް ބައިވަރު ޕްރޮޖެކްޓްތައް. އެހެންވީމާ ރާއްޖޭގެ ރަށްރަށުގެ ރައްޔިތުން މިތަންތަނަށް އަންނާނެ. ވަޒީފާގެ ފުރުސަތަށާ، އާމްދަނީ ހޯދުމަށާ، ދަރިންނަށް ކިޔަވައިދޭންށާ، ބޭސްފަރުވާ އަށާ. އަދި މުނިފޫހި ފިލުވުމަށާ ރަނގަޅު ދިރިއުޅުމެއް ހޯދުމަށް. އެއީ އެންމެން ވެސް ކުރަން ޖެހޭނެ ވެސް ކަމެއް. އަޅުގަނޑުމެންގެ އަމާޒަކީ ރަށްރަށުގައި އެ ދިރިއުޅުން ހޯދާދެވޭތޯ ބެލުން.އެމްޑީޕީގެ ޗެއަރޕާސަން، ކުރީގެ ރައީސް މުހައްމަދު ނަޝީދު
ރައީސް ނަޝީދު ވިދާޅުވީ، އެ ދިރިއުޅުން ރަށްރަށުގައި ހޯދާދެވޭނީ ރަށްރަށުގައި ވަޒީފާގެ ފުރުސަތުތައް އުފެދިގެން ކަމަށެވެ. އަދި ރަށްރަށުގައި ފައިސާ ދައުރުވާ ހަމައެކަނި ވަސީލަތަކީ ސަރުކާރު ހިއްސާވާ ކުންފުނިތައް އެކަނި ހަދައިގެން ކަމަށް ނުވާނެ ކަމަށް ވެސް ރައީސް ނަޝީދު ވިދާޅުވި އެވެ.
މިސާލަކަށް ފެނަކައިން ކޮންމެ ރަށަކުން 100 މީހުން ވަޒީފާ އަށް ނެގެމަކީ ރަނގަޅު ކަމެއް ކަމަށާ އޭގެ ސަބަބުން ރަށުގައި ފައިސާ ކޮޅެއް ދައުރުވާ ކަމަށް ރައީސް ނަޝީދު ވިދާޅުވި އެވެ. އެހެން ނަމަވެސް އެކަމުން އެކަނި ރަށެއްގެ އިގްތިސާދު، ދެމެހެއްޓެނިވި ގޮތެއްގައި ހިފެހެއްޓިގެން ނުދާނެ ކަމަށް އެމަނިކުފާނު ވިދާޅުވި އެވެ. ރަށެއްގެ އިގްތިސާދެއް ހިފެހެއްޓިގެން ދާނީ، އަދި ވަޒީފާގެ ފުރުސަތު ލިބިގެން ދާނީ ވެސް ރަނގަޅު ވިޔަފާރި އެއް އޮތީމަ ކަމަށް އެމަނިކުފާނު ވަނީ ވިދާޅުވެފަ އެވެ.
އެމަނިކުފާނު ވިދާޅުވީ އެ ޕާޓީގެ ޕްރޮޖެކްޓް އޮފީހުން، ކައުންސިލްތަކާއެކު މަސައްކަތްތަކެއް ކޮށްފައިވާ ކަމަށެވެ. އެގޮތުން، ކައުންސިލްތަކުން ވަނީ ވިޔަފާރީގެ 100 ޕްރޮޖެކްޓު ހުށަހަޅާފައި ކަމަށް ނަޝީދު ވިދާޅުވި އެވެ.
ރައީސް ނަޝީދު ވިދާޅުވީ ކައުންސިލްތަކުގެ އެ ޕްރޮޖެކްޓްތަކަށް އިންވެސްޓުކުރަން ބޭނުންވާ ވިޔަފާރިވެރިންނަށް ކައުންސިލްތަކާ އެކު މަސައްކަތް ކުރުމުގެ މަގު ފަހިވެފައިވާނެ ކަމަށާއި، އެކަމުގެ ސަބަބުން އެ ވިޔަފާރިތައް ކުރާ ރަށްރަށުގެ ރައްޔިތުންނަށް ވެސް މަންފާކުރާނެ ކަމަށެވެ. އަދި މިދަފަ ކަންކަމުގެ ސަބަބުން ކައުންސިލްތައް މާލީ ގޮތުން ބާރުވެރިވެ، ރަށްރަށުގެ އާންމު އިގްތިސާދާއި ހާލަތު ރަނގަޅުވެގެން ދާނެ ކަމަށް ވެސް ނަޝީދު ވިދާޅުވި އެވެ.
