ގައުމަށް ކުރިމަތިވެފައިވާ ގަދަ ހޫނުން ސަލާމަތްވުމަށް ކުއްތާ ސޫޕް ބުއިމަށް އުތުރު ކޮރެއާގެ ރައްޔިތުންނަށް ސަރުކާރުން އިރުޝާދު ދީފި

ކޮރެއަން ޕެނިންސިއުލާ ނުވަތަ ކޮރެއާ ބައްރަށް ކުރިމަތިވެފައިވާ ގަދަ ހޫނުން ސަލާމަތްވުމަށްޓަކައި، ކުއްތާ މަހުން ތައްޔާރުކޮށްފައިވާ ސޫޕް ބުއިމަށް އުތުރު ކޮރެއާގެ ސަރުކާރުން އެ ގައުމުގެ ރައްޔިތުންނަށް އިރުޝާދު ދީފި އެވެ.

އުތުރު ކޮރެއާގެ ދައުލަތުގެ މީޑިއާތަކުން އެ ގައުމުގެ ލީޑަރު ކިމް ޖޮންގް އުން ސިފަކުރަނީ ރައްޔިތުންނާ އެކު ދަތި ހާލަތްތަކުގައި ކެތްތެރިކަމާއެކު މަސައްކަތްކުރައްވާ ލީޑަރެއްގެ ގޮތުގަ އެވެ. އަދި ގަދަ ހޫނާ ދެކޮޅަށް މަސައްކަތް ކުރުމަށްޓަކައި ކުއްތާ މަހުގެ ސޫޕުން ފެށިގެން ކުކުޅުމަހުގެ ސޫޕާ ހަމައަށް ތަފާތު ބާވަތްތައް ބޭނުންކުރުމަށް ދައުލަތުގެ މީޑިއާއިން ދަނީ ބާރުއަޅަމުންނެވެ.

އެ ގައުމުގެ މޫސުމާ ބެހޭ ރެކޯޑްތައް ބަލަހައްޓަން ފެށިފަހުން އެންމެ މަތީ ފިނިހޫނުމިނެއްގެ ގޮތުގައި 36.7 ޑިގްރީ ސެލްސިއަސް (98.1 ޑިގްރީ ފަރަންހައިޓް) ރެކޯޑް ކުރެވިފައިވާ ކަމަށް ބުރާސްފަތި ދުވަހު ދައުލަތުގެ ޓީވީން ވަނީ ރިޕޯޓްކޮށްފަ އެވެ. އެ ގައުމުގެ މީޑިއާތަކުން ދަނީ "ސަމްބޮކް" ނުވަތަ ހޫނު މޫސުމުގެ އެންމެ ގަދަ ދުވަސްވަރަށް އާދަޔާ ހިލާފު ބޮޑު ސަމާލުކަމެއް ދެމުންނެވެ.

ހޫނުން ސަލާމަތްވުމަށް ދީފައިވާ އިރުޝާދުތަކުގެ ތެރެއިން އެންމެ ބޮޑަށް ފާހަގަކުރެވެނީ ކުއްތާ މަހުގެ ސޫޕް ބޭނުންކުރުމަށް ދީފައިވާ އިރުޝާދެވެ. މިއީ ހޫނު މޫސުމުގެ ގަދަ ހޫނަށް ކެތްކުރުމަށް އެހީތެރިވެދޭ އެއްޗެއް ކަމަށް އެ ގައުމުގެ ގަދީމީ ގަބޫލުކުރުންތަކުގައި އޮވެ އެވެ. ވެރިކަން ކުރާ ޕާޓީގެ ނޫސް "ރޮޑޮންގް ސިންމުން" ގައި އޮގަސްޓް މަހުގެ 2 ވަނަ ދުވަހު ޝާއިއުކުރި ސިއްހީ ރިޕޯޓެއްގައި، ޕިއޮންގްޔަންގް ޖެނެރަލް ހޮސްޕިޓަލުގެ ޑޮކްޓަރަކާ ހަވާލާދީ ބުނެފައިވަނީ ކަރާ، ކިއުކަމްބާ އަދި ބީންސް ފަދަ ފިނިކޮށްދޭ ކާނާގެ އިތުރުން، ކުއްތާ މަހުގެ ސޫޕާއި، ބަތްޕެން ފަދަ "މުއްސަނދި ކާނާ" ބޭނުންކުރުން މުހިންމު ކަމަށެވެ.

