ފިލިޕީންސްގައި ފެރީއެއްގައި ރޯވި ހާދިސާގައި މަރުވި މީހުންގެ އަދަދު 35 އަށް އަރައިފި
12 ސެޕްޓެމްބަރު 2026 | ހޮނިހިރު 04:38ފިލިޕީންސްގެ ފެރީއެއްގައި ރޯވި އަލިފާންގަނޑު ކޮންޓްރޯލްކޮށް، އޭގެ ތެރެއިން ގިނަ ބައެއްގެ ހަށިގަނޑު ފެނިފައިވާއިރު، ގެއްލިފައިވާ މީހުން ހޯދުމުގެ މަސައްކަތް ކޯސްޓްގާޑުން ދަނީ ކުރަމުން. މި ހާދިސާ ހިނގަން މެދުވެރިވި ސަބަބު ދެނެގަތުމަށް ކަމާބެހޭ އިދާރާތަކުން ތަހުގީގު ފަށާފައިވާއިރު، މީހުން ސަލާމަތްކުރުމުގައި ފަޅުވެރިން އަމަލުކުރި ގޮތާއި އުޅަނދުގެ ސަލާމަތީ ކަންކަން ބަލަމުންދާނެ ކަމަށް އިދާރާތަކުން ބުނޭ
ފިލިޕީންސްގެ ފަތުރުވެރިންގެ މެދުގައި މަގުބޫލު ސަރަހައްދަކަށް ދަތުރުކުރަނިކޮށް އަލިފާން ރޯވެ އަނދާފައިވާ ފެރީ | ބީބީސީ
ފިލިޕީންސްގައި ނުރައްކާތެރި އަލިފާނުގެ ހާދިސާއެއް ހިނގި ފެރީގެ ތެރެއިން އިތުރު 30 މީހެއްގެ ހަށިގަނޑު ފެނި، މި ހާދިސާގައި މަރުވި މީހުންގެ އަދަދު 35 އަށް އުފުލިފައިވާ ކަން އެ ގައުމުގެ ކޯސްޓްގާޑުން ހާމަކޮށްފި އެވެ. ވެރިރަށް މެނީލާއިން ފުރައިގެން ފަތުރުވެރިންގެ މެދުގައި މަގުބޫލު މަންޒިލެއް ކަމަށްވާ ކޮރޯން އަށް ދަތުރުކުރި 'އެމްވީ ޖޫން އެސްޓާ' ނަމަކަށް ކިޔާ މި ފެރީގައި ބުދަ ދުވަހު އަލިފާން ރޯވިއިރު، 117 ފަސިންޖަރުންނާއި 17 ފަޅުވެރިންނާއެކު ޖުމްލަ 130 އަށްވުރެ ގިނަ މީހުން އޭގައި ތިއްބެވެ.
ފެރީގައި އަލިފާން ރޯވުމާއެކު، އޭގައި ތިބި 43 މީހުން ސަލާމަތް ކުރެވިފައިވާއިރު، އޭގެ ތެރެއިން ގިނަ ބަޔަކަށް ދަނީ ހަސްފަތާލުތަކުގައި ފަރުވާ ދެމުންނެވެ. އަދި، ވީނުވީއެއް ނޭނގި ގެއްލިފައިވާ 50 އަށްވުރެ ގިނަ މީހުން ހޯދުމުގެ މަސައްކަތް އަދިވެސް ދަނީ ކުރަމުންނެވެ. ފިލިޕީންސްގެ ކޯސްޓްގާޑުން ބުނީ، ފެރީގެ ތެރޭގައި އަދިވެސް އިތުރު ހަށިގަނޑުތައް ތާށިވެފައިވާ ކަމަށެވެ. ފެރީގެ ތެރޭގައި ވިހަ ގޭސް ހުރުމާއި ގަދަ ހޫނުގެ ސަބަބުން، ގެއްލިފައިވާ މީހުންގެ ހަށިތައް ހޯދުމަށް ވަނީ ހުރަސްއެޅިފަ އެވެ.
ނޫސްވެރިންގެ ބައްދަލުވުމެއްގައި ކޯސްޓްގާޑުގެ ތަރުޖަމާނު ކޮމޮޑޯ ނެއޯމީ ކަޔަބްޔާބް ވިދާޅުވީ، 22 ގަޑިއިރުގެ ދިގު ދަތުރެއް ކުރަމުންދިޔަ މި ފެރީން ފެނުނު ގިނަ ހަށިތައް ފެނިފައި ވަނީ މީހުން ނިދަން ހާއްސަކޮށްފައިވާ ސަރަހައްދުން ކަމަށެވެ. "ކަނޑައެޅިފައިވާ އުސޫލުތަކާ އެއްގޮތަށް، މަރުވި މީހުންގެ ހަށިތައް ނެގުމާއި އެއީ ކޮންބައެއްކަން ދެނެގަތުމުގެ މަސައްކަތް ކަމާބެހޭ އިދާރާތަކުން މިހާރު ދަނީ ކުރަމުން،" ކަޔަބްޔާބް ވިދާޅުވި އެވެ. މީގެ އިތުރުން، މި ހާދިސާގައި އަސަރުކޮށްފައިވާ އާއިލާތަކުގެ ހިތާމައިގައި ބައިވެރިވާ ކަމަށް ވެސް ކަޔަބްޔާބް ވިދާޅުވި އެވެ.
ކޯސްޓްގާޑުން ކުރިން ބުނީ، ފެރީގައި ފުރަތަމަ އަލިފާން ހިފާފައި ވަނީ، މުދާ ބަރުކޮށްފައިވާ ސަރަހައްދުގައި ކަމަށް، މި ހާދިސާގައި ސަލާމަތްކުރެވުނު މީހުން ބުނެފައިވާ ކަމަށެވެ. އަދި، ބައެއް ފަސިންޖަރުން ލައިފް ޖެކެޓް ނާޅާ ތިބިކަން ފާހަގަކުރެވިފައިވާ ކަމަށް ވެސް ކަޔަބްޔާބް ވިދާޅުވި އެވެ.
މި ހާދިސާގައި ސަލާމަތްވި މީހުން ބުނީ، އެ މީހުން ފެރީން ފޭބި ވަގުތު، އޭގެ ތެރޭގައި ތާށިވެފައި ތިބި މީހުން އެހީއަށްއެދި އާދޭސްކުރަމުން ދިޔަ އަޑު އިވުނު ކަމަށެވެ. އަދި، މީހުން ސަލާމަތް ކުރުމުގެ މަސައްކަތުގެ ތެރެއިން ބައެއް މީހުންނަށް އަނިޔާވި ކަމަށް ވެސް ރިޕޯޓުތައް ބުނެ އެވެ.
ފިލިޕީންސްގެ ކަނޑު ދަތުރުފަތުރާބެހޭ އިދާރާއިން ދަނީ މި ހާދިސާ ހިނގަން މެދުވެރިވި ސަބަބު ދެނެގަތުމަށް ތަހުގީގު ކުރަމުންނެވެ. 2002 ވަނަ އަހަރު ބަނދެފައިވާ މި ފެރީއަކީ ސަލާމަތީ ސެޓުފިކެޓުތައް އޮތް އަދި މާރިޗު މަހު އިންސްޕެކްޝަނުން ފާސްވެފައިވާ އުޅަނދެއް ކަމަށް ރިޕޯޓުތައް ބުނެ އެވެ. ފެރީގައި ތިބި މީހުންގެ ލިސްޓުގައި މައްސަލައެއް އުޅޭތޯއާއި، މުދާ ބަރުކޮށްފައިވާ ގޮތާއި، ކުއްލި ހާލަތްތަކުގައި ފަޅުވެރިން އަމަލުކުރި ގޮތް ތަހުގީގު ކުރާ ފަރާތްތަކުން ދަނީ ބަލަމުންނެވެ.
މަސްދަރު: ބީބީސީ
