އެންމެ ފަހުން ފަޅު ރަށްރަށުން ވެސް ސިޔާސީ މަޤާމުތައް ދޭން ފެށީ!

މި ސަރުކާރުން ސިޔާސީ މަޤާމުތަކަށް މީހުން އައްޔަނުކުރާ ވާހަކަ އަކީ އަލަސް ދައްކަން އޮތް ވާހަކައެއް ނޫނެވެ. 700 އަށް ވުރެ ސިޔާސީ މަޤާމުތަކުގެ އަދަދު އިތުރު ނުކުރައްވާނެ ކަމަށް ރައީސް ޑރ. މުހައްމަދު މުއިއްޒު ވިދާޅުވެފައިވީ ނަމަވެސް، އެ އަދަދު ފަހަނައަޅައި ގޮސް، ސިޔާސީ މަޤާމުތަކުގައި ހާހުން، ދެ ހާހުން މީހުން އެބަ ތިއްބެވެ. ސިޔާސީ މަޤާމުތަކަށް އެކި ފެންވަރުގައި، އެކި ތަންތަނަށް މިހާރު ވެސް މީހުން ދަނީ އައްޔަނު ކުރައްވަމުންނެވެ.

މިކަމުގައި މިފަހަރު ދިމާވެގެން މި އުޅެނީ ވަރަށް ހެއްވާ ކަމެކެވެ. 2025 ވަނަ އަހަރުގެ ޑިސެމްބަރު މަހު ރައީސް މުއިއްޒު ނިންމެވީ، ހދ. ހިރިމަރަދޫގެ ރައްޔިތުން އެ އަތޮޅު ހަނިމާދޫ އަށް ބަދަލު ކުރުމަށެވެ. އޭގެ ފަހުން ހިރިމަރަދޫ އަކީ ހަނިމާދޫގެ އަވަށެއްގެ ގޮތުގައި ކަނޑައަޅައި، އެ ރަށަކީ ނެތް ރަށަކަށް ހެއްދެވި އެވެ. އޭގެ ފަހަތުން ހުރިހާ ސިޔާސަތުތަކެއް ވެސް ދިޔައީ ބަދަލު ވެގެންނެވެ. މިއަހަރުގެ އޭޕްރީލް މަހު އޮތް ލޯކަލް ކައުންސިލްގެ އިންތިޚާބުގައި ހިރިމަރަދޫ އަށް ކައުންސިލެއް ނުހޮވަ އެވެ. އޭގެ ބަދަލުގައި، އެ ރަށު ރައްޔިތުން ވޯޓުލާން ޖެހުނީ ހަނިމާދޫ ކައުންސިލަށެވެ. 

މިކަން މިހެން އޮތަސް، އެ ރަށުގައި ރައްޔިތުން އުޅެ އެވެ. މިހާރު މީހުން ބުނަމުން އަންނަނީ، ފަޅު ރަށެއްގެ ގޮތުގައި އެ ރަށް ކަނޑައަޅައި، އެ ރަށުގައި ރައްޔިތުން ދަތި ހާލުގައި އުޅެމުން އަންނަ ވާހަކަ އެވެ. ނަމަވެސް، މިއީ ސަރުކާރުން މާ ބޮޑު ސަމާލުކަމެއް ދޭ، އަދި ސަރުކާރަށް އެހާ މުހިންމު ވާހަކައަކަށް ނުވި އެވެ. 

އާދީއްތަ ދުވަހު ފެންމަތިވެގެން ދިޔަ ވާހަކަ އަކީ، ހިރިމަރަދޫ އަށް ސިޔާސީ މަޤާމުގައި ގޮތުގައި ދެ މީހަކު އައްޔަނު ކުރި ވާހަކަ އެވެ. ސަރުކާރު ހިންގާ ޕީޕަލްސް ނޭޝަނަލް ކޮންގްރެސް (ޕީއެންސީ) އަށް ނިސްބަތްވާ ދެ މީހަކު އައްޔަނުކުރީ، ޕޮލިޓިކަލް ޑިރެކްޓަރުންގެ ގޮތުގަ އެވެ. 20،000 ރުފިޔާގެ މުސާރައެއް ލިބޭ އެ މަޤާމުތަކަށް މީހުން އައްޔަނުކުރީ ޔޫތު މިނިސްޓްރީއިންނެވެ. މި މީހުން މަސައްކަތް ކުރަން ތިބެން ޖެހެނީ ހިރިމަރަދޫގަ އެވެ. އެ ރަށުގައި މިހާތަނަށް ބޭނުން ކުރަމުން އައި ރަށު ކައުންސިލް އިމާރާތުގަ އެވެ. އެ ތަންތަނުގައި އެ މީހުންނަށް މަސައްކަތް ކުރެވޭނެ އިންތިޒާމު ހަމަޖައްސަން، ހަނިމާދޫ ކައުންސިލަށް ވަނީ އަންގައިފަ އެވެ.

އެއާއެކު މުޅި ސޯޝަލް މީޑިއާ އާއި ނޫސްތަކުގެ ސުރުޚީ އަށް އެ ވާހަކަ އަރައިފި އެވެ. ފަޅު ރަށެއްގެ ގޮތުގައި ކަނޑައަޅާފައި އޮތް ރަށަކަށް، ސިޔާސީ މަޤާމުގެ ގޮތުގައި ދެ މީހުން އައްޔަނު ކުރި ވާހަކަ އެވެ. މިއީ ދެން ހެއްވާ މަޖާ ކަމަކަށް ވެއްޖެ އެވެ. އަމިއްލަފުޅަށް ރަށްރަށް ފަޅުރަށުގެ ގޮތުގައި ކަނޑައަޅުއްވާފައި، ހަމަ އެ ރަށްރަށަށް އައްޔަނުކުރައްވަނީ  ސިޔާސީ މަޤާމުތަކަށް މީހުންނެވެ. ސަރުކާރު ޕާޓީ އަށް ނިސްބަތްވާ މީހުންނެވެ. ނޫނޭވާ ސާބަހެވެ.