އެ ނޫހުން ވަނީ ކުއްތާ މަހުގެ ސޫޕަށް ހާއްސަ ރިޕޯޓެއް ވެސް ޝާއިއުކޮށްފަ އެވެ. އެ ރިޕޯޓުގައި އެއީ ހޫނު މޫސުމުގެ ސަގާފީ ކާނާއެއްގެ ގޮތުގައި ސިފަކޮށްފައިވާއިރު، "ހޫނު މޫސުމުގެ އެންމެ ހޫނު ބާރު ދުވަސްވަރު ކުއްތާ މަހުގެ ސޫޕް ފައި މައްޗަށް ބަންޑުންވިޔަސް، އެއީ ބޭހަކަށް ވާނެ" ކަމަށް ބުނާ މުސްކުޅި ބަހެއް ވެސް ހިމަނާފައިވެ އެވެ. މީގެ އިތުރުން، މިއަހަރުގެ ކުރީކޮޅު ކުއްތާ މަސް ކެއްކުމުގެ ގައުމީ މުބާރާތެއް ބާއްވާފައިވާ ކަން ވެސް އެ ރިޕޯޓުގައި ފާހަގަކޮށްފައިވެ އެވެ.

ކޮރެއަން ސެންޓްރަލް ޓެލެވިޜަނުން މި ހަފުތާގައި ވަނީ ގަދަ ހޫނުގައި ސިއްހަތު ރައްކާތެރިކުރުމާ ބެހޭ ހާއްސަ ޕްރޮގްރާމްތަކެއް ދައްކާފަ އެވެ. މީގެ ތެރޭގައި ހަށިގަނޑުން ފެން މަދުވިޔަ ނުދިނުމަށް ބޯންޖެހޭ ބުއިންތަކާއި، ފަތަން ދިއުމާއި ބޭރުތެރޭގައި ކަސްރަތު ކުރުމާ ގުޅޭ އިރުޝާދުތައް ހިމެނެ އެވެ.

އުތުރު ކޮރެއާއިން ހޫނުގެ ސަބަބުން މަރުވި މީހުންގެ އެއްވެސް މައުލޫމާތެއް ހާމަކޮށްފައެއް ނުވެއެވެ. ނަމަވެސް އަވަށްޓެރި ދެކުނު ކޮރެއާއިން ވަނީ މި ހޫނު ރާޅާ ގުޅިގެން 20 އަށްވުރެ ގިނަ މީހުން މަރުވެފައިވާ ކަމަށް ރިޕޯޓްކޮށްފަ އެވެ.

ދައުލަތުގެ މީޑިއާއިން ސިއްހީ އިރުޝާދުތަކުގެ އިތުރުން، އާންމު ރައްޔިތުން ތަހައްމަލު ކުރަމުންދާ ގަދަ ހޫނު ލީޑަރު ކިމް ޖޮންގް އުން ވެސް ތަހައްމަލު ކުރައްވަމުން ގެންދަވާ ކަމަށް ބުނެ ޕްރޮޕެގެންޑާ ފަތުރަމުންދެ އެވެ. އެގޮތުން "ރޮޑޮންގް ސިންމުން" ނޫހުން ވަނީ 2013 ވަނަ އަހަރުގެ ހޫނު މޫސުމުގައި ކިމް އިމާރާތްކުރުމުގެ މަސައްކަތް ހިނގާ ސައިޓަކަށް ކުރެއްވި ޒިޔާރަތެއްގެ ހަނދާންތައް އާކޮށްފަ އެވެ. އެ ދަތުރުފުޅުގައި ކިމްގެ ހެދުންކޮޅު ދަލުން ތެމި ފޯވެފައިވާ ކަމަށް އެ ނޫހުގައި ބުނެފައިވެ އެވެ.

އެ ރިޕޯޓުގައިވާ ގޮތުން، އަހަރުގެ މި ދުވަސްވަރު އެފަދަ ދަތުރުފުޅުތައް ނުކުރެއްވުމަށް އޮފިޝަލަކު އެދުމުން، "މޫސުން ކިތަންމެ ހޫނު ނަމަވެސް، ރައްޔިތުންނަށްޓަކައި ކުރަންޖެހޭ މަސައްކަތްތައް ކުރަންވާނެ" ކަމަށް ކިމް ވިދާޅުވި އެވެ.

އެހެން ރިޕޯޓެއްގައި ބުނެފައިވަނީ، ފިނިހޫނުމިން 39 ޑިގްރީ ސެލްސިއަސްއަށް އެރި ދުވަހެއްގައި ކިމް ވަނީ ސީފުޑް ފެކްޓްރީއަކަށް ޒިޔާރަތްކުރައްވާފައި ކަމަށެވެ. އެ ދަތުރުފުޅުގައި ކާނާގެ ފެންވަރާއި ސާފުތާހިރުކަމަށް ބާރުއަޅުއްވައި، އާދަޔާ ހިލާފަށް ހޫނުގަދަ ކޮޓަރިތައް ކިމް ބައްލަވާލެއްވި ކަމަށް ސިފަކޮށްފައިވެ އެވެ.

ނަމަވެސް، މިހާރު ކުރިމަތިވެފައިވާ ހީޓް ވޭވްގެ ތެރޭގައި ކިމް ޖޮންގް އުން ކުރައްވަމުން ގެންދަވާ ކަންކަމުގެ އެއްވެސް ތަފްސީލެއް ހާމަކޮށްފައެއް ނުވެ އެވެ.