ކުރީ ސަރުކާރުން ފަށާފައިވާ ދިގުރަށު ބަނދަރު ބޮޑުކުރުމުގެ މަސައްކަތް މި ސަރުކާރު އައި ފަހުން އޮތީ ހުއްޓިފައި
އދ. ދިގުރަށުގެ ބަނދަރުގެ ޖާގަ އިތުރުކުރުމަށް ފަށާފައިވާ މަސައްކަތް ސަރުކާރު ބަދަލުވުމާއެކު ވަނީ ހުއްޓިފަ
އަދ. ދިގުރަށް: ކުރީ ސަރުކާރުން ފަށާފައިވާ ދިގުރަށު ބަނދަރު ބޮޑުކުރުމުގެ މަސައްކަތް މި ސަރުކާރު އައިފަހުން ހުރީ ހުއްޓިފައިވާކަން ކައުންސިލް ރައީސް އުސްމާން ވިދާޅުވި
ރައީސް އިބުރާހީމް މުހައްމަދު ޞާލިހުގެ ސަރުކާރު ބަދަލުވިފަހުން އދ. ދިގުރަށުގެ ބަނދަރުގެ ޖާގަ އިތުރުކުރުމަށް ފަށާފައިވާ މަސައްކަތް ހުއްޓުނު ގޮތަށް އެތަނުގެ މަސައްކަތް އެއްވެސް ވަރަކަށް ކުރިޔަށް ނުދާ ކަމަށް އެރަށު ކައުންސިލްގެ ރައީސް އިބުރާހީމް އުސްމާން ވިދާޅުވެއްޖެ އެވެ.
ރާއްޖެޓީވީގެ 'ހާލު ކިހިނެއް' ޕްރޮގްރާމުގައި ވާހަކަ ދައްކަވަމުން އުސްމާން ވިދާޅުވީ އެ ރަށުގެ ބަނދަރުގެ ދަތިކަން ވަރަށް ބޮޑަށް ހުރުމުން ޞާލިހުގެ ސަރުކާރުން އެކަމަށް ހައްލެއް ގެނައުމުގެ މަސައްކަތް ވަނީ ފަށާފައި ކަމަށާއި އެހެން ނަމަވެސް ސަރުކާރު ބަދަލުވި ފަހުން ބަނދަރު ބޮޑުކުރުމުގެ މަސައްކަތް ވަނީ ހުއްޓިފައި ކަމަށެވެ.
އުސްމާން ވިދާޅުވީ ބަނދަރު ބޮޑުކުރުމުގެ މަސައްކަތް ކުރީ ސަރުކާރުން ވަރަށް ބާރު ސްޕީޑުގައި ކުރިޔަށް ގެންދިޔަ ކަމަށެވެ. އެހެން ނަމަވެސް ސަރުކާރު ބަދަލުވެ، މި ސަރުކާރު އައި ފަހުން މިހާތަނަށް އަހަރަކާއި ނުވަރަކަށް މަސް ވެގެން ދިޔައިރުގައި ވެސް އެތަނުގެ އެއްވެސް މަސައްކަތެއް ކުރަމުން ނުދާކަން އޭނާ ފާހަގަކުރެއްވި އެވެ.
ދިގުރަށުގެ ބަނދަރުގެ ޖާގަ ކުޑަވުމުން ދިމާވާ ދަތިތަށް ފާހަގަކުރައްވަމުން އުސްމާން ވިދަޅުވީ ބަނދަރުގެ ދަތިކަން ހުރުމުން އެކަމުގެ އުނދަގޫ ރަށުގެ ރައްޔިތުންނަށް ވަރަށް ބޮޑަށް ކުރަމުން އަންނަކަމަށާއި އެހެން ކަމުން ބަނދަރު ކުޑަވުމުން ދިމާވާ ދަތިތަކަށް ވަރަށް އަވަހަށް ހައްލެއް ބޭނުންވާ ކަމަށެވެ.
އުސްމާން ވިދާޅުވީ ދިގުރަށަކީ ވަރަށް ގިނަ އޮޑިދޯނިފަހަރު ވެސް އޮންނަ ރަށެއް ކަމަށާއި އެގޮތުން ކުރިން އޮތް ކުޑަ ބަނދަރު އޮތް ގޮތުން އޮޑިދޯނިފަހަރު ގެންގުޅޭ ފަރާތްތަކަށް އެކަމުގެ ދަތިކަން ވަރަށް ބޮޑަށް ފޯރާކަމަށެވެ.
އެހެން ނަމަވެސް ކުރީ ސަރުކާރުން ފެށި ބަނދަރުގެ މަޝްރޫއުގެ ތެރެއިން އޮޑިދޯނިފަހަރު ގާތްކޮށްލެވޭ ގޮތަށް ޖެޓީގެ ބޮޑުބައެއް ހުރީ ނިމިފައި ކަމަށާއި އެއީ ބަނދަރުގެ ދަތިތަކަށް ލިބިގެންދިޔަ ވަރަށް ބޮޑު ފަސޭހައަކާއި ހައްލެއް ކަމަށް އުސްމާނު ވިދާޅުވި އެވެ.
އުސްމާން ވިދާޅުވީ ބަނދަރުގެ މަޝްރޫއު ރައީސް ޞާލިހުގެ ސަރުކާރުން ފަށާފައި ވަނީ މިހާރު އޮތް ބަނދަރާއި ގުޅުވައިގެން ދިގުމިނަށް 523 ފޫޓު އަދި ފުޅާމިނަށް 250 ފޫޓު އިތުރަށް ބޮޑުކުރާ ގޮތަށް ކަމަށާއި އަދި ބޭރުން ޖެޓީއެއް ވެސް ތަރައްގީކުރާ ގޮތަށް ކަމަށެވެ.
އެހެން ނަމަވެސް ކުރީ ސަރުކާރުން ފަށާފައިވާ އެ މަޝްރޫއުގެ މަސައްކަތް މި ސަރުކާރު އައި ހިސާބުން ހުއްޓިފައިވާ ކަމަށް އުސްމާން ވިދާޅުވި އެވެ.
ބަނދަރުގެ މަޝްރޫއަކީ ރައީސް ޞާލިހުގެ ސަރުކާރުން ފެށި މަޝްރޫއެއް. އެއީ މިހާރު އޮތް ބަނދަރު ކުޑަކަމުން ރަށުގެ ރައްޔިތުންނަށް އެކަމުގެ ދަތިކަން ހުރުމުން ކުރީ ސަރުކާރުން ފައްޓަވައިދެއްވި މަޝްރޫއެއް. ބަނދަރަށް އިތުރުކުރުމަށް ނިންމީ ދިގުމިނުގައި 523 ފޫޓް އަދި ފުޅާ މިނުގަ 250 ފޫޓު ހުންނަވަރަށް. އެއީ ޖެޓީ އަކާ ވެސް އެކު.ދިގުރަށު ކައުންސިލްގެ ރައީސް އިބުރާހީ މް އުސްމާން
އުސްމާން އިތުރަށް ވިދާޅުވީ ކައިރިމުސްތަގުބަލެއްގައި ރައީސް މުއިއްޒު ވެސް އެ ރަށަށް ވަޑައިގަތުމަށް ހަމަޖެހިފައިވާ ކަމަށާއި އެހެން ނަމަވެސް ބަނދަރު އަދި ތަރައްގީވެފަ އޮތް ވަރައްބަލާއިރު، އެތަން ހުޅުވައި ރިނބަން ކަނޑާލެވޭވަރު އަދި ނުވާނޭ ކަމަށެވެ.
ދިގުރަށަކީ ކުރީ ސަރުކާރުން ވަރަށް ގިނަ ބޮޑެތި މަޝްރޫއުތަކެއް ހިންގަމުން އައި ރަށެކެވެ. އެހެން ނަމަވެސް ސަރުކާރު ބަދަލުވެ، ރައީސް މުއިއްޒުގެ މި ސަރުކާރު އައިފަހުން އެ ހުރިހާ މަޝްރޫއުތަކެއް ވެސް ހުރީ ހުއްޓިފަ އެވެ.
