ދިގުރަށަށް ރައީސް ވަޑައިގަންނަވާ ދަތުރުފުޅާއި ގުޅިގެން ޖިއޯބޭގްތައް ގެނެސްފި، މަސައްކަތް ހުއްޓިފައި އޮންނަތާ 2 އަހަރު ވަނީ

އދ. ދިގުރަށުގެ ގިރާ ސަރަހައްދު ހިމާޔަތްކުރުމުގެ މަސައްކަތް ހުއްޓިފައި އޮންނަތާ 2 އަހަރުވާން ކައިރިވެފައިވާ އިރު، ރައީސް ޑރ. މުހައްމަދު މުއިއްޒު އެރަށަށް ވަޑައިގަންނަވާތީ އަލުން މަސައްކަތް ފެށުމަށް ޖިއޯބޭގް އެރަށަށް ގެނެސްފިއެވެ.

ދިގުރަށުގެ ގިރާ ސަރަހައްދު ހިމާޔަތްކުރުމުގެ މަސައްކަތަކީ އެރަށުގެ ބަނދަރުގެ މަސައްކަތާއެކު ކުރިއަށް ގެންދިއުމަށް ރާވާފައިވާ މަސައްކަތެކެވެ. ނަމަވެސް ސަރުކާރު ބަދަލުވުމާއެކު ބަނދަރުގެ މަސަސައްކަތް ހުއްޓި ގިރާ ސަރަހައްދު ހިމާޔަތްކުރުމުގެ މަސައްކަތް ވަނީ ހުއްޓިފައެވެ.

ބަނދަރު މަޝްރޫޢުގެ ދަށުން، 64,416 ކިއުބިކް މީޓަރުގެ ސަރަޙައްދެއްގެ ބަނދަރު ފުންކުރުމާއި، 6,770 ކިއުބިކް މީޓަރުގެ ސަރަޙައްދެއްގެ ނެރު ފުންކުރުމާއި، 294 މީޓަރުގެ ސަރަޙައްދެއްގައި އެއްގަމުތޮށި ލުމާއި، 287 މީޓަރުގެ ސަރަޙައްދެއްގައި ބޭރުތޮށި ލުމާއި، 98 މީޓަރުގެ ސަރަޙައްދެއްގައި ރިވެޓްމެންޓް ޖެހުމާއި، 2324 އަކަ މީޓަރުގެ ސަރަޙައްދެއްގައި ހާބަރ ޕޭވްމަންޓް ހެދުމާއި، ރޭމްޕެއް ހެދުމާއި، ޖެޓީ އެއް ހެދުމާއި، އޭޕްރަންއެއް ހެދުމާއި، ބަނދަރު ބައްތި ހަރުކުރުމުގެ މަސައްކަތް ހިމެނެއެވެ.

މި މަސައްކަތަށް އިތުރުކުރެވުނީ ގިރާ ސަރަހައްދު ޖިއޯ ބޭގް ޖަހައިގެން ހިމާޔަތްކުރުމެވެ. އެ މަސައްކަތް ވެސް އެމްޓީސީސީއައި އޮތީ ހަވާލުކޮށްފައެވެ.

މިކަމާއި ގުޅޭގޮތުން ދިގުރަށު ކައުންސިލްގެ ރައީސް އިބްރާހިމް އުސްމާން ވިދާޅުވީ ޖިއޯ ބޭގްތައް ގެނައި ދާދި ފަހުން ކަމަށެވެ. އަދި ޖިއޯ ބޭގްތައް ގެނައިތާ ވާނީ ގާތްގަނޑަކަށް ދެހަފްތާ ކަމަށާއި، އެ ތަކެތި ގެނެސްފައިވަނީ ރައީސް ޑރ. މުހައްމަދު މުއިއްޒުގެ ދަތުރުފުޅާއި ގުޅިގެން ކަމަށް ބެލެވޭ ކަމަށް ކައުންސިލް ރައީސް ވިދާޅުވިއެވެ.