މިދިޔަ ފެބްރުއަރީ މަހު ފަށާނެ ކަމަށް ބުނި ނަޑެއްލާ ބަނދަރު އަދިވެސް ނުފެށޭ ކަމަށާއި އެއީ ރައްޔިތުންގެ ވަރަށް ބޮޑު ކަންބޮޑުވުމެއް ކަމަށް ގދ.ނަޑެއްލާ ކައުންސިލްގެ ރައީސް މުހައްމަދު އަންޝައު ވިދާޅުވެއްޖެއެވެ.

އޭނާ އެފަދައިން ވިދާޅުވީ ހުކުރު ދުވަހު، ރާއްޖެޓީވީގެ ފަށާއިރު ޕްރޮގްރާމްގައި ވާހަކަދައްކަވަމުންނެވެ.

މިދިޔަ ޖެނުއަރީ މަހު ނަޑެއްލާ އަށް ވަޑައިގެން އެ ރަށު ރައްޔިތުންނާއި މުޚާތަބުކުރައްވާ ވާހަކަ ދައްކަވަމުން ރައީސް ޑރ.މުހައްމަދު މުއިއްޒު ވިދާޅުވެފައި ވަނީ ބަނދަރުގެ މަސައްކަތް މިދިޔަ ފެބްރުއަރީ މަހު ފަށާނެ ކަމަށެވެ. އެހެންނަމަވެސް އެކަން ކުރެވިފައި ނުވާކަން ނަޑެއްލާ ކައުންސިލްގެ ރައީސް ފާހަގަކުރެއްވިއެވެ.

ގދ. ނަޑެއްލާގެ ކުރިއެރުމާއި ތަރައްޤީއަށް ރައްޔިތުން ބޭނުންވާ އެންމެ މުހިއްމު ކަންކަން މި އަހަރު ފަށްޓަވައިދެއްވާނެކަމުގެ ޔަޤީންކަން ރައީސް ވަނީ ދެއްވާފައެވެ. ނަމަވެސް އަމަލީ މަސައްކަތްތައް ކުރިއަށް ދާތަން ނުފެންނާތީ ހުސް ވައުދުތަކަކުން އާއްމުން ކުރާނެ ކަމެއް ނެތް ކަމަށް ކައުންސިލް ރައީސް ވަނީ ވިދާޅުވެފައެވެ.

"ރައްޔިތުންނެއް ޤަބޫލެއް ނުކުރޭ. އަޅުގަނޑުމެންނަށް ޤަބޫލެއް ނުކުރެވޭ. އެއީ މިދިޔަ ދެ އަހަރު ދުވަހުގެ ތެރޭގައި ވައުދުތަކެއް ވެ އެ ވައުދުތައް ނުފުއްދި ދަނީ." އޭނާ ވިދާޅުވިއެވެ.

ނަޑެއްލާގައި މިހާރު ބޭނުންކުރަމުން ދަނީ 2008 ވަނަ އަހަރު ހަދާފައިވާ ކުޑަ ބަނދަރެވެ. އެހެންކަމުން އެ ރަށަށް އެކަށީގެންވާ ފެންވަރުގެ ބަނދަރެއްގެ މުހިންމުކަން ވަރަށް ބޮޑެވެ.

މީގެ އިތުރުން ރައްޔިތުން މާޔޫސްވާ ގޮތަށް އެތައް ކަމެއް ހިނގަމުންދާ ކަަމަށް އޭނާ ވިދާޅުވިއެވެ. ނަޑެއްލާ ކައުންސިލްގެ އިޙްތިސާސްގައި 7 ފަޅު ރަށް އޮތް ނަމަވެސް އެ ފަޅު ރަށްތަކުން ނަފާ ހޯދަން ރާވާފައިވާ ކަންކަން ކުރެވޭނެ ގޮތެއް ވެސް ނެތް ކަމަށް އޭނާ ވަނީ ވިދާޅުވެފައެވެ.

ރައްޔިތުންނަށް ބިންތައް ކުއްޔަށް ދޭން ބޭނުންވިޔަސް އެކަން ކޮށްދޭނެ ގޮތެއް މި ވަގުތު ނެތް ކަމަށް އޭނާ ވަނީ ވިދާޅުވެފައެވެ. ބޭނުން ވަނީ އަމަލީ ގޮތުން ކުރާ މަސައްކަތް ފެނި ރައްޔިތުންނަށް ފަސޭހަ ވާނެ ގޮތްތަކެއް ފެނުން ކަމަށާއި މި ސަރުކާރާއި އެކުގައި އަދި އެ މަންޒަރު ނުފެންނަ ކަމަށް އޭނާ ވަނީ ވިދާޅުވެފައެވެ.