ދިރާގު ޔޫތްފެސްޓް މާދަމާ އޮންނާނެ

ދިވެހިރާއްޖޭގެ އެންމެ ބޮޑު މުއާސަލާތީ ކުންފުނި ކަމަށްވާ ދިރާގުން އިންތިޒާމު ކޮށްގެން ބާއްވާ ޔޫތު ފެސްޓް މަދާމާ ބާއްވާނެއެވެ.

ދިރާގުގެ ޔޫތު ފެސްޓްގެ ވޯޓާ ސްޕޯޓްސް އެޑިޝަން ބޭއްވުމަށް ހަމަޖެހިފައި ވަނީ މާދަމާ ހެދުނު 10 އިން އިރުއޮއްސި 6:00 އަށް ވިލިމާލޭ ބީޗުގައެވެ. މި ފެސްޓިވަލުގައި ބައިވެރިވާ ފަރާތްތަކަށް މުޅިން ހިލޭ މޫދު ކުޅިވަރުތަކުގައި ބައިވެރިވެވޭނެ ކަމަށް ދިރާގުން މައުލޫމާތު ދެއެވެ.

ހަމައެހެންމެ މި ފެސްޓިވަލް ކުރިޔަށްދާ ވަގުތު ލައިވް މިއުޒިކާއި ބާބަކިއު އަދި ތަފާތު ބީޗް ކުޅިވަރުތައް އެ ސަރަހައްދުގައި ކުރިޔަށް ދާނެ ކަމަށް ދިރާގުން މައުލޫމާތު ދެއެވެ.

ދިރާގުން ހާމަކޮށްފައިވާ ގޮތުގައި އެ ކުންފުނިން މި ފެސްޓިވަލް ބޭއްވުމަށް ނިންމި އެންމެ މައިގަނޑު ސަބަބަކީ ދިވެހިންނަކީ ޒަމާނުއްސުރެ މޫދާއި ކަނޑަށް ފަރިތަ ބަޔަކަށް ވެފައި، މޫދު ކުޅިވަރު ކުޅުމުގެ ފުރުސަތު ވީހާ ވެސް ގިނަ ޒުވާނުންނަށް ހުޅުވާލުމުގެ މަގްސަދުގައެވެ.