ލުބްނާން ސިފައިންނަށް ހަމަލާދޭން އިސްރާއީލު ސިފައިން މަސައްކަތްކޮށްފި
19 ސެޕްޓެމްބަރު 2026 | ހޮނިހިރު 07:47ލުބުނާނުގެ ދެކުނުގައި އާންމުންނަށް ރައްކާތެރިކަން ދިނުމަށް ގާއިމުކުރި އަސްކަރީ މަރުކަޒަކަށް އިސްރާއީލުން ހަމަލާދޭން މަސައްކަތްކުރުމާ ގުޅިގެން، ބޯޑަރު ސަރަހައްދުގެ ނުތަނަވަސްކަން ވަނީ އިންތިހާއަށް ބޮޑުވެފައި. ހަމަލާތައް މެދުކަނޑާލުމުގެ އެއްބަސްވުމާ ޚިލާފަށް އިސްރާއީލުން ލުބުނާނުގެ ބިންތަކަށް އަރައިގަނެ ހަމަލާދެމުންދާއިރު، އެ ގައުމުގެ އަސްކަރިއްޔާއިން ދަނީ ބޯޑަރުގެ ސަލާމަތީ ކަންކަން ވަރުގަދަކުރަމުން
އިސްރާއީލުގެ ފައުޖުތަކުން ލުބްނާންގެ ދެކުނުގައި އާންމުން ދިރިއުޅޭ ސަރަހައްދުތަކަށް ދީފައިވާ ގެއްލުން | އެކްސް
ލުބުނާނުގެ ދެކުނުގައި އޮންނަ ދައިރު މީމާސް އަވަށުގައި އެ ގައުމުގެ އަސްކަރިއްޔާއިން އަލަށް ގާއިމުކުރި މަރުކަޒަކާ އިސްރާއީލް ސިފައިން ކައިރިވެ، ސްޓަން ގްރެނޭޑް އުކައި ހަމަލާދޭން މަސައްކަތް ކޮށްފައިވާ ކަމަށް ލުބްނާންގެ އަސްކަރިއްޔާއިން ހާމަކޮށްފި އެވެ. މި ހާދިސާއާ ގުޅިގެން ދެ ފަރާތުގެ ދެމެދުގައި އޮތް ނުތަނަވަސްކަން އިންތިހާއަށް ބޮޑުވެފައިވާ ކަމުގައި ލުބްނާންގެ އަސްކަރިއްޔާއިން ބުނެ އެވެ.
ލުބުނާނުގެ އަސްކަރިއްޔާގެ ކޮމާންޑުން ނެރުނު ބަޔާނެއްގައި ބުނީ، މަަރްޖަޢިޔޫން ޑިސްޓްރިކްޓްގެ ދައިރު މީމާސްގައި ކުރިއަށްގެންދާ މިޝަންތަކުގެ ތެރެއިން، އެ އަވަށުގެ ބޭރު ސަރަހައްދެއްގައި ސިފައިންގެ ޕެޓްރޯލް ޓީމަކުން ވަގުތީ ގޮތުން ފާރަވެރިވާނެ މަރުކަޒެއް ގާއިމުކޮށްފައިވަނީ ސެޕްޓެންބަރު މަހުގެ 10 ވަނަ ދުވަހު ކަމަށެވެ. މި މަރުކަޒަކީ އެ ސަރަހައްދުގެ ދަނޑުބިންތައް ބަލައި ފާސްކުރުމަށް ދާ އާންމު ރައްޔިތުންނަށް ރައްކާތެރިކަން ފޯރުކޮށްދިނުމަށް ޓަކައި، ލުބުނާނަށް ކަނޑައަޅާފައިވާ ބައިނަލްއަގުވާމީ މިލިޓަރީ ކޯޑިނޭޝަން ގްރޫޕާ ގުޅިގެން ގާއިމުކުރި ތަނެއް ކަމަށް ވެސް އެ ބަޔާނުގައިވެ އެވެ.
'ސެކިއުރިޓީ ޒޯން' ގެ ތެރޭގައި ހުރި އެ މަރުކަޒާ އިސްރާއީލް ސިފައިން ކައިރިވެ، އެ ސަރަހައްދަށް ސްޓަން ގްރެނޭޑްތަކެއް އުކާފައިވާ ކަމަށް ލުބްނާންގެ އަސްކަރިއްޔާއިން ހާމަކުރި އެވެ. އަދި، "މި ހާދިސާއާ ގުޅިގެން އަސްކަރިއްޔާއިން ވަނީ އެ ސަރަހައްދުގައި ތިބި ސިފައިންގެ އަދަދު އިތުރުކޮށް، މަގާމުތައް ވަރުގަދަކޮށްފައި. މިއާއެކު، ދެ ފަރާތުގެ މެދުގައި ކުރިމަތިލުމަކަށް ހިނގާފާނެ ފަދަ ނުތަނަވަސް ހާލަތެއް އުފެދުނު،" ލުބުނާނު އަސްކަރިއްޔާއިން ބުނެފައިވެ އެވެ.
މިލިޓަރީ ކޯޑިނޭޝަން ގްރޫޕް މެދުވެރިކޮށް ކުރެވުނު މަޝްވަރާތަކަށްފަހު އިސްރާއީލް ސިފައިން އެ ސަރަހައްދު ދޫކޮށް ގޮސްފައިވާ ކަމަށާއި، އޭގެ ފަހުން ލުބުނާނު ސިފައިން އެ އަވަށުގައި ހުންނަ މައި މަރުކަޒަށް އެނބުރި ގޮސްފައިވާ ކަމަށް ވެސް އެ ބަޔާނުގައި ފާހަގަކޮށްފައިވެ އެވެ. މީގެއިތުރުން، ކޯޑިނޭޝަން ގްރޫޕާ ގުޅިގެން އެ ސަރަހައްދުގެ މަސްރަހު ވަރަށް ގާތުން ބަލަމުންދާ ކަމަށް ލުބުނާނުގެ އަސްކަރިއްޔާއިން ބުނެފައިވެ އެވެ.
މި ހާދިސާ ހިނގާފައި ވަނީ ލުބުނާނުގެ ދެކުނުގެ ސަރަހައްދުތަކަށް އިސްރާއީލުން ދެމުންދާ ހަމަލާތަކާއި އަސްކަރީ ހަރަކާތްތައް އިތުރުކުރަމުންދާ ދަނޑިވަޅެއްގަ އެވެ. މި ގޮތުން ހުކުރު ދުވަހު އިސްރާއީލްގެ އާޓިލަރީ ބަޑީގެ ހަމަލާތައް ބިންތު ޖުބައިލް ޑިސްޓްރިކްޓަށް އަމާޒުކުރުމުގެ ސަބަބުން ދެ މީހަކު ޒަޚަމްވެފައިވާއިރު، ބޯޑަރުގެ އެކި ސަރަހައްދުތަކަށް އިސްރާއީލް ސިފައިން ވަދެގަނެ އަސްކަރީ ހަރަކާތްތައް ވަނީ ވަރުގަދަކޮށްފަ އެވެ.
މާރިޗު 2 ވަނަ ދުވަހު އިސްރާއީލު ސިފައިން ވަނީ ލުބްނާންގެ ދެކުނުގެ ބިންތަކަށް އަރައިގަނެ، ބޯޑަރުގެ 12 ކިލޯމީޓަރު ސަރަހައްދެއް އިސްރާއީލުގެ ބާރުގެ ދަށަށް ގެންގޮސްފަ އެވެ. މިއީ، ސަލާމަތީ ޒޯނެއް ކަމަށް ބުނުމަށްފަހު، އިސްރާއީލު ސިފައިން ވަނީ އެ ސަރަހައްދުތަކުގައި ދިރިއުޅޭ ލުބްނާންގެ އާންމު ރައްޔިތުން ގެދޮރުން ނެރެފަ އެވެ. އަދި، އެ މީހުންގެ ގެދޮރަށް ހަމަލާދީ ސުންނާޛަތިކުރަން ފަށާފަ އެވެ.
އެމެރިކާ މެދުވެރިވެގެން ވޮޝިންގޓަންގައި ބައިރޫތާއި ތެލް އަވީވްއާ ދެމެދު ޖޫން މަހުގެ 26 ވަނަ ދުވަހު ވަނީ ހަމަލާތައް މެދުކަނޑާލުމަށް 'ފްރޭމްވޯކް އެގްރީމަންޓެއްގައި' ސޮއިކޮށްފަ އެވެ. މި އެއްބަސްވުމުގެ ދަށުން ލުބުނާނުގެ ސަރަހައްދުތަކުން އިސްރާއީލް ސިފައިން ފިޔަވަހިތަކަކަށް ބަހާލައިގެން ފޭބުމަށާއި، އިސްރާއީލުން ދޫކޮށްލާ ސަރަހައްދުތަކުގައި ލުބުނާނުގެ އަސްކަރިއްޔާ ބޭތިއްބުމަށް ވަނީ ނިންމާފަ އެވެ.
ނަމަވެސް، މި އެއްބަސްވުމާ ޚިލާފަށް އިސްރާއީލުން ދަނީ ލުބުނާނުގެ ދެކުނުގެ ސަރަހައްދުތަކަށް ހަމަލާދެމުންނެވެ. އަދި، އެތައް އަހަރެއް ވަންދެން އިސްރާއީލުން ހިފާފައިވާ ސަރަހައްދުތަކުގެ އިތުރުން، ފަހުގެ ހަނގުރާމަތަކާއި އަސްކަރީ އޮޕަރޭޝަންތަކުގައި ހިފާފައިވާ ލުބުނާނުގެ ބިންތަކުން ފޭބުމަށް އިންކާރު ކުރަމުންނެވެ.
މަސްދަރު: އަނަދޯލް އޭޖެންސީ
