ރައްޔިތުންގެ މަޖިލީހުގެ ބައެއް  ދާއިރާތަކުގެ ގޮނޑި ހުސްވެފައިވާ ކަމަށް ކަނޑައަޅައި، ބައި- އިލެކްޝަން ބާއްވަން އިލެކްޝަންސް ކޮމިޝަން (އީސީ) އިން ނިންމާފައިވީ ނަމަވެސް ބައި-އިލެކްޝަން ބޭއްވުމަށް ބަޖެޓެއް ނެތް ކަމަށް ފިނޭސް މިނިސްޓްރީން ބުނެފިއެވެ. 

ރާއްޖެއެމްވީއާ ވާހަކަ ދައްކަމަުން ފިނޭސް މިނިސްޓްރީގެ އިސް އޮފިޝަލަކު ވިދާޅުވީ ބައިއިލެކްޝަންސް ބޭއްވުމަށް އީސީން ބަޖެޓް ބޭނުންވެގެން ހުށަހަޅާފައިވާ ކަމަށެވެ. ނަމަވެސް ބައިލެކްޝަންތައް ބޭއްވުމަށް އީސީން ބޭނުންވާ ބަޖެޓް ދެވެން ނެތް ކަމަށް ފިނޭސް މިނިސްޓްރީގެ އޮފިޝަލް ވިދާޅުވިއެވެ. އަދި ވިދާޅުވީ ބަޖެޓް ބޭނުން ވެގެން އީސީން ހުށަހެޅި ސިޓީ އަށް ފިނޭސް މިނިސްޓްރީން މިހާރު ޖަވާބުދީފައިވާނެ ކަމަށެވެ. 

އޮފިޝަލް ވިދާޅުވީ ބައި-ލެކްޝަންތައް ބޭއްވުމަށް ސަޕްލެމްންޓްރީ ބަޖެޓެއް ހުށަހަޅަން އީސީއާ އެކު މަޝްވަރާ ކުރެވުނު ކަމަށާއި ނަމަވެސް އަންނަ އަހަރަށް ބޭނުންވާ ދައުލަތުގެ ބެޖްޓް މަޖިލީހަށް ހުށަހަޅަން ޖެހޭ ވަގުތު ޖެހިފައި ވާތީ ސަޕްލެމެންޓްރީ ބަޖެޓެއް ހުށަހަޅައިގެން އެކަން ކުރެވޭނެ ކަމަށް މިހާރު ގަބޫލު ނުކުރެވޭ ކަމަށް ފިނޭން މިނިސްޓްރީގެ އޮފިޝަލް ވިދާޅުވިއެވެ. 

އޮފިޝަލް ވިދާޅުވީ ކޮންމެ އަހަރަކު ވެސް ކޮންމެ މުއައްސަސާއަކަށް ވެސް ކަނޑައެޅިފައިވާ ބަޖެޓެއް ދެޫކުރެވޭ ކަމަށާއި އެ ބަޖެޓްގެ ބޭރުން ކުއްލި ގޮތަކަށް އަންނަ ކަންތައްތައް ކުރުމަށް ގޮތްތަކެއް ހޯދުމަށް އެ ކަމެއް ކުރަން އުޅޭ މުއައްސަސާއަކުން މަސައްކަތް ކުރަން ޖެހޭނެ ކަމަށެވެ. އެގޮތުގެ މަތިން ބައި-ލެކްޝަންތައް ބޭއްވުމަށް ވެސް ގޮތްތަކެއް ހޯދުމަށް އީސީ އަށް ދަންނަވާފައި ވާނެ ކަމަށް އޮފިޝަލް ވިދާޅުވިއެވެ. 

މިކަމާ ގުޅިގެން އީސީގެ ބަހެއް ހޯދުމަށް ކޮމިޝަންގެ މެމްބަރުންނަށް އެތައް ފަހަރެއްގެ މަތިން ގުޅި ނަމަވެސް ފޯނަށް ޖަވާބު ނުދެއްވާތީ އީސީގެ ބަހެއް ވަނީ ލިބޭ ގޮތް ނުވެފައެވެ. 

ރައްޔިތުންގެ މަޖިލީހުގެ މެންބަރުކަމުގެ ގޮނޑި ހުސްވެފައިވާ ދާއިރާތަކުގެ ބައި-އިލެކްޝަން ބޭއްވުމަށް ކޮންމެ ދާއިރާއަކަށް 1.5 މިލިއަނަށް ވުރެ ގިނަ ރުފިޔާ ހޯދުމަށް އިލެކްޝަންސް ކޮމިޝަނުން ވަނީ ހުށަހަޅާފައެވެ. 

ބައި-އިލެކްޝަން ބާއްވަން ނިންމާފައިވާ ހަ ދާއިރާގެ ތެރެއިން ކޮންމެ ދާއިރާއަކަށް 1.5 މިލިއަނަށް ވުރެ ގިނައިން ފައިސާ ހޯދުމަށް އެދިފައިވާއިރު، އެއީ ޖުމްލަ ނުވަ މިލިއަނަށް ވުރެ ގިނަ ރުފިޔާ އެވެ. އެ އަދަދަށް ފައިސާ ހޯދަން އެދުނު އިރު، 2014 ވަނަ އަހަރު ބޭއްވި ރައްޔިތުންގެ މަޖިލިސް އިންތިޚާބުގެ ބަޖެޓަކީ 38 މިލިއަން ރުފިޔާ އެވެ

ބައި-އިލެކްޝަންތައް ބޭއްވުމަށް އިލެކްޝަންސް ކޮމިޝަނުން ނިންމާފައިވާ ދާއިރާތަކަކީ، މަޑުއްވަރީ ދާއިރާ އާއި، ދިއްދޫ ދާއިރާ، ތުލުސްދޫ ދާއިރާ، ވިލިނގިލީ ދާއިރާ، ދަނގެތީ ދާއިރާގެ އިތުރުން މައްޗަންގޮޅި ދެކުނު ދާއިރާ އެވެ. އެ ދާއިރާތަކުގެ މެންބަރުންގެ ގޮތުގައި ތިއްބެވި ބޭފުޅުންގެ ގޮނޑި ގެއްލިފައިވާ ކަމަށް އިލެކްޝަންސް ކޮމިޝަނުން ބުނީ ޖުލައި 18 ވަނަ ދުވަހު އެވެ. 

އެ މެންބަރުންގެ ގޮނޑިތައް ގެއްލުނު ކަމަށް އިލެކްޝަންސް ކޮމިޝަނުން ބުނެފައި ވަނީ، ސިޔާސީ ޕާޓީއެއްގެ ޓިކެޓުގައި އިންތިހާބު ކާމިޔާބުކުރާ މެންބަރުންގެ ތެރެެއިން ޕާޓީން ވަކިވާ، އަދި ވަކިކުރާ މެންބަރުންނާއި އަދި ޕާޓީ ބަދަލުކުރާ މެންބަރުންގެ ގޮނޑި ގެއްލޭނެ ކަމަށް ކަނޑައަޅައި ޖުލައި 13 ވަނަ ދުވަހު ސުޕްރީމް ކޯޓުން ކުރި ހުކުމާ ހަވާލާދީ އެވެ.

އެ ހަ ދާއިރާގެ އިތުރުން ރައްޔިތުންގެ މަޖިލީހުގެ ތިނަދޫ ދެކުނު ދާއިރާގެ ގޮނޑި ހުސްވެފައިވާ ކަމަށް އިލެކްޝަންސް ކޮމިޝަނުން ވަނީ މިމަހުގެ 5 ވަނަ ދުވަހު ކަނޑައަޅާފަ އެވެ. 

ގޮނޑި ގެއްލުނު ކަމަށް އިލެކްޝަންސް ކޮމިޝަނުން ކަނޑައެޅި މައްސަލަ ހަތަރު މެންބަރަކު ސުޕްރީމް ކޯޓަށް ހުށަހެޅުއްވި އެވެ. އެ މައްސަލައިގައި ސުޕްރީމް ކޯޓުން މިދިޔަ އޯގަސްޓް މަހުގެ 27 ވަނަ ދުވަހު ނިންމި ނިންމުމުގައި ބުނެފައި ވަނީ މެންބަރުންގެ ގޮނޑި ގެއްލޭނެ ހާލަތުތައް ބަޔާންކޮށް ކުރި ޙުކުމަށް ފަހު، ހުށަހެޅިފައިވާ މައްސަލަތަކުގައި ޤާނޫނުއަސާސީގެ 74 ވަނަ މާއްދާގެ ދަށުން ބަލައި އިތުރު ގޮތެއް ކަނޑައަޅަންޖެހޭ ތަނެއް ނެތް ކަމަށް ސުޕްރީމް ކޯޓުގެ ފަނޑިޔާރުންގެ އިއްތިފާގުން ނިންމާފައިވާ ކަމަށެވެ.

ސުޕްރީމް ކޯޓުގެ އެ ނިންމުމާ ގުޅިގެން އިލެކްޝަންސް ކޮމިޝަނުން ހަމަ އެ ދުވަހު ނެރުނު ބަޔާނުގައި ބުނެފައި ވަނީ ރައްޔިތުންގެ މަޖިލީހުގެ ގޮނޑި ހުސްވެފައިވާ  ކަމަށް ކަނޑައަޅާފައިވާ ދާއިރާތަކުގެ ބައި-އިލެކްޝަން ބާއްވަން އެ ކޮމިޝަނުން ނިންމާފައިވަނިކޮށް، ސުޕްރީމް ކޯޓަށް މިކަމާ ގުޅޭ ގޮތުން މައްސަލަަތަކެއް ހުށަހަޅާފައި ވާތީ އެ ނިންމުންތަކާ މެދު ވަކި ގޮތެއް ނިންމަންދެން އެ ދާއިރާތަކުގެ ބައި-އިލެކްޝަން ބޭއްވުމުގެ މަސައްކަތް މަޑުޖައްސާލާފައި އޮތް ކަމަށާއި އަދި ސުޕްރީމް ކޯޓުގެ ނިންމުމުގައި އިލެކްޝަންސް ކޮމިޝަނުން ކުރިން ނިންމި ނިންމުން ބަދަލުކުރަންޖެހޭނެ ކަމަށް  ބަޔާން ކޮށްފައިނުވާ ކަމަށެވެ. 

ގާނޫނު އަސާސީ އާއި ރައްޔިތުންގެ މަޖިލީހުގެ އިންތިހާބުގެ ގާނޫނާއި ރައްޔިތުންގެ މަޖިލީހުގެ އިންތިހާބުގެ ގަވައިދާ އެއްގޮތްވާ ގޮތުގެ މަތިން ރައްޔިތުންގެ މަޖިލީހުގެ ހުސްވެފައިވާ ދާއިރާތަކުގެ ބައި- އިލެކްޝަންތައް ކުރިއަށް ގެންދިއުމަށް އެ ކޮމިޝަނުން މިހާރު ވަނީ ނިންމައިފަ އެވެ. ނަމަވެސް ބައި އިލެކްޝަން ބާއްވާނެ ދުވަހާއި ކެންޑިޑޭޓުންނަށް ވުމަށް ފުރުސަތު ހުޅުވާލާނެ ދުވަހެއް ހާމައެއް ނުކުރެ އެވެ.

ގާނޫނު އަސާސީގެ 78 ވަނަ މާއްދާގައި ބުނެފައިވާ ގޮތުގައި ރައްޔިތުންގެ މަޖިލީހުގެ މެންބަރަކު، މެންބަރުކަމުން ވަކިވުމުގެ ސަބަބުން ހުސްވާ ގޮނޑިއަށް އެ ގޮނޑި ހުސްވި ތާރީހުން ފެށިގެން ފަސްދޮޅަސް ދުވަހުގެ ތެރޭގައި މެންބަރަކު އިންތިހާބު ކުރަން ވާނެއެވެ. ނަމަވެސް މެންބަރުކަމުގެ ގޮނޑި ހުސްވި ތާރީހުން ފެށިގެން ރައްޔިތުންގެ މަޖިލީހުގެ ކުރިއަށްއޮތް ޢާންމު އިންތިހާބާ ދެމެދު އޮތީ ހަ މަސްދުވަސް ނުވަތަ އެއަށްވުރެ ކުރު މުއްދަތެއް ކަމުގައި ވާނަމަ އެ ހުސްވި ގޮނޑިއަކަށް މެންބަރަކު އިންތިހާބު ކޮށްގެން ނުވާނެ ކަމަށް ބުނެފައި ވެއެވެ.