އަނގޮޅިތީމުގައި އުމުރުން ދުވަސްވީ އަންހެނަކަށް ޖިންސީގޯނާކޮށް މަރާލާނެ ކަމަށް ބުނި މީހާގެ ބަންދަށް 15 ދުވަސް
30 ސެޕްޓެމްބަރު 2026 | ބުދަ 03:44ރ. އަނގޮޅިތީމުގައި އުމުރުން 72 އަހަރުގެ އަންހެނަކަށް ޖިންސީ ގޯނާކޮށް މަރާލާނެ ކަމަށް ބިރުދެއްކި މައްސަލައިގައި 44 އަހަރުގެ ދިވެހި ފިރިހެނަކު ކޯޓު އަމުރެއްގެ ދަށުން ހައްޔަރުކޮށްފި. މި މައްސަލައާ ގުޅިގެން ހައްޔަރުކުރި މީހާގެ ބަންދަށް ކޯޓުން 15 ދުވަސް ޖަހާފައިވާއިރު، އަނިޔާ ލިބުނު މީހާއަށް ސިއްހީ މަރުކަޒުން ފަރުވާ ދިނުމަށްފަހު މިހާރު ވަނީ ދޫކޮށްލާފައި
ރ. އަނގޮޅިިތީމު: އެ ރަށުގައި އުމުރުން 72 އަހަރުގެ އަންހެނަކަށް ޖިންސީ ގޯނާކޮށް މަރާލާނެ ކަމަށް ބިރުދެއްކި މައްސަލައިގައި 44 އަހަރުގެ ދިވެހި ފިރިހެނަކު ހައްޔަރުކޮށް، ބަންދުކޮށްފައިވޭ | ސޯޝަލް މީޑިއާ
ރ. އަނގޮޅިތީމު ގެއަކަށް ވަދެ، އެ ރަށުގެ އުމުރުން ދުވަސްވީ އަންހެނަކަށް ގަދަކަމުން ޖިންސީގޯނާކޮށް، މަރާލާނެ ކަމަށް ބުނެ އިންޒާރުދިން މައްސަލައިގައި ހައްޔަރު ކުރި މީހާ 15 ދުވަހަށް ބަންދު ކޮށްފި އެވެ.
ފުލުހުން މީޑިއާތަކަށް މައުލޫމާތު ދީފައިވާ ގޮތުގައި މި މައްސަލައާ ގުޅިގެން ހައްޔަރުކޮށްފައިވަނީ 44 އަހަރުގެ ދިވެހި ފިރިހެނެކެވެ.
މި ހާދިސާގެ ރިޕޯޓު ފުލުހުންނަށް ލިބިފައިވަނީ 2026 ސެޕްޓެމްބަރު 27 ވީ ހުކުރު ދުވަހުގެރޭ 8:30 އެހައިކަންހާއިރު އެވެ. ފުލުހުން ބުނީ އަނގޮޅިތީމު ގެއަކަށް ވަދެ ޖިންސީ ގޯނާކޮށްފައިވަނީ އުމުރުން 72 އަހަރުގެ ދިވެހި އަންހެނަކަށް ކަމަށެވެ. އަދި އެ އަންހެން މީހާއަށް ޖިންސީގޯނާ ކުރުމުގެ އިތުރުން، މަރާލާނެ ކަމަށް ބުނެ ބިރުދައްކައި އިންޒާރު ދީފައިވާ ކަމަށް ވެސް ފުލުހުން މައުލޫމާތު ދީފައިވެ އެވެ.
މި މައްސަލައިގެ ތުހުމަތުގައި މީހަކު ހައްޔަރުކޮށްފައިވަނީ ސެޕްޓެމްބަރު 28 ވީ ހޮނިހިރު ދުވަހުގެރޭ 9:57 އެހައިކަންހާއިރު އެވެ. ފުލުހުން ބުނީ މި މީހާ ހައްޔަރުކޮށްފައިވަނީ ކޯޓު އަމުރެއްގެ ދަށުން ކަމަށެވެ. ފުލުހުން ބުނީ، މި މައްސަލައާ ގުޅިގެން ހައްޔަރުކުރި މީހާގެ ބަންދާމެދު ގޮތެއް ނިންމުމަށް ކޯޓަށް ހާޒިރުކުރުމުން 15 ދުވަހަށް ބަންދުކުރުމަށް އަމުރު ކޮށްފައިވާ ކަމަށެވެ.
މި އަނިޔާވެރި އަމަލުގެ ޝިކާރައަކަށްވި އުމުރުން ދުވަސްވީ އަންހެން މީހާއަށް ވަނީ އަނގޮޅިތީމު ހެލްތު ސެންޓަރުގައި ފަރުވާ ދީފަ އެވެ. ސިއްހީ މަރުކަޒުން ފަރުވާ ދިނުމަށްފަހު މިހާރު އެ މީހާ ވަނީ ދޫކޮށްލާފަ އެވެ. ނަމަވެސް އެ މީހާއަށް ލިބުނު އަނިޔާތަކުގެ ތަފްސީލެއް ފުލުހުން ހާމައެއް ނުކުރެ އެވެ.
