ހަލާލު ޓޫރިޒަމް ހިމެނޭހެން، 6 އަތޮޅެއްގައި 15 ރިސޯޓު ތަރައްގީކޮށްދޭނެ ބަޔަކު ހޯދަނީ!
8 އޯގަސްޓު 2026 | ހޮނިހިރު 07:10ހަލާލު ޓޫރިޒަމް ހިމެނޭހެން 6 އަތޮޅަކުން 15 ރިސޯޓު ތަރައްގީކުރާނެ ބަޔަކު ހޯދުމަށް ޓޫރިޒަމް މިނިސްޓްރީން ބީލަމަށް ވަނީ ހުޅުވާލާފައި. މި މަޝްރޫއުގެ ދަށުން ފަޅުތައް ހިއްކައިގެންނާއި ފަޅުރަށްތަކުގައި ރިސޯޓު ހެދުމަށް 50 އަހަރަށް ކުއްޔަށް ދޫކުރުމަށް ވަނީ ނިންމާފައި
ރާއްޖޭގެ ރިސޯޓެއްގެ ވިލާއެއް ކައިރީގައި ޑެކް މަތީގައި ފަތުރުވެރިއަކު އިށީނދެގެން | އައިސްޓޮކް
ހަލާލު ޓޫރިޒަމް ހިމެނޭހެން، 6 އަތޮޅެއްގައި 15 ރިސޯޓު ތަރައްގީކޮށްދޭނެ ބަޔަކު ހޯދުމަށް މިނިސްޓްރީ އޮފް ޓޫރިޒަމް އެންޑް ސިވިލް އޭވިއޭޝަނުން އިއުލާން ކޮށްފި އެވެ.
ބުރާސްފަތި ދުވަހު މިނިސްޓްރީން ކުރި އިއުލާންތަކެއްގައި ބުނީ، ފަތުރުވެރިކަން ތަރައްގީ ކުރުމަށް ބީލަމުގެ އުސޫލުން ކުއްޔަށް ދޫކުރުމަށް ކަނޑައަޅާފައިވާ ރަށްރަށާއި ފަޅުތަކުގެ ތެރެއިން ހަ އަތޮޅެއްގައި ޓޫރިސްޓް ރިޒޯޓް ތަރައްގީކޮށް ހިންގާނެ ފަރާތެއް ހޯދުމަށް ބީލަމަށް ހުޅުވާލާފައިވާ ކަމަށެވެ.
ރިސޯޓު ހަދާނެ ބަޔަކު އިއުލާނުކުރީ ހއ. އަތޮޅާއި ހދ. އަތޮޅާއި ށ. އަތޮޅާއި ނ. އަތޮޅާއި ލ. އަތޮޅު އަދި އައްޑޫ ސިޓީގަ އެވެ.
އެގޮތުން ހއ. އަތޮޅާއި ހދ އަތޮޅާއި ށ. އަތޮޅުން ހުޅުވާލީ ފަޅުތަކެއް ހިއްކައިގެން ރިސޯޓު ތަރައްގީ ކުރުމަށެވެ. އަދި، ށ. އަތޮޅާއި ނ. އަތޮޅުން ރިސޯޓު ހަދަން ދޫކުރުމަށް ނިންމާފައިވަނީ ފަޅު ރަށްތަކެކެވެ.
ރިސޯޓު ހަދަން ކުއްޔަށް ދޭ ފަޅުތަކަކީ،
ހއ. މާދުނި ފަރު-1،2،3
ހދ. މަކުނުދޫ ފަރު-2،
ހދ. މާފަރު ފަޅު-1،2،3
އަދި ށ. ގޮނާ ފަރު-1،2،3
މިނިސްޓްރީން ބުނީ ބޮޑުމިނުގައި 200 ހެކްޓަރު ހުންނަ ފަޅުތަކުގައި ރިސޯޓު ތަރައްގީ ކުރުމަށް ހުޅުވާލައިރު، އައްޑޫ ސިޓީ، ހދ. އާއި ލއަތޮޅުގައި ރިސޯޓު ހަދާނެ ބަޔަކު ހޯދުމަށް އިއުލާން ކުރީ ހަލާލު ޓުއަރިޒަމްގެ މޮޑަލްގަ އެވެ.
މިނިސްޓްރީން ބުނީ، ހދ. މަކުނުދޫ ފަޅުގައި މަދުވެގެން 150 އެނދުގެ ރިސޯޓެއް ހަދަން ޖެހޭ ކަމަށާއި، ލ. ފޮނަގާދޫގައި 100 އެނދުގެ ރިސޯޓެއް ހަދަން ޖެހޭ ކަމަށެވެ. އަދި އައްޑޫ ދޮންހެރައާއި އެ ރަށާ ޖެހިގެން އޮންނަ 0.85 ހެކްޓަރުގެ ކުޑަ ފަޅުރަށުގައި މަދުވެގެން 100 އެނދުގެ ރިސޯޓެއް ހަދަން ޖެހޭ ކަމަށް އިއުލާންގައި ބުނެފައިވެ އެވެ.
މިނިސްޓްރީން ރިސޯޓު ހަދަން ކުއްޔަށް ދޫކުރާ ފަޅު ރަށްތަކުގެ ތެރޭގައި ށ. ނަލަންދުއާއި ނ. ފަރުމުލި ހިމެނެ އެވެ. އަދި ފަރުމުލިން، 71.18 ހެކްޓަރުގެ ފަޅުގެ ސަރަހައްދާއި އެކު، 15 ހެކްޓަރަށްވުރެ ބޮޑުނޫން ރަށެއް ހިއްކުމަށް ހުޅުވާލާފައިވެ އެވެ.
ޓޫރިޒަމް މިނިސްޓްރީން ވަކިވަކިން ކޮށްފައިވާ އިއުލާންގައިވާ ގޮތުން، ބީލަން ހުށަހެޅުމުގެ ސުންގަޑިތަކަކީ ނޮވެމްބަރު 17 ން 23 އާ ދެމެދުގެ ތާރީޚުތަކެވެ. އަދި މިމަޝްރޫއުތަކަށް ޝައުގުވެރިވާ ފަރާތްތަކަށް ޕްރީ-ބިޑް މީޓިންތައް ސެޕްޓެމްބަރު އަދި އޮކްޓޫބަރު މަހު އޮންލައިންކޮށް ބޭއްވުމަށް ވަނީ ނިންމާފަ އެވެ.
މިނިސްޓްރީން މި ހުރިހާ ތަންތަނެއް ވެސް ކުއްޔަށް ދިނުމަށް ނިންމާފައި ވަނީ 50 އަހަރުގެ މުއްދަތަކަށެވެ.